2008
Sa Latou Saunoa mai ia i Tatou
Novema 2008

Sa Latou Saunoa mai ia i Tatou

Ia Avea le Konafesi o se Vaega o o Tatou Olaga

E faapefea ona e avea aoaoga i le konafesi aoao ma se vaega o lou olaga ma olaga o tagata o lou aiga? Mafaufau e faaaoga nisi o nei saunoaga ma fesili e fai ma se amataga o se talanoaga po o le mafaufau loloto i ai o le tagata lava ia.

E mafai foi ona e faitau, faalogologo, pe matamata i lauga o le konafesi i luga o peau o le ea i le www.lds.org.

Mo Tamaiti

  • “Ia avea i tatou ma tagatanuu lelei o malo o loo tatou nonofo ai, ma ni tuaoi lelei i o tatou nuu ma alalafaga, ia aapa atu ia i latou o isi faatuatuaga faapea foi ma o tatou lava tagata”—Peresitene Thomas S. Monson (tagai itulau 106).

  • “E tele atu mea e tutusa ai fanau a le Atua nai lo mea e eseese ai… . O le a fesoasoani le Atua ia tatou iloa se eseesega i se isi tagata e le o se faapogai o le faasoesa, ae o se saofaga. E mafai ona fesoasoani le Alii ia e iloa ma faataua le mea o loo fai ma sao o lena tagata ae o loo e vaivai ai”—Peresitene Henry B. Eyring (tagai itulau 68).

  • “A o tatou suesueina tusitusiga paia, talanoa ma lo tatou Tama Faalelagi i aso taitasi, [ma] tautino atu e tausi poloaiga a le Atua, … tatou te maua le faamoemoe.” —Peresitene Dieter F. Uchtdorf (tagai itulau 21).

Mo Le Autalavou

  • Na aoao mai e Peresitene Henry B. Eyring e uiga i le fausiaina o le lotogatasi e ala i le tautala ma le agalelei o le tasi i le isi: “E mafai ona ou folafola atu ia te oe se lagona o le filemu ma le olioli pe a e tautala ma le agalelei e uiga i isi i le Malamalama o Keriso” (tagai itulau 68).

  • “Le autalavou e, [o le sauniga faamanatuga] e le o se taimi o ni talanoaga taumusumusu i telefoni feaveai, po o ni feau feaveai i telefoni,” o le saunoaga lea a Elder Dallin H. Oaks (tagai itulau 17).

  • Fai mai Elaine S. Dalton, “Ou te matua talitonu o se tamaitai po o se alii amio lelei se toatasi, e taitaiina e le Agaga, e mafai ona suia le lalolagi, ae ina ia faia lena mea, e tatau ona tatou toe foi i le amio lelei” (tagai itulau 78).

  • Ina ia faitau i aafiaga o le konafesi na saunia e le autalavou, alu i le newera.lds.org.

Mo Tagata Matutua

  • Na toe ta’ua e Peresitene Boyd K. Packer le tele o ni tofotofoga faigata na feagai ma le uluai Au Paia o Aso e Gata Ai (tagai itulau 88). Na faapefea ona faamalolosia i latou e lo latou faatuatua i le taimi o nei tofotofoga? E mafai faapefea ona faamalosia oe e lou faatuatua? (Mo nisi manatu faaopoopo, tagai i le saunoaga a Elder Robert D. Hales, i le itulau e 72.)

  • E tolu mea na faailoa mai e Elder D. Todd Christofferson tatou te manaomia ina ia avea ai i tatou ma se nuu o Siona (tagai itulau 37). Fai se lisi o auala e mafai ona e alualu ai i luma i eria taitasi nei.

  • Sa saunoa Elder M. Russell Ballard ma Silvia H. Allred e uiga i le talalelei ua salalau i atunuu o le lalolagi (tagai itulau 81 ma le 10). E faapena foi, i lana tuleiga amata, na saunoa ai Peresitene Thomas S. Monson, “Ou te fautuaina outou ina ia tatalo mo le tatalaina o na eria, [ia e le o faatagaina ona tatou faasoa saoloto atu i ai le talalelei], ina ia mafai ona tatou faasoa atu ia i latou le fiafia o le talalelei.” Afai o e manatuaina Peresitene Spencer W. Kimball (1895–1985) a o ia faasoa maia se fautuaga faapena foi, talanoa e uiga i lou aafiaga ina ua e mulimuli i lena fautuaga. O le a se mea ua e matauina i le ola o le Ekalesia i lo outou lava eria? Talanoa ma lou aiga e uiga i le tatalo faatasi ina ia maua avanoa mo le talalelei e talai atu ai i nisi nofoaga faaopoopo.

  • Po o a lava tofotofoga tatou te feagai, o le a le tuulafoaiina lava i tatou e le Tama Faalelagi (tagai i lauga o loo i itulau 21, 29, 32, 41, 75, ma le 102). O faapefea ona e vaaia le tali mai o le Tama Faalelagi i au tatalo a o e feagai ma tulaga faigata?