Seia Tatou Toe Feiloai
Ia avea i tatou ma tagatanuu lelei o malo o loo tatou nonofo ai, ma ni tuaoi lelei i o tatou nuu ma alalafaga, ia aapa atu ia i latou o isi faatuatuaga faapea foi ma o tatou lava tagata.
Uso e ma tuafafine, ou te iloa o le a outou ioe faatasi ma au o se konafesi ua aupito sili ona musuia lenei. Sa matua tele naua le Agaga o le Alii na tatou lagonaina i nei aso e lua, a o ootia o tatou loto ma faamalolosia a tatou molimau i lenei galuega paia. Ou te mautinoa ua avea au ma sui o tagata auai o le Ekalesia i soo se mea, e momoli atu le agaga talisapaia i le usoga ma tuafafine o e sa laugaina i tatou. Ua faamanatu mai ai ia te au upu a Moronae o loo maua i le Tusi a Mamona: “Ua faia foi a latou lotu e le ekalesia e tusa ma le galuega a le Agaga ma le mana o le Agaga Paia; aua e pei ona taitaiina i latou i le mana o le Agaga Paia e lauga atu, pe apoapoai atu, pe tatalo, pe aioi atu, pe pese, ua faapea lava ona faia.”1
Ia tatou saga manatua pea mea sa tatou faafofoga ma faalogologo i ai i lenei konafesi aoao. O savali sa tuuina mai, o le a lolomiina i mekasini o le Ensign ma le Liahona i le masina a sau. Ou te fautuaina outou ina ia suesue i ai ma mafaufau loloto ia latou aoaoga.
Ia te outou le Usoga, o e ua faamalolo i lenei konafesi, e momoli atu la matou faafetai tele mai le taele o o matou loto mo le tele o tausaga o la outou tautua tuuto. Ua faamanuiaina le faitau aofai atoa o le Ekalesia mai o outou sao e le mafaitaulia.
Ou te tautino atu o loo silafia e lo tatou Tama Faalelagi luitau o loo tatou feagai i le lalolagi i le taimi nei. E alofa o Ia ia i tatou uma taitoatasi, ma o le a faamanuiaina i tatou a o tatou taumafai e tausi Ana poloaiga ma saili atu ia te Ia e ala i le tatalo.
O i tatou o se ekalesia ua soo ai le lalolagi, uso e ma tuafafine. Ua i ai o tatou tagata auai i le lalolagi atoa. Ia avea i tatou ma tagatanuu lelei o malo o loo tatou nonofo ai, ma ni tuaoi lelei i o tatou nuu ma alalafaga, ia aapa atu ia i latou o isi faatuatuaga faapea foi ma o tatou lava tagata. Ia avea i tatou ma tamalii ma tamaitai o le faamaoni ma le amiosa’o i mea uma tatou te fai.
O loo i ai i latou i le lalolagi o loo fia aai; o loo i ai i latou e matitiva. O le galulue faatasi, e mafai ai ona tatou faaitiitia le mafatia ma foai atu mo i latou o loo manaomia le fesoasoani. E faaopoopo atu i le tautua o loo tuuina atu e le tasi i le isi, o a outou saofaga i tupe a le Ekalesia e mafai ai ona tatou tali vave atu pe a tulai mai mala ma mafatiaga i soo se itu o le lalolagi. Toeitiiti lava o taimi uma o i tatou tagata e muamua i le nofoaga e tuuina atu ai po o le a lava le fesoasoani tatou te mafaia. Matou te faafetai atu i lo outou lima foai.
O loo i ai isi faigata i olaga o nisi. Aemaise lava o le autalavou, ua i ai nisi ua aafia matuia i mea e pei o fualaau faasaina, o le ola le mama, o taaga ma le mau faafitauli e aumai faatasi ai. E le gata i lea, o loo i ai i latou ua tuulafoaiina, e aofia ai fafine ua oti a latou tane, ma tane ua oti a latou ava, o e o loo moomoo mo le mafutaga ma ia amanaiaina e isi. Ia tatou manatua manaoga o i latou o loo siomia ai i tatou, ma ia sauniuni e ofoina atu se lima fesoasoani ma se loto e alofa.
Uso e ma tuafafine, oka se faamanuiaina o i tatou ona o loo tatala mai le lagi, ua i ai foi le Ekalesia toefuataiina a Iesu Keriso i le fogaeleele i nei aso, ma ua faavae le Ekalesia i luga o le papa o faaaliga. Ua tatou iloa, o faaaliga faifai pea o le toto ola lea o le talalelei a Iesu Keriso.
Ia tofu taliu atu i tatou uma taitoatasi ma le saogalemu i o tatou fale. Ia tatou ola faatasi i le filemu ma le sologa lelei ma le alofa. Ia tatou taumafai i aso taitasi e mulimuli i le faataitaiga a le Faaola.
Ia faamanuia le Atua ia te outou, o’u uso e ma tuafafine. Ou te faafetai atu mo a outou tatalo mo au, faapea foi ma le Au Pulega Aoao. Matou te matua faafetai tele atu lava ia te outou.
I se tasi o tala faatino a Christopher Marlowe, The Tragical History of Dr. Faustus, O loo faaali mai ai se tagata, o Dr. Faustus, o le sa filifili na te le amanaiaina le Atua ae mulimuli atu i le ala o Satani. I le iuga o lona olaga leaga, ma ina ua fetaiai ma le faanoanoa ona o avanoa ua le maua ma ua mautinoa o le a oo mai le faasalaga, sa ia tagiaue ai, “O le faaaunuua e faavavau mai le Atua, [ua i ai] se mafatiaga e sili atu ona tiga nai lo le afi [mumusaesae] o seoli.”2
Ou uso e ma tuafafine, pei lava ona aupito tiga le mafatia o le faaaunuua e faavavau mai le Atua, e faapena foi ona aupito pele la tatou sini o le ola faavavau i le afioaga o le Atua.
Faatasi ai ma lo’u loto ma le agaga atoa, ou te tatalo ina ia tatou tutumau i le faapalepale i le tulitulimatagauina o lenei taui aupito sili ona taua.
Ou te molimau atu e moni lenei galuega, o loo soifua lo tatou Faaola ma o loo Ia taialaina ma tomatau Lana Ekalesia i luga o le fogaeleele. Ou te faatofa atu, o’u uso e ma tuafafine, seia tatou toe feiloai i le isi ono masina. I le suafa o Iesu le Nasareta, lo tatou Togiola o lē o loo tatou auauna i ai, amene.