O Le Auaunaga a Agelu
E le tuulafoaiina lava i tatou e le Atua, e le tuulafoaiina lava i tatou i luitau tatou te feagai.
Ina ua laa atu ma le naunautai ia Atamu ma Eva i le olaga faitino, sa la iloa o le lalolagi telesitila lenei o le a i ai laau tuitui ma laau talatala ma faafitauli o soo se ituaiga. Peitai, atonu ua la silafia o le luitau aupito sili ona faigata ia te i laua, e le o le faigata ma le matautia o le a la onosaia, ae o le iloa moni o le a vavamamao nei ma le Atua, o le a valavala ma Ia o le sa latou savavali ma talanoa faatasi, o le sa tuuina atu fautuaga a o latou faafesagai. Ina ua mavae lea filifiliga manino, e pei ona ta’ua i le tala o le foafoaga, “sa la lei vaai atu ia te ia; aua ua aveeseina i laua mai ona luma.”1 E ui i isi mea uma atonu na atugalu ai i laua, atonu o le mea lea sa sili ona popole ai i laua.
Ae na silafia e le Atua ia luitau o le a feagai ma i laua, ma sa Ia mautinoa foi lagona tuulafoaiina ma le atuatuvale o le a la faalogoina i nisi taimi. O lea sa Ia vaavaaia ai e le aunoa Lona aiga faaletino, sa faafofogaina e le aunoa a laua tatalo, ma auina atu perofeta (ma sosoo ai ma aposetolo) e aoao, apoapoai, ma tomatauina i laua. Peitai i taimi o manaoga faapitoa, sa Ia auina atu agelu, o avefeau faalelagi, e faamanuia Lana fanau, faamautinoa ia i latou e latalata mai lava le lagi i taimi uma, ma e faapena foi ona latalata mai e le aunoa Lana fesoasoani. E moni, e lei umi ona i ai Atamu ma Eva i le lalolagi tuufua ma le pagatia, ae afio ifo se agelu ia te i laua, 2 o le sa aoaoina i laua i le uiga o la laua taulaga ma le matafaioi togiola a le Togiola folafolaina o le a afio mai.
Ina ua lata mai le taimi e afio mai ai le Faaola, sa auina mai se agelu ia Maria o le a avea o ia ma tina o le Alo o le Atua.3 Ona tofia lea o se au agelu e pepese i le po na fanau mai ai le pepe o Iesu.4 E lei leva ona mavae lena, ae ta’u atu e se agelu ia Iosefa ua lamatia le pepe meamea, ma ua tatau ona sosola ma si ona aiga i Aikupito ina ia saogalemu.5 Ina ua saogalemu mo le toe foi mai, sa faaali atu e se agelu lena faamatalaga i le aiga, ona toe foi lea o le toatolu i le nuu o lo latou tofi.6
Mai lava i le amataga seia oo mai i le auga tisipenisione, sa faaaoga lava e le Atua ia agelu e fai ma Ana avefeau e faailoa mai ai Lona alofa ma le popolega mo Ana fanau. E le mafai i le taimi lea ou te lauga atu ai ona faia se suega faatopetope o tusitusiga paia po o lo tatou lava talafaasolopito o aso e gata ai, lea ua matua faatumulia i tala o agelu na auauna mai ia i latou i le fogaeleele, ae o se aoaoga faavae taua tele, ma e tele naua tala o galuega a agelu i le talafaasolopito.
E masani lava o na ituaiga o tagata e le vaaia. O nisi taimi e mafai. Ae pe vaaia pe le vaaia, e latalata mai lava i taimi uma. O nisi taimi, e matua malualii ma taua o latou tofiga mo le lalolagi atoa. O nisi taimi o savali e sili ona patino. E i ai taimi o le faamoemoega faaagelu o le lapatai. Ae o le tele lava o taimi o le faamafanafana, e tuuina mai sina gauai alofa, ma se tomatauga i taimi faigata. I le miti a Liae, ina ua i ai o ia i se nofoaga taufaafefe, “o se vao pouliuli ma le pogisa,” e pei ona ia faamatalaina, sa la feiloai ma se agelu, “o se tagata … sa ofu o ia i le ofu sinasina; … ua tautala mai ia te au,” fai mai Liae, “ma fetalai mai, ia ou mulimuli atu ia te ia.”7 Na mulimuli atu Liae ia te ia i le saogalemu ma mulimuli ane ai i le ala o le faaolataga.
I le gasologa o le olaga, o i tatou uma sa i ai taimi na tatou i ai i nofoaga “pouliuli ma le pogisa,” o togavao, o tulaga o le faanoanoa ma le atuatuvale po o le lotovaivai. Ua tumu lo tatou vaitaimi i le mafatiaga taatele ona o faaletonu tautupe, o faafitauli tau malosiaga, o osofaiga a le au faatupu faalavelave, ma mala faalenatura. Ua avea nei mea ma popolega faaletagata lava ia ma faaleaiga e le gata o fale e nonofo ai ma meaai e maua e aai ai ae o le saogalemu aiai foi ma le soifua sololelei o a tatou fanau ma valoaga i aso e gata ai e uiga i lo tatou paneta. A o le matuia e sili atu nai lo na mea—ma o nisi taimi e faatatau i ai—ua i ai mataupu o le faiifo o le tauagafau, amiomama, ma le faaleagaga ua vaaia i nuu tetele ma nuu laiti, i o tatou aiga ma fafo atu. Ae ou te molimau atu, o lea lava e auina mai agelu e fesoasoani ia te i tatou, e pei lava ona sa auina atu e fesoasoani ia Atamu ma Eva, e fesoasoani i perofeta, ma fesoasoani foi i le Faaola lava Ia o le lalolagi. O loo tusia e Mataio i lana evagelia, ina ua uma ona tofotofoina e Satani le Keriso i le vao “ona o mai ai lea o agelu ma auauna atu ia te ia.”8 E oo lava i le Alo o le Atua, o Ia foi o se Atua, na manaomia foi se faamafanafanaga faalelagi i le taimi na soifua ai o Ia i le olaga nei. O le mea la lea, o le a faaauau pea ona auauna mai agelu i e amiotonu seia oo i le iuga. E pei ona fai atu Mamona i lona atalii, o Moronae, o le e i ai se aso e avea ai ma agelu:
“Po ua iu ea le aso o vavega?
“Po ua le toe faaali ea agelu i le fanauga a tagata? Po ua taofia ea e ia le mana o le Agaga Paia mai ia te i latou? Pe faia ea e ia a o tumau tausaga, pe mautu le lalolagi, pe toe se tasi tagata i luga o le fogaeleele e faaolaina?
“Faauta, ou te fai atu ia te outou, E leai; aua … o le faatuatua ua faaali mai ai agelu ma auauna mai i tagata… .
“Aua faauta, ua pule [Keriso] ia te i latou, e auauna mai e tusa ma le upu a lana poloaiga, ua faaali mai i latou i e faatuatua malosi ma le tutumau o latou mafaufau i le amioatua uma lava.”9
Ou te tatalo atu ia i latou uma o faafofoga mai i lo’u leo, ia outou lototetele, ia faatumulia outou i le faatuatua, ma manatua na fetalai mai le Alii o le a Ia “tauina [a tatou] taua, o taua [a tatou] fanau, ma [taua] a fanau [a a tatou] fanau.”10 O le a se mea tatou te fai ina ia tatou agavaa ai mo lena puipuiga? E ao ina tatou “sailiili ma le filiga, ma tatalo e le aunoa, ma ia talitonu foi. [Ona] galulue faatasi ai lea o mea uma mo lo [tatou] lelei, pe afai [tatou te] savavali sa’o ma manatua le feagaiga na outou osia o le tasi ma le isi.”11 O aso e gata ai e le o se taimi e fefe ma gatete ai. O se taimi e talitonu ai ma manatua a tatou feagaiga.
Ua ou talanoa i i e uiga i le fesoasoani faalelagi, e uiga i agelu ua auina mai e faamanuia i tatou i le taimi e manaomia ai. Peitai, a tatou talanoa e uiga ia i latou o tufugaaao i le Atua, ua faamanatu mai ia te i tatou e le o agelu uma e mai le isi itu o le veli. O nisi o i latou tatou te savavali faatasi ma talanoa faatasi—iinei, i le taimi nei, [ma] aso uma lava. O nisi o i latou e nonofo i o tatou pitonuu. O nisi o i latou na fanauina i tatou, ma i lo’u lava tulaga, o se tasi o i latou lea na ioe ma te faaipoipo. E leai se taimi e sili ona lalata mai ai le lagi, nai lo le taimi tatou te vaaia ai le alofa o le Atua o faaalia i le agalelei ma le tuuto o tagata e ese le lelei ma matua mama, lea e na o le upu pei o se agelu e tau i ai le mafaufau. Na faaaoga e Elder James Dunn, mai lenei pulelaa i se taimi e lei mamao atu, lena upu i lana tatalo amata e faamatala ai le aufaipese a le Peraimeri—ae a faapefea? Faatasi ai ma le agaga, foliga, ma siufofoga o na tamaiti i o tatou mafaufau ma la tatou vaai, se’i ou faasoa atu ai se tala na faamatala e la’u uo ma se paaga i le BYU, le alii o Clyn D. Barrus, o le ua maliu. Ou te faia aua ua faatagaina mai e lona faletua, o Marilyn, ma lo latou aiga.
E faasino i lona olaga faatamaitiiti i se faatoaga tele i Idaho, sa ta’ua ai e Uso Barrus lana galuega faipo e faapotopoto ai povi i le taimi e tatau ai le susu. Talu ai ona e tataa povi i se lotoa e siosio e le Vaitafe e i ai taimi e matautia ai o le Teton, o le tulafono mautu i le aiga o Barrus, a oo i le vaitau lologa o le tautotogo, e sa ona o tamaiti e tuli mai ni povi ua sopoia le isi itu o le vaitafe. O taimi uma lava e tatau ona toe foi mai ai i latou e saili se fesoasoani mai se tagata matua.
I se tasi Aso Toonai ina ua faatoa mavae lona aso fanau lona fitu, sa folafola ane ai e matua o Uso Barrus i le aiga, o le a o e tifaga i le po pe a vave ona uma a latou feau. Peitai, ina ua taunuu atu Clyn i le pa povi, ua sopoia e povi sa ia sailia le vaitafe, e ui lava ua oo ina tatafe tele. Na ia iloa o le a faaletonu lona po e le lau maua e tifaga ai, ae sa tonu ia te ia o le a alu lava ia e sue mai povi, e ui lava ina tele taimi ua lapataia ai o ia ina ia aua lava nei faia.
A o faanatinati atu e le alii e fitu tausaga lana solofanua toeaina, o Pena, i le vaitafe malulu, aave, sa toetoe lava ina lilofia le ulu o le solofanua i le vai. E ono saogalemu se tagata matua o nofo i luga o le solofanua, ae o Uso Barrus i lona laitiiti, sa ufitia atoa o ia i le maualuga o le vai, sei vagana ai ua puna faafuasei i luma i nisi taimi le solofanua, ma ea a’e ai i luga le ulu o Clyn ma taumafai e manava.
O lea o le a ou toe faitauina atu upu a Barrus lava ia:
“Ina ua oo ina a’e atu Pena i le isi ituvai, sa ou iloa ai ua ou i ai i se tulaga matautia tele, ma e leaga tele le mea ua ou faia—sa ou le usitai ma lo’u iloa lelei i lo’u tama. Sa ou lagonaina, e na o lo’u aveina saogalemu lava o povi i le fale, e mafai ai ona laveaiina au. Atonu o le a faamagalo ai au e lo’u tama i lena taimi. Peitai ua pogisa, ma sa ou le iloa tonu foi po o fea lea ou te i ai. Sa lofituina au i le atuatuvale. Ua ou susu ma maalili, ua ou se ma ou fefe.
“Sa ou oso ifo i lalo mai ia Pena, faapau i le palapala i tafatafa o ona vae, ma amata ona ou tagi. I le va o a’u tagi masusu, sa ou taumafai e fai se tatalo, ma fai faafia i lo’u Tama i le Lagi, ‘Ua ou sese. Faamagalo mai au! Ua ou sese. Faamagalo mai au!’
“Sa umi se taimi o o’u tatalo. Ina ua ou mafai ona ou pupula ae i luga, sa ou vaaia i o’u loimata se tagata e ofu paepae o savali agai mai ia te au. I le pogisa, sa ou talitonu ai o se agelu na auina mai o se tali i a’u tatalo. Ou te lei migoi pe pao a o latalata mai le tagata, sa ou matua maofa i le mea sa ou vaaia. Mata e auina moni mai e le Alii se agelu ia te au, o le sa matua le usitai lava?
“Ona fai mai lea o se leo ou te masani ai, ‘Atalii, ua ou fiu e sue oe.’ Sa ou iloaina i le pogisa le leo o lo’u tama, ma sa ou tamoe atu i ona lima sa faaloloa mai. Sa ia opo mauina au, ona fai mai lemu lea, ‘Sa ou popole. Ua ou fiafia ua ou maua oe.’
“Sa ou taumafai e tau atu ia te ia ua ou salamo, ae na pau lava upu motumotu sa sau i o’u laugutu tetete—‘Faafetai … pogisa … fefe … vaitafe … na o au.’ Mulimuli ane i lena po, sa ou iloa ai ina ua ou le foi mai mai le pa povi, sa alu atu lo’u tama e sue au. Ina ua le maua au ma povi, sa ia iloaina ua ou sopoia le vaitafe ma ua ou i ai i se tulaga matautia. Talu ai ua pogisa, ma ua matua tatau lava ona sue au, o lea sa ia aveesea ai ona ofu ae tuu ai na o lona ofuvae mafanafana paepae, nonoa ona seevae i lona ua, ma aau atu loa i le vaitafe aave e laveai lona atalii le usitai.”12
Ou uso e ma tuafafine pele, ou te molimau atu e uiga i agelu, o agelu faalelagi ma agelu i la le tino. O le faia o lena, ou te molimau atu ai e le tuulafoaiina lava i tatou e le Atua, e le tuulafoaiina lava i tatou i luitau tatou te feagai. “Na te le tuulafoaiina lava a o tumau tausaga, pe mautu le lalolagi, pe toe se tane [po o se fafine po o se tamaitiiti] i luga o le fogaeleele e faaolaina.”13 E i ai taimi, pe lautele pe faaletagata, atonu tatou te lagona ai ua tatou vavamamao mai le Atua, tapunia faitotoa o le lagi mai ia i tatou, leiloloa, tuulafoaiina i nofoaga pouliuli ma le pogisa. E tele lava taimi e mafua le atuatuvale ona o a tatou lava mea e fai, ae tusa lava, o loo silasila mai pea ma fesoasoani mai le Tama o i tatou uma. Ma e i ai lava agelu i taimi uma e o mai ma siomia i tatou, e vaaia pe le vaaia foi, e iloa pe le iloa foi, i le tino po o le tino ola pea.
Talosia ia tatou matua talitonu uma i ai, ma sili atu lo tatou faafetai, mo le folafolaga a le Alii o loo i le mau e sili ona fiafia i ai Peresitene Monson: “Ou te muamua atu i o outou luma. Ou te i ai foi i lo outou itu taumatau ma lo outou itu tauagavale, … o lo’u Agaga o le a i ai i o outou [loto], e siomia foi outou e a’u agelu, e lagolagoina outou.”14 I le faagasologa o le tatalo atu ina ia auauna mai agelu ia i tatou, ia tatou taumafai uma lava ina ia avea atili i tatou e faapei o ni agelu—i se upu agalelei, o se lima e lagolagosua, se tautinoga o le faatuatua ma “le feagaiga lea ua [tatou] osi feagaiga ai.”15 Atonu ona mafai ai lea ona avea i tatou ma avefeau e auina mai e le Atua pe a i ai se isi, atonu o se tamaitiiti Peraimeri, e tagi ma faapea, “Pogisa … fefe … vaitafe … na o au.” Ou te tatalo ia faapena ona fai, i le suafa paia o Iesu Keriso, amene.