Ua Lava Mea Ua E Iloa
I le avea ai ma soo o le Alii o Iesu Keriso, ua i ai ni a tatou faatanoa tetele faaleagaga o le malamalama ma le upumoni ua faaavanoaina mo i tatou… . I o tatou aso faigata, tatou te filifilia le ala o le faatuatua.
Ou te olioli faatasi ma outou i le avea ai o ni tagata O Le Ekalesia a Iesu Keriso o le Au Paia o Aso e Gata Ai. A o fofogaina mai e Peresitene Monson le tala fou fiafia o ni malumalu fou se lima, sa ou mafaufau ai i le salafa o le lalolagi, i konetineta uma lava, i aai tetele ma i alalafaga laiti, o i tatou o se aiga toatele o e ua talitonu. Ua tatou amatalia faatasi la tatou malaga e agai atu i le ola e faavavau. O le malaga o malaga. Tatou te agai i luma ma tauaveina i o tatou luga “le suafa o Iesu Keriso, ua “mafuli o tatou manatu e auauna atu ia te ia e oo i le gataaga.”1
E ui lava ina tele aafiaga e pei o lenei aafiaga i le aso, e tumu i le mana faaleagaga ma le faamautinoaga, ae e i ai foi aso tatou te lagona ai le le agavaa ma le le saunia, pe a oo mai le masalosalo ma le le mautonu i o tatou loto, pe a oo ina faigata ona maua o tatou malosiaga faaleagaga. O se vaega o lo tatou manumalo i le avea ai o ni soo o Keriso, o mea ia tatou te faia pe a oo mai nei lagona.
Ua toeitiiti 40 tausaga talu ai, a o ou mafaufau i le luitau o se misiona, na ou lagona lava lou matuai le agavaa ma le le saunia. Ou te manatua na ou tatalo, “Le Tama Faalelagi e, e mafai faapefea ona ou faia se misiona ae e matua itiiti se mea ua ou iloa?” Na ou talitonu i le Ekalesia, ae na ou lagonaina na matuai le lava lou malamalama faaleagaga. A o ou tatalo, na oo mai se lagona: “E te le iloaina mea uma, ae ua lava mea ua e iloa!” O lena faamautinoaga na ou maua ai le lototele e fai le isi laasaga e agai atu i le misiona.
O la tatou malaga faaleagaga o se faagasologa o le olaga atoa. Tatou te le iloa mea uma i le amataga pe o le aluga foi o le olaga. O lo tatou liua e oo mai i lea laasaga ma lea laasaga, i lea mataupu ma lea mataupu. E muamua ona tatou fausia se faavae o le faatuatua i le Alii o Iesu Keriso. Tatou te faatauaina mataupu faavae ma sauniga o le salamo, papatisoga, ma le mauaina o le meaalofa o le Agaga Paia. Tatou te faaaofiaina ai se tautinoga faifai pea o le tatalo, o se naunau ina ia usiusitai, ma se molimau faifai pea o le Tusi a Mamona. (O Le Tusi a Mamona o se meaai mamana faaleagaga.)
Ona tatou tumau ai lea ma le mausali ma le onosai a o tatou faagasolo i le olaga faaletino. E i ai taimi, e oo mai ai le tali a le Alii, “E te le iloa mea uma, ae ua lava mea ua e iloa”—ua lava e tausi ai poloaiga ma fai ai le mea sao. Manatua upu a Nifae: “Ua ou iloa e alofa o Ia i ana fanau; a e ui i lea, ou te le iloa le uiga o mea uma.”2
Sa ou asiasi i se tasi taimi i se misiona i Europa i saute. Na ou taunuu atu i le aso na sauni ai se faifeautalai fou e toe foi atu i fale ona o lona lava manao. Sa ia te ia lana pepa malaga e tuuvaa ai i le aso e sosoo ai.
Na ma saofafai faatasi ma ia i le fale o le peresitene o le misiona. Na faamatala mai e le faifeautalai ia te au ona lagona e uiga i le luitauina o lona olaga tuputupu ae o se tamaitiiti, o le faigata ona aoao, o le nofo ai i lea aiga ma lea aiga. Sa talanoa mai o ia ma le faamaoni i lona le mafai lea ona aoaoina se gagana fou. Ona ia faaopoopo mai lea, “Uso Andersen, ou te le iloa foi pe alofa le Atua ia te au.” A o ia faia mai na upu, na ou lagonaina se lagona mautinoa ma le malosi na oo mai i lo’u agaga: “O loo ia iloa lava ou te alofa ia te ia. O loo ia iloaina.”
Na ou tuu atu ia te ia e faaauau pea mo ni nai isi minute, ona ou faapea atu lea, “Elder, ua ou malamalama i le tele o mea ua e fai mai ai, ae e tasi le mea e tatau ona ou faasa’o atu ia te oe: ua e iloa e alofa le Atua ia te oe. Ua e iloa e alofa o Ia.”
A o ou tauina atu na upu ia te ia, o lea lava Agaga e tasi na saunoa mai ia te au na saunoa atu foi ia te ia. Na punou lona ulu ma amata ona tagi, Sa faatoese mai. “Uso Andersen,” o lana tala mai lea, “O loo ou iloa e alofa le Atua ia te au, o loo ou iloa lava.” Na te le’i iloa mea uma ae na lava mea na ia iloaina. Na ia iloa e alofa le Atua ia te ia. O lena fasi malamalama faaleagaga tautele na lava lea e suitulaga ai le faatuatua i lona masalosalo. Na ia maua le malosiaga e nofo ai i lana misiona.
Uso e ma tuafafine, e tofu i tatou taitoatasi ma taimi o le mana faaleagaga, o taimi o musumusuga ma faaaliga. E tatau ona tatou faagotoina ifo i o tatou agaga. A o tatou faia, ua tatou saunia ai o tatou faleteuoloa faaleagaga mo taimi o faigata faaletagata lava ia. Na fetalai Iesu, “Tuu lenei mea i o outou loto, ina ia outou faia mea o le a ou aoao atu, ma poloaiina ai outou.”3
O ni nai tausaga ua mavae na maliu ai se afafine talavou o sa’u uo i se faalavelave matuia lava. Na nutimomoia faamoemoega ma moomooga. Na lagona e la’u uo se faanoanoa le magafatia. Na amata ona ia fesiligia mea na aoaoina ai o ia. Na tusi mai e le tina o lau uo se tusi ia te au ma talosagaina pe mafai ona ou tuuina atu ia te ia se faamanuiaga. A o tuu ou lima i luga o lona ulu, o le uunaiga na oo mai ia te au o le: O le faatuatua e le gata o se lagona; ae o se filifiliga. E moomia ona ia filifilia le faatuatua.
Sa lei iloa e la’u uo mea uma, ae na lava mea na ia iloaina. Na ia filifilia le ala o le faatuatua ma le usiusitai. Na alu ifo o ia i ona tulivae. Na toe foi mai ia te ia lona tulaga paleni faaleagaga.
Ua tele ni tausaga talu ona tupu lena mea. O se taimi e lei mamao atu, na ou maua ai se tusi mai lona atalii o loo auauna nei faamisiona. Na tumu i tautinoga ma molimau. A o ou faitauina lenei tusi matagofie, na ou vaaia ai le faamanuiaina tele o le augatupulaga na sosoo ai i le filifilia e se tama o le faatuatua i se taimi na sili ona faigata.
O luitau, faigata, fesili, ma masalosaloga—o vaega nei o lo tatou olaga i le tino. Ae e le o tuulafoaiina i tatou. I le avea ai ma soo o le Alii o Iesu Keriso, ua i ai ni a tatou faatanoa tetele faaleagaga o le malamalama ma le upumoni ua faaavanoaina mo i tatou. E le mafai ona o mai faatasi le matau ma le faatuatua i le taimi lava e tasi i totonu o o tatou loto. Na fetalai Iesu, “Aua e te mata’u, tau lava ina e faatuatua.”4
O le aluga o tausaga tatou te laasia faafia ai nei laasaga taua faaleagaga. E amata ona tatou iloa ai “o le talia foi le malamalama, ma tumau pea i le Atua, e faateleina atu i ai le malamalama, ma e tuputupu pea le pupula o lea malamalama seia oo mai le aso atoatoa ona lelei.”5 E taliina a tatou fesili ma masalosaloga pe tuuitiitia foi le faapopoleina ia i tatou. O o tatou faatuatua e faatauvaa ma mama. Tatou te iloa ai mea ua uma ona tatou iloa.
Na fetalai Iesu, “A le liua outou … ia pei o tamaiti, tou te le sao lava i le malo o le lagi.”6
O Hadley Peay ua fitu nei ona tausaga. Na fanau mai Hadley ma se faaletonu tuga lava i lana faalogo lea na manaomia ai se taotoga tele lava ina ia lagona ai e ia se mea tusa lava pe itiiti. Na mulimulitai ai lava ona matua e aunoa ma le faavaivai e fesoasoani ia te ia, ia iloa tautala. Na faamasani ma le fiafia ia Hadley ma lona aiga i luitau o lona logonoa.
I se tasi taimi, ina ua fa tausaga o Hadley, na la tutu ai ma lona tina i le laina e totogi ai faatau i se faleoloa. Na tilotilo atu o ia i tua ma vaaia ai se tamaitiiti laitiiti o saofai i se nofoa faataavalevale. Na ia matauina o le tamaitiiti e leai ni ona vae.
E ui lava ina sa iloa e Hadley tautala, ae sa faigata ona ia taulimaina le maualuga o lona leo. I lona leotele teisi ae, sa fesili atu ai o ia i lona tina pe aisea ua leai ai ni vae o le tamaitiiti.
Na faamalamalama atu e lona tina i se leo lemu ma le faigofie ia Hadley e faapea “Na faia e le Tama Faalelagi ia Ana fanau uma ia eseese.” “Ua lelei,” na tali ane ai Hadley.
Na faafuasei lava ona faliu atu Hadley i le tamaitiiti ma fai atu i ai, “E te iloa ina ua faia au e le Tama Faalelagi, na le mafai ona ou faalogo? O lena mea ua faapitoa ai lava au. Na Ia faia oe e aunoa ma ni ou vae, ma o lena mea ua faapitoa ai lava oe. A afio mai Iesu, o le a mafai ona ou faalogo ma o le a mafai ona i ai ni ou vae. O le a faaleleia e Iesu mea uma.”
“A le liua outou … ia pei o tamaiti, tou te le sao lava i le malo o le lagi.”
Na lava mea na iloa e Hadley.
O Iesu o le Keriso. Ua toetu o Ia. O Ia o lo tatou Faaola ma le Togiola. E ala mai i le Perofeta o Iosefa Samita, na toefuataiina mai ai Lana perisitua i luga o le fogaeleele, ma o Lana perofeta i aso nei o Peresitene Thomas S. Monson. Ou te molimau atu ai i le suafa o Iesu Keriso, amene.