E Alofa le Atua ma Fesoasoani i Ana Fanau Uma
Tatou te manaomia le fesoasoani a le Tama Faalelagi. O se punavai taua o lenei fesoasoani e maua mai le auauna atu o le tagata mo ona uso a tagata, e ala i le tatalo, ma e ala i le taulai atu ia Keriso.
O se tasi o upumoni puletu o le Toefuataiga o le, o loo soifua le Atua ma o loo afio i Ona lagi, ma o Ia o se tamalii faaeaina e i ai “se tino o aano ma ivi,”1 ma o Ia o ananafi, o le aso, ma o le Atua e le masuia lava e faavavau,2 o le puna o mea lelei uma ma le upumoni.
O Atamu ma Eva o Ana uluai fanau faaletino ia i lenei fogaeleele. O lo laua foafoaga, na Ia fetalai ai: “Ma o Au le Atua, na ou faia le tagata i lo’u lava faatusa, o le faatusa foi o lo’u Atalii e Toatasi na Fanaua na ou faia ai o ia, na ou faia i laua o le tane ma le fafine.”3
O lenei upumoni e siitia ai le aiga tagata. O alii ma tamaitai o ni foafoaga ofoofogia ua faaee i ai uiga paia. I le taimi o le Foafoaga, sa tuu e le Atua i totonu o Atamu ma Eva le mana faalelagi e fanauina ai fanau e pei foi o i laua. O le mea lea, o i tatou uma, o Lona faatusa.
Peitai, tatou te fetaiai ma vaivaiga ma mea matautia i le olaga nei. E le mafai ona sosola ese mai ma’i, ma le oti. O faigata ma le lototiga o se vaega o le folauga i le olaga. O uiga faaletagata, o naunauga, ma mea e faananau i ai, e faasoesa ina ia faamalieina.
Mo nei mafuaaga uma ma isi, tatou te manaomia ai le fesoasoani a le Tama Faalelagi. O se punavai taua o lenei fesoasoani e maua mai le auauna atu o le tagata mo ona uso a tagata.4 O le poloaiga o le “alofa atu lea i le lua te tuaoi ia pei o oe lava ia te oe.”5 Ona o i tatou uma o ni uso ma ni tuafafine, o i tatou uma foi o “tuaoi,” e ui ina tuu eseese i nisi taimi ona o le mamao, aganuu, lotu, po o lanu. Fai mai le Perofeta o Iosefa, “O se tagata e faatumulia i le alofa o le Atua, e le faamalieina i le faamanuiaina na o lona lava aiga, a e ia faasalalau atu i le lalolagi atoa, e naunautai e faamanuia tagata uma lava.”6 Ua faatuina e le Alii le faataitaiga, “aua e faia e Ia mea lelei i le fanauga a tagata; … ua le faafiti i se tasi e sau ia te ia, o tagata uli ma tagata papae, o e pologa ma e saoloto, o tane atoa ma fafine; e manatua foi e ia o tagata faapaupau; e tutusa tagata uma i le Atua.”7
Ina ia foai atu i isi i le ala a le Alii, tatou te taumafai e tausia i tatou lava ma ositaulaga e fesoasoani atu ia i latou e manaomia. E galulue e matitiva mo mea latou te maua ma saili atu mo le lelei o isi.8 O le mamanu lava lea sa ia i tatou mai le amataga.9
O le fuafuaga o le uelefea a le Ekalesia ua faapupula mai ai lenei mamanu faalelagi, ma o tagata faamaoni o le Ekalesia e mulimuli ai. O a latou taulaga e avatu ai le fesoasoani i le fafine ua oti lana tane, tausiga o fanau matuaoti, ma le malutaga mo e puapuagatia.
I ni nai tausaga ua mavae, sa asiasi mai ai i le Aai o Sate Leki se taitai iloga mai Saina, ma malaga maimoa ai i nofoaga eseese o le Ekalesia, ma tuu atu ai sana saunoaga i le Iunivesite o Polika Iaga. I lona aoao ai e uiga i le polokalama o le uelefea a le Ekalesia, sa ia saunoa ai, “Afai tatou te taufai alolofa uma o le tasi i le isi e pei o lenei, o le a avea le lalolagi ma nofoaga e sili atu ona filemu.”
O le anapopogi ma tuuina atu le tau o ‘aiga e le o taumafaina e fesoasoani ai i e matitiva, na maofa ai le amepasa. I le faaiuga o lana asiasiga i le Lotoa o le Uelefea, sa ia tauaaoina atu ai i le pule se teutusi laitiiti lanumumu—o se “taga mumu.” I Saina e tuuina atu se “taga mumu” e avea ma se faailoga o le alofa, faamanuiaga, ma se moomooga mo le manuia. “E leai se mea tele o i ai,” na saunoa ai lea alii, “ae o loo i ai le tupe sa ou teuina mai malutaeao e lua na misi i taeao e lua ia ua mavae atu. Ou te fia tuuina atu la’u taulaga anapogi i le polokalama o le Uelefea a le Ekalesia.”10
O le fuafuaga o le uelefea a le Ekalesia, e musuia mai le Atua. O ona mataupu faavae e taua i le faaolataga o le tagata.11 O se tagavai mo le auaunaga, o se molimau i le lalolagi ua toefuataiina mai le Ekalesia a Iesu Keriso. O le fesoasoani a le lagi i auala aoga. Na saunoa mai Peresitene Thomas S. Monson: “O mataupu faavae o le uelefea … e le suia. O le a le suia lava. O upumoni ua faaalia mai.”12
O le isi auala taua e maua ai le fesoasoani a le Atua, o le tatalo. Ua poloaiina i tatou ina ia tatalo atu i le Atua, lo tatou Tama, i le suafa o Iesu Keriso. O le apoapoaiga o le, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuitui atu, ona toina ai lea ia te outou.”13 E tali mai e le Tama Faalelagi tatalo faamaoni uma lava.
I le avea ai ma perofeta a le Alii, ua fautua mai Peresitene Monson: “E i ai taimi e foliga mai ua leai se mutaaga i o tatou faafitauli—leai se malamalama e tafiesea ai le pogisa… . Tatou te lagona le tuulafoaiina, loto nutimomoia, ma le tuuatoatasi. Afai e te iloaina lou i ai i se tulaga faapea, ou te aioi atu ia te oe ina ia e liliu atu i lou Tama Faalelagi i le faatuatua. O le a Ia sii a’e oe ma taitai ia te oe. Na te le aveeseina i taimi uma ou faigata mai ia te oe, ae o le a Ia faamafanafana ma taitai oe i le alofa i soo se faigata e te lua feagai.”14
Pe a tatou feagai ma nisi o tulaga manaomia, ona tatou faalagolago lea i se ituaiga o tatalo e na o lalo o aao o i latou ua faatagaina e auauna i le Atua e maua ai. Sa femaliuai Iesu Keriso ma “faamalolo i e mamai, ma toe faatuina e ua ua oti,”15 ma siitia agaga ua galala. O le Toefuataiga o le talalelei na aumaia ai le mana o le perisitua ma le pule e faaauau ai pea lenei vaega o le galuega a le Atua.16
A ma’i se tasi pe mafatia tuga, “ina aami atu ia i toeaina o le ekalesia, ia latou tatalo mo ia, pe a uma ona faauu ia te ia ile suauu i le suafa o le Alii. O le tatalo foi e faia i le faatuatua e faaolaina ai le ma’i, e faatuina foi o ia e le Alii.”17 Ua faatagaina toeaina faamaoni e faia mea semanu e faia e le Alii pe a na i ai o Ia iinei.18
Pe a na fai e tausia ni faamaumauga o tatalo e tali mai, semanu e le mafai ona ofi i le lalolagi tusi uma e tusia ai. O se molimau faapelepele lenei mai ia Elder Glen L. Rudd, o se Pulega Aoao ua faamalolo faamamaluina ma se paaga peleina:
“Sa ou maua se telefoni mai se tagata o lo matou aiga e faapea o se teineitiiti e 12 tausaga, o Janice, sa i le falemai ona o ni manu’aga matuia. Sa manao lona tina ia maua sona faamanuiaga faaleperisitua.
“Sa ma o ma Elder Cowley i le falemai. O iina na ma iloa ai e uiga i le faalavelave. Na lavea Janice i se pasi o le nuu. Na oso pa’u piilua o tua i le ulu ma lona tino.
“Sa ma ulufale atu ma Elder Cowley i le potu lea sa taoto ai Janice. Na gau lona ivinofoi, manu’a leaga lona tauau, ma le tele o isi ponaivi na gaui, ma ni manu’a matuia i lona ulu e le mafai ona toe faaleleia. E ui lea, sa ma lagonaina ua tatau ona ma auauna atu ia te ia ma faamanuia o ia. Sa ou faauuina o ia i le suauu, ae faamau e Elder Cowly le faauuga. I se tulaga malosi ma le mautinoa sa ia faamanuia ia te ia ina ia toe malosi atoatoa ma ola i se olaga e masani ai. Sa ia faamanuia ia te ia ia toe malosi e aunoa ma ni aafiaga tumau mai ona mau manu’a. O se faamanuiaga manaia tele ma o se taimi maoae moni lava.”
Sa saunoa mai Elder Rudd: “Sa le mafai ona gaioi se musele o Janice mo le silia i se masina. E lei faapea lava na uma lo matou faatuatua. Sa fofogaina se faamanuiaga o le a ia toe malosi, ma o le a leai ni tuga tumau.”
Na faaiu [le faamatalaga] a Elder Rudd: “Ua tele tausaga ua mavae talu mai lena asiasiga i le falemai. Sa ma talanoa talu ai nei ma Janice. Ua 70 nei ona tausaga, o ia o se tina o se fanau e toa 3, o se tinamatua o fanau e 11 a lana fanau. E oo mai i le aso, e lei mafatia lava o ia i se aafiaga le lelei mai lena faalavelave.”19
O lona faamalologa, o se tasi o na mau faamalologa. Ae e leai se faamalologa e tu o se molimau e sili atu, o le auala na fesoasoani ai le Tama Faalelagi i Lana fanau e ala i le tatalo nai lo le mea na tupu i se potu o le falemai, ia Janice e 12 ona tausaga ma ni auauna faatauvaa se toalua a le Atua, i le tusa ma le 58 tausaga talu ai.
O le fesoasoani aupito sili ma le taua mai le Tama Faalelagi na oo mai lea ia i tatou e ala mai i Lona Alo, “aua ua faapea lava ona alofa mai le Atua i le lalolagi, ua ia auina mai ai lona Alo e toatasi, ina ia le fano se tasi e faatuatua ia te ia, a ia maua e ia le ola e faavavau.”20
Ma le ava ma le migao tele e tatau ai, ou te tuuina atu ai le molimau i le Alii o Iesu Keriso. I le faia o lena molimau, ua faamanatu mai ai ia te au e tatau ona tatou matua faaeteete i le faaaogaina o Lona suafa. E ui o Ana aoaoga ma uunaiga, ma le faaolataga ua tatou alolofa ai ia te Ia, ae talafeagai pe afai tatou te le talanoa e uiga ia te Ia, e faapei o Ia o se uo mai le tuaoi.
O ia o le Ulumatua o fanau agaga a lo tatou Tama. Na ia faia mea uma na faauu o Ia e fai—o le mea lea o mea uma e faaaloalo ia te Ia ma molimau atu ia te Ia.21 Na Ia ta’u atu i perofeta anamua mea e tusia ma faaali mai Lona finagalo i Ana perofeta i aso nei—ma ua Ia faataunuuina a latou upu uma.22
O le [Atalii e] Toatasi o le Atua, na fanaua o Ia e le taupou o Maria, sa ia faatoilaloina le oti, togiola mo agasala a le lalolagi, ma aumaia le faaolataga i e ola ma e ua oti. O se Alii toetu, sa Ia taumafa i i’a ma le melikorio faatasi ma Aposetolo, ma sa ia valaaulia le motu o tagata i itu lalolagi uma e lua e tagotago i manu’a i Ona lima, o vae, ma ona itu ina ia latou iloa uma o Ia o le Atua o Isaraelu—o Ia o le Keriso soifua.
Na Ia tautino atu i tagata uma:
“O a’u nei o le toe tu ma le ola; o le faatuatua mai ia te au, e ui lava ina oti, a e ola lava ia:
“O tagata ola uma o e faatuatua mai ia te au, e le oti lava e oo i le faavavau.”23
O Ia o lo tatou Faitulafono ma le Faamasino, o le Togiola o le lalolagi. I Lona Afio Mai Faalua, “o lē i ai le malo i lona ua; e faaigoa foi o Ia o le Silisiliese, o le Faipule, o le Atua Malosi, O le Tama e Faavavau, O Le Alii o le Filemu.”24 Ou te molimau atu ai i le suafa sili ona paia o Iesu Keriso, amene.