Tatalo e le Aunoa

Elder David A. Bednar

O Le Korama a Aposetolo e Toasefululua

E atili ona anoa le tatalo pe a tatou filifili ma le Atua i mea uma tatou te fai, pe a tatou faaali atu le agaga faafetai mai le taele o o tatou loto, ma a o tatou tatalo mo isi.

Ata

Elder David A. Bednar

O la’u savali i le konafesi aoao talu ai, sa taulai atu i le mataupu faavae o le talalelei o le ole atu i le faatuatua i le tatalo. O le aso, ou te fia talanoaina ni mataupu faavae faaopoopo se tolu e mafai ona fesoasoani ia atili anoa ai a tatou tatalo, ma ou te tatalo mo le fesoasoani a le Agaga Paia mo au faapea foi outou.

Mataupu faavae #1. E atili ona anoa le tatalo pe a tatou filifili ma le Alii i mea uma tatou te fai (tagai Alema 37:37).

I se faaupuga faigofie, o le tatalo o se fesootaiga i le Tama Faalelagi mai Ona atalii ma afafine i le fogaeleele. “O le taimi lava tatou te iloa ai le sootaga moni ma le Atua (e pei o le Atua o lo tatou Tama, ma o i tatou o lana fanau), ona avea loa lea o le tatalo o se natura ia i tatou” (Bible Dictionary, “Prayer,” 752). Ua poloaiina i tatou e tatalo e le aunoa i le Tama i le suafa o le Alo (tagai 3 Nifae 18:19–20). Ua folafola mai ia i tatou afai tatou te tatalo ma le faamaoni mo le mea e sa’o ma lelei ma e tusa ai ma le finagalo o le Atua, e mafai ona faamanuiaina i tatou, puipuia, ma tomatauina (tagai 3 Nifae 18:20; MFF 19:38).

O faaaliga o se fesootaiga mai le Tama Faalelagi i Lana fanau i le fogaeleele. A tatou ole atu i le faatuatua, e mafai ona tatou maua lea faaaliga ma lea faaaliga ma lea malamalama ma lea malamalama, ma iloa ai mealilo ma mea o le filemu lea e aumaia ai le olioli ma le ola faavavau (tagai MFF 42:61). O mealilo o mea ia e na o le mana o le Agaga Paia e iloa ma malamalama ai (tagai Harold B. Lee, Ye Are the Light of the World, [1974], 211).

O faaaliga mai le Tama ma le Alo e auala mai i le sui lona tolu o le Aiga Atua, le Agaga Paia lea. O le Agaga Paia o le molimau ma le avefeau mo le Tama ma le Alo.

O mamanu na faaaoga e le Atua i le foafoaina o le lalolagi, e aoga e fesoasoani tatou te malamalama ai i le auala e faaanoa ai le tatalo. I le mataupu lona tolu o le tusi a Mose, ua tatou iloa ai na foafoaina mea uma faaleagaga a o lei tino mai i luga o le fogaeleele.

“Ma o lenei faauta, ou te fai atu ia te oe, o talaaga ia o le lagi ma le lalolagi ina ua foafoaina i le aso na faia ai e Au le Alii le Atua, le lagi ma le lalolagi,

“Ma laau iti taitasi o le fanua a o lei i ai i le fogaeleele, ma laau afu taitasi o le fanua a o lei tutupu ae. Aua o Au, o le Alii le Atua, na ou foafoaina faaleagaga mea uma ua ou tautala atu ai, a o lei tutupu ae i latou faaletino i luga o le fogaeleele” (Mose 3:4–5).

Ua tatou iloa mai nei fuaiupu na muamua le foafoaga faaleagaga i le foafoaga faaletino. I se tulaga foi faapena, o le tatalo anoa i le taeao o se elemene taua i le foafoaga faaleagaga o aso taitasi—ma e muamua i le foafoaga faaletino po o le faataunuuina o feau ma galuega o le aso. E faapei lava ona sa fesootai le foafoaga faaletino i le foafoaga ma se faaauauina o le foafoaga faaleagaga, e faapena foi ona fesootai tatalo anoa o le taeao ma le afiafi o le tasi i le isi ma se faaauauina.

Manatu i le faataitaiga lea. Atonu e i ai ni mea i o tatou uiga, o amio, pe faatatau foi i lo tatou tuputupu ae faaleagaga e manaomia ai ona tatou talanoa ma lo tatou Tama Faalelagi i le tatalo i le taeao. A uma ona faailoa atu le faafetai mo faamanuiaga ua tatou maua, ona tatou ole atu lea mo le malamalama, taitaiga, ma le fesoasoani e fai ai mea e le mafai ona tatou faia i lo tatou lava malosi na o i tatou. Mo se faataitaiga, a tatou tatalo atonu tatou te:

Mafaufau i taimi na tatou soona tautala ai pe tautala ma le le tusa ai ia i latou e sili ona tatou alolofa i ai.
Faailoa atu ua tatou iloa lelei lava, ae tatou te le faatinoina i taimi uma e tusa ma mea ua tatou iloa.
Ta’u atu lo tatou salamo i o tatou vaivaiga ma le le lafoaia faamaoni o le tagata o le lalolagi.
Ia naunau e mamanu atili o tatou olaga i le Faaola.
Aioi atu mo se malosi sili atu e faia ai ma ia atili ai ona lelei.

O lena tatalo o se vaega autu lea o le sauniuniga faaleagaga mo lo tatou aso.

I le gasologa o le aso, tatou te teuina pea se tatalo i o tatou loto mo se fesoasoani ma se tomatauga faifai pea—e pei ona fautuaina mai e Alema: “Ia liliu atu ou manatu uma i le Atua” (Alema 37:36).

Tatou te matauina i le aso tonu lava lea e i ai taimi semanu tatou te soona tautala ai, ae e lei tupu; pe atonu na tauau ai tatou te feitai, ae e lei tupu foi. Tatou te iloatino lava le fesoasoani faalelagi ma le malosi, ma tatou faailoa atu ma le lotomaualalo i la tatou tatalo. Tusa foi pe i lena lava taimi ua iloa ai, tatou te ofo atu ai se tatalo le leoa o le agaga faafetai.

I le faaiuga o le aso, tatou te toe tootutuli ai ma toe lipoti atu i lo tatou Tama. Tatou te toe iloiloina mea na tutupu i le aso ma faailoa atu le faafetai mai le taele o o tatou loto mo faamanuiaga ma le fesoasoani sa tatou maua. Tatou te salamo, ma faatasi ai ma le fesoasoani mai o le Agaga o le Alii, faailoa ala e mafai ona tatou faia ina ia lelei atili ai taeao. O lea, o la tatou tatalo i le afiafi e faavae i luga o la tatou tatalo i le taeao ma faaauau ai. O la tatou tatalo foi i le afiafi, o se sauniuniga lea mo se tatalo anoa i le taeao.

O tatalo i le taeao ma le afiafi—ma tatalo uma i le va—e le o ni mea tumaoti, pe le feaiaa’i; ae e fesootai faatasi i aso taitasi ma aso uma, vaiaso, masina, ma tausaga. O se vaega lea tatou te faataunuuina ai le apoapoaiga faaletusi paia “ia tatalo e le aunoa” (Luka ke 21:36; 3 Nifae 18:15, 18; MFF 31:12). O na tatalo anoa o ni vaega taua ia e maua mai ai faamanuiaga aupito maualuluga o loo taofia e le Atua mo Lana fanau faamaoni.

E anoa le tatalo pe a tatou manatua lo tatou sootaga i le Atua ma gauai atu i le apoapoaiga:

“Ia e tagi atu foi i le Atua ina ia fesoasoani o ia ia te oe i mea uma, ioe, ia faia au mea uma ona o le Atua; o mea uma e te alu i ai, ia alu i ai ona o le Atua; ia liliu atu ou manatu uma i le Atua, ioe, ia e tuuina e faavavau le alofa o lou loto i le Atua.

“Ia oulua filifili ma le Atua i mea uma e te faia, na te faatonu foi ia te oe i mea lelei. Ioe, pe a e taoto i le po, ia taoto ona o le Atua, ina ia leoleo o ia ia te oe i lou moe. Pe a e ala i le taeao, ia tumu lou loto i le faafetai i le Atua. Afai foi e te faia ia mea, e faaeaina oe i le aso gataaga” (Alema 37:36–37; faatusilima mea e faamamafa).

Mataupu faavae #2. E atili ona anoa le tatalo pe a tatou faaali atu le faafetai mai le taele o o tatou loto.

I le taimi o la matou galuega i le Iunivesite o Polika Iaga–Idaho, e tele lava ina ma talimalo ma Sister Bednar i le Au Pulega Aoao i lo matou fale. Sa aoaoina e lo matou aiga se lesona taua e uiga i le tatalo anoa, a o matou tootutuli i se tasi afiafi ma se uso o le Korama a Aposetolo e Toasefululua.

I le taeao o lena aso, sa ta’u mai ai ia i ma’ua ma Sister Bednar le maliu faafuasei o se ma uo pele, ma o lo ma manao na vave ona oo mai o le tatalo lea mo lona toalua ma le fanau. Ina ua ou tofia lo’u toalua e faia le tatalo, sa fautuaina Sister Bednar ma le faaaloalo e le sui o le Toasefululua, o le na te le i silafia le faalavelave, ia tau lava o le faafetai atu i le tatalo mo faamanuiaga ua maua ae aua nei ole atu i se mea. E tai faapena foi le aoaoga a Alema i tagata o le Ekalesia anamua “ia tatalo e le aunoa, ma ia avae le faafetai ona o mea uma” (Mosaea 26:39). Ona o le faalavelave faafuasei, sa foliga mai ia i ma’ua o le talosagaina o faamanuiaga mo a ma’ua uo, e sili atu ona manaomia vave nai lo le ta’u atu o le faafetai.

Sa tali atu ma le faatuatua ia Sister Bednar i le faatonuga na ia maua. Sa faafetai atu o ia i le Tama Faalelagi mo aafiaga anoa e manatua pea faatasi ma lenei uo pele. Sa ia ta’u atu le agaga faafetai faamaoni mo le Agaga Paia o ia o le Faamafanafana, ma mo meaalofa a le Agaga ua mafai ai ona matou feagai ma le faigata ma auauna atu ai i isi. O le mea e aupito sili ona taua, sa ia faaalia le agaga talisapaia mo le ata o le faaolataga, mo le taulaga togiola a Iesu Keriso, mo Lona Toetu, ma mo sauniga ma feagaiga o le talalelei toefuataiina ua mafai ai ona faatasia aiga e faavavau.

Sa aoaoina e lo matou aiga mai lena aafiaga se lesona tele e uiga i le mana o le agaga faafetai i se tatalo anoa. Talu ai ma ala mai i le tatalo, sa faamanuiaina lo matou aiga i le musumusuga i ni faafitauli sa mamafa mai i o matou mafaufau, ma faalavelave i o matou loto. Sa matou aoaoina ai, o lo tatou agaga faafetai mo le fuafuaga o le fiafia ma mo le misiona a le Faaola mo le faaolataga, ua maua ai le faamautinoaga manaomia ma faamalosia ai lo matou talitonuga o le a lelei mea uma mo a matou uo pele. Sa matou mauaina foi se malamalamaaga e faatatau i mea e ao ina matou tatalo ai, ma ole faalelei atu ai i le faatuatua.

O tatalo e aupito anoa ma faaleagaga ua ou iloa, e aofia ai le tele o le ta’u atu o le faafetai ae itiiti ni talosaga pe afai e i ai. Ina ua faamanuiaina au matou te tatalo faatasi ma aposetolo ma perofeta, ua ou iloa ai i nei taitai i ona po nei o le Ekalesia a le Faaola, uiga lava e tasi o loo faamatalaina ai le Taitaiau o Moronae i le Tusi a Mamona: o nei tamalii ua malena a’e o latou loto i le faamanu i le Atua mo le anoanoai o avanoa ma faamanuiaga ua Ia faaee atu i Ona tagata (tagai Alema 48:12). E le gata i lea, ua latou le taututu i upu e tele, aua ua tuuina atu ia te i latou mea e tatau ona tatalo atu ai, ma ua tutumu i latou i le naunau atu ia te Ia (tagai 3 Nifae 19:24). O tatalo a perofeta e faapei lava o tamaiti i lo latou faigofie ae mamana ona o lo latou faamaoni a’ia’i.

A o tatou taumafai e fai ia anoa atili a tatou tatalo, e ao ina tatou manatua “e leai se mea e faia e tagata e tausuai ai le Atua, pe faatupuina ai lona toasa i nisi, tau lava o e le ta’utino atu e i ai lana pule i mea uma, ma lē usiusitai i ana poloaiga” (MFF 59:21). Ou te fia fautuaina atu ia mai lea taimi i lea taimi, ia ofoina atu e oe ma au se tatalo e avatu ai lava na o le faamanu ma faaali atu ai le agaga faafetai. Aua lava nei ole atu mo se mea; ae ia tau lava ina vivii a’e o tatou agaga ma taumafai e ta’u atu le agaga talisapaia ma le malosi uma o o tatou loto.

Mataupu faavae #3. E atili ona anoa le tatalo pe a tatou tatalo ma le naunau moni ma se loto faamaoni mo isi.

O le aioi atu i le Tama Faalelagi mo faamanuiaga tatou te mananao ai i o tatou olaga patino, e lelei ma o le mea tatau. E ui i lea, o le tatalo ma le faamaoni mo isi, mo i latou tatou te alolofa i ai ma i latou e agaleaga mai ia te i tatou, o se elemene taua foi o le tatalo anoa. E pei lava o le faatele ona faaali atu o le agaga faafetai ia tatou tatalo e faatupulaia ai le alata’i mo faaaliga, e faapena foi le tatalo mo isi faatasi ai ma le malosi uma o o tatou agaga, e faateleina ai lo tatou malosi e lagona ai ma gauai atu i le siufofoga o le Alii.

Ua tatou aoaoina se lesona taua mai le faataitaiga a Liae i le Tusi a Mamona. Sa tali atu Liae i le faatuatua i se faatonuga ma se lapataiga faaperofeta e faatatau i le faatafunaga o Ierusalema. Ona ia tatalo atu lea i le Alii “ma lona loto atoa, mo lona nuu” (1 Nifae 1:5; ua faaopoopo le faamamafa). I le tali atu i lenei tatalo faatauanau, na faamanuiaina ai Liae i se faaaliga mamalu o le Atua ma Lona Alo ma le faatafunaga o loo loma o Ierusalema (tagai 1 Nifae 1:6–9, 13, 18). O le taunuuga, na olioli Liae ma sa faatumulia lona loto atoa ona o mea sa faaali e le Alii ia te ia (tagai 1 Nifae 1:15). Faamolemole ia manatua, na oo mai le faaaliga o se tali i se tatalo mo isi, ae le o se taunuuga o se talosaga mo se faagaeetia faaletagata lava ia po o se taitaiga.

O le Faaola o le faataitaiga atoatoa o le tatalo faatasi ai ma le naunautaiga moni mo isi. I Lana Tatalo maoae o le Faatoga lea na fofogaina i le po a o loma Lona Faasatauroga, na tatalo ai Iesu mo Ana Aposetolo ma le Au Paia uma.

“Ou te tatalo mo i latou: ou te le tatalo mo le lalolagi, a o i latou ua e foaiina mai ia te au, aua o ou tagata lava i latou… .

“E le faapito la’u tatalo mo i latou nei, a o i latou foi e faatuatua ia te au ona o la latou upu; …

“ … Ia i totonu ia te i latou le alofa ua e alofa mai ai ia te au, o au foi i totonu ia te i latou” (Ioane 17:9, 20, 26).

I le taimi o le galuega auauna a le Faaola i le konetineta o Amerika, sa Ia faatonuina ai tagata ina ia mafaufau loloto i Ana aoaoga ma ia tatalo mo le malamalama. Sa Ia faamalolo i e mamai, ma sa Ia tatalo foi mo tagata e faaaogaina le gagana e le mafai ona tusia (tagai 3 Nifae 17:1–16). Sa maoae le aafiaga o Lana tatalo: “E le mafai ona ofi i le manatu o se tagata le olioli na tumu ai o matou loto i lena aso na matou faalogo ai i lana tatalo i le Tama mo i matou” (3 Nifae 17:17). Manatu la pe o le a se mea e oo i ai pe a na tatou faalogo i le Faaola o le lalolagi o tatalo mo i tatou.

Pe mata e faapena foi i o tatou taitoalua, o fanau, ma isi tagata o le aiga ona lagonaina le mana o a tatou tatalo i le Tama mo o latou manaoga ma naunauga patino? Pe faalogo i latou o e tatou te tautuaina o tatou tatalo mo i latou i le faatuatua ma le loto faamaoni? Afai e lei faalogo i latou tatou te alolofa i ai ma tautuaina, ma lagonaina le uunaiga a a tatou tatalo faatauanau mo i latou, o lona uiga o le taimi lenei e salamo ai. A tatou faaaoao i le faataitaiga a le Faaola, o le a atili ai ona anoa moni a tatou tatalo.

Ua poloaiina i tatou ina “ia tatalo e le aunoa” (2 Nifae 32:9; MFF 10:5; 90:24)—“ma le leo faapea foi i [o tatou loto]; … i luma o le lalolagi, faapea foi i le mea lilo, i luma o tagata, faapea foi i le na o oe” (MFF 19:28). Ou te tautino atu e atili ona anoa le tatalo pe a tatou filifili ma le Atua i mea uma tatou te fai, pe a tatou faaali atu le agaga faafetai mai le taele o o tatou loto, ma a o tatou tatalo mo isi ma le naunau moni ma se loto faamaoni a’ia’i.

Ou te molimau atu o loo soifua le Tama Faalelagi, ma e faafofogaina e Ia ma tali mai i tatalo faatauanau uma. O Iesu o le Keriso, o lo tatou Faaola ma le Puluvaga. E moni lava faaaliga. Ua toefuatai mai le atoaga o le talalelei i le fogaeleele i lenei tisipenisione. Ou te molimau atu ai i le suafa paia o le Alii o Iesu Keriso, amene.