E Fusia o Tatou Loto ia Tasi
E mafai e le Au Paia ona faataunuu soo se faamoemoega o le Alii pe a tasi atoatoa i le amiotonu.
Ou uso e ma tuafafine pele, o se fiafiaga le faapotopoto faatasi ai ma outou i lenei taeao o le Sapati. O lo o tatou ola i le tele o tulaga eseese. O le a tatou o mai i le malo o le Atua mai malo uma ma le tele o aganuu eseese. Ma o le a faatelea’iina le faapotopotoina na valoia.
Ua tatou vaaia le faateleina o feeseeseaiga i le va o tagata i le lalolagi o siomia ai i tatou. O na fevaevaeaiga ma eseesega e mafai ona tatou aafia ai. O le pogai lena o la’u savali o le faamoemoe i le aso, o le a oo mai se aso sili o le tuufaatasia. O le a toe afio mai le Alii, o Ieova, e nonofo ma i latou o e ua avea ma Ona nuu ma o le a latou aufaatasi, i le tasi o le loto, e tasi ma Ia ma lo tatou Tama Faalelagi.
Ua sili atu ma le tasi ona outou faafofoga i lena savali mai ia te au e uiga i le lotogatasi. E masalo foi o le a ou toe tautalagia i le lumanai. Sa ou faalogo i ai i lou olaga atoa mai perofeta uma a le Atua. O se augani mo le lotogatasi o le savali mulimuli lea ou te manatuaina mai ia Peresitene Tavita O. MaKei. Ua le aunoa ona valaau mai perofeta a le Alii ia lotogatasi. O le manaomia ona tuuina mai o lena meaalofa ia i tatou ma le luitau o le faatumauina o le a faateteleina ona manaomia i aso o loo lumanai, lea o le a tatou saunia ai o se nuu mo lo tatou faasinomaga mamalu.
O la’u savali e faapea, ia sili atu i tatou. O loo talosagaina e tama ma tina le lotogatasi i o latou aiga, ma ua taliina mai na talosaga. O loo tatalo faatasi aiga i le po ma le ao. Sa valaaulia au ina ia matou failotu faatasi ma se aiga a o avea au ma se malo asiasi atu i lo latou aiga. Na talosagaina le tamaitiiti aupito laitiiti na te faia le tatalo. Sa tatalo o ia e pei o se peteriaka mo tagata uma o le aiga, sa ta’uina uma o latou igoa. Na pupula ou mata mo sina taimi e autilo i foliga o isi tamaiti ma matua. Sa ou vaaia ai, sa tuu faatasi atu o latou faatuatua ma o latou loto i le tatalo a lena tamaitiiti laitiiti.
Sa tatalo faatasi talu ai nei nisi o tuafafine o le Aualofa a o latou sauni e asiasi atu mo le taimi muamua i se tina talavou o le na maliu faafuasei lana tane. Sa latou fia iloa se mea e fai ma se auala foi e galulue faatasi ai e fesoasoani e saunia le fale mo aiga ma uo o le a malaga mai i le taimi o le maliu. Sa latou fia iloa po o a ni upu faamafanafana e mafai ona latou saunoa atu ai mo le Alii. Na oo mai se tali i a latou tatalo. Ina ua latou taunuu atu i le fale, sa gaoioi loa ia tuafafine taitoatasi e fai le galuega. Na vave lava ona saunia le fale, ma sa faanoanoa foi nisi tuafafine ona o le le mafai ona faia nisi mea se tele. O upu faamafanafana sa tuuina atu sa talafeagai lelei lava. Sa latou tuuina atu le auaunaga a le Alii i le lotogatasi, o loto na fusia faatasi.
Ua outou silafia ni faamaoniga, pei ona ou vaaia, o loo tatou agai i luma i le avea ma e tasi. Ua tuuina mai ia i tatou le vavega o le lotogatasi, a o tatou tatalo ma galulue i ai i le ala a le Alii. O le a fusia faatasi o tatou loto i le lotogatasi. Ua folafola mai e le Atua lena faamanuiaga i Lana Au Paia faamaoni, e tusa lava pe o a eseesega i atunuu e o mai ai ma po o a foi feeseeseaiga o siomia ai i latou. Sa tatalo foi o Ia mo i tatou faapea ma Ona soo ina ua Ia ole atu i Lona Tama ina ia tasi i tatou.1
O le mafuaaga tatou te tatalo ai ma ole atu mo lena faamanuiaga, o le mafuaaga foi lea ua tuuina mai ai e le Tama. Ua tatou iloa mai aafiaga o le olioli e oo mai pe a faamanuiaina i tatou i le lotogatasi. Tatou te momoo o ni fanau agaga a lo tatou Tama Faalelagi mo lena olioli lea sa tatou mauaina faatasi ma Ia i le olaga na muamua atu i lo lenei. O Lona finagalo ia tuuina mai ia i tatou lena moomooga paia mo le lotogatasi ona o le alofa ia i tatou.
E le mafai ona Ia tuuina mai ia i tatou o ni tagata taitoatasi. O le olioli o le lotogatasi ua Ia matuai finagalo e tuuina mai ia i tatou, e lē ‘au toatasi. E ao ina tatou sailia ma agavaa i ai faatasi ma isi. E le o se tulaga la e faateia ai, le uunaia o i tatou e le Atua e faapotopoto ina ia Ona faamanuiaina i tatou. Ua Ia finagalo ia tatou faapotopoto i aiga. Ua Ia faatuina vasega, uarota, ma paranesi ma poloaiina i tatou ia faapotopoto faatasi e le aunoa. I na faapotopotoga, lea ua fuafuaina e le Atua mo i tatou, o loo taoto ai lo tatou avanoa sili. E mafai ona tatou tatalo ma galulue mo le lotogatasi o le a faapea ona aumaia ia i tatou le olioli ma faateleina ai lo tatou mana e auauna atu.
Na folafola atu e le Faaola i tagata sa Nifae e toatolu, le olioli i le faatasi ai ma Ia, e fai ma o latou taui mulimuli pe a maea la latou auaunaga faamaoni. Na Ia fetalai, “E atoatoa ai lo outou fiafia; e nonofo foi outou i le malo o lou Tama; ioe, e atoatoa lava lo outou fiafia e pei ona foaiina mai ia te au e le Tama le atoatoa o le fiafia; e pei o au nei, e faapea lava outou e pei o le Tama au nei; e tasi lava i maua ma le Tama.”2
Ua tuuina mai ia i tatou e le Alii ni taiala e iloa ai le mea e fai ina ia maua ai le faamanuiaga ma le olioli o le faateleina pea o le lotogatasi. O loo ta’ua i le Tusi a Mamona se taimi sa faamanuiaina [i le lotogatasi]. O aso ia a o i ai Alema i le Vai o Mamona. O le mea na faia e tagata i na tulaga faigata ma le matautia, ua aumaia ai ia i tatou se taiala ma se faamalosiauga.
O mea uma sa musuia ai Alema ma lona nuu e fai sa faamoemoe ia fesoasoani i tagata ia filifili e suia o latou loto e ala i le Togiola a Iesu Keriso. Na o le pau lena o le ala e mafai e le Atua ona tuuina mai ai le faamanuiaga o le tasi o le loto.
I le Mosaea tatou te faitau ai:
“Ma ua ta’ua i latou o le Ekalesia a le Atua, po o le Ekalesia a Keriso e afua i lea lava aso. Ua oo foi, o i latou uma ua papatisoina i le mana ma le pule mai le Atua, ua faaopoopoina i latou i lana ekalesia.
“Na ia poloai atu foi ia te i latou, aua latou te aoao atu se mea e tasi tau lava o mea ua aoaoina ai i latou e ia, ma ua fai mai i fofoga o le au perofeta paia.
“Ioe, na ia poloai atu lava, aua le talai atu e i latou se tasi mea, tau lava o le salamo ma le faatuatua i le Atua, o le na togiolaina lona nuu.
“Na ia poloai atu foi ia aunoa i latou ma fefinauaiga, a ia latou faamoemoe i le mea e tasi ona ua tasi le faatuatua ma le papatisoga ua tasi, ma ua fusifusia faatasi o latou loto i loto gatasi ma le fealofani.
“Ma ua faapena ona poloai atu o ia ia latou talai. Ua faapea foi ona avea i latou ma fanau a le Atua.”3
O le mafuaaga lena na poloaiina ai e Alema le nuu ia aoao atu le faatuatua ma le salamo. O le mafuaaga lena ua iloa e la’u fanau, o lesona uma i afiafi faaleaiga ou te sailia ai se auala e uunaia ai se tasi e molimau i le Faaola ma Lana misiona. O nisi taimi sa fai ai e matua. O afiafi sili ona manaia sa ma maua ai se auala e uunaia ai tamaiti e fai, a le o le faia o le lesona po o le taliina o fesili. A tuuina mai molimau e uiga i le Faaola, e faamaonia mai e le Agaga Paia. O afiafi na matou te lagonaina ai le fusia faatasi o o matou loto.
E faaopoopo atu i sauniga, o loo i ai mataupu faavae o loo tatou mulimuli ai o ni tagata, o loo taitaiina atu i le lotogatasi sili atu.
O se tasi o na mataupu faavae o faaaliga, o Faaaliga e na o le pau lena o le ala e mafai ai ona tatou iloa ona mulimuli faatasi i le finagalo o le Alii. E manaomia ai le malamalama mai luga. O le a molimau mai le Agaga Paia i o tatou loto, ma loto o i latou o siomia i tatou, i mea e finagalo o Ia tatou te faia. Ma o le tausia o Ana poloaiga e mafai ai ona fusia faatasi o tatou loto ia tasi.
O se mataupu faavae lona lua e taialaina a tatou taumafaiga ina ia avea ma e tasi, o le lotomaualalo. O le faamaualuga o le fili sili lea o le lotogatasi. Ua outou silasila i ai ma lagonaina ona aafiaga matautia. O ni nai aso ua mavae, sa ou matamata ai a o amataina e ni tagata se toalua—o ni tagata lelei—se feeseeseaiga laitiiti. Sa amatalia i se talanoaga pe o le a le mea sao, ae na avea ma se tauvaga po o ai e sao. Na amata ona siisii o la leo. Na amata ona mumu teisi o la foliga. Ua le talanoaina le mataupu, a ua amata ona faamatala e le tagata ia lava, ma faamalau le mafuaaga, pe a fua i o la’ua tomai ma talaaga, ua sili ai ona sa’o o la manatu.
Atonu o le a e te’i e pei ona sa oo ia te au. Ua tatou vaaia aafiaga faaumatia tagata o le leaga o le feteenai. Ua outou silafia ma ou iloa tagata o e ua tuua le mafutaga ma le Au Paia ona o le faamaualuga ua manu’a.
O le mea e sili ai, o loo ou vaaia le tele ma tele o tagata faatupu filemu atamamai, o e faatoafilemuina se vevesi a o le’i tupu se faalavelave. E mafai ona avea oe ma se faatupu filemu, pe o e i ai i le feeseeseaiga pe o e matamata atu foi i ai.
O se tasi auala na ou vaai o faatinoina ai o le saili lea mo se mea tatou te au uma i ai. Ina ia avea ma faatupu filemu e tatau ona ia te oe le faatuatua faigofie e faapea, i le avea ai ma fanau a le Atua, ma o tatou eseesega uma lava, atonu o se manatu malosi tatou te au i ai, o le a i ai lava ni elemene o le upumoni. O le faatupu filemu sili, o le e toe aumaia le lotogatasi, o le tagata lea na te sailia se auala e fesoasoani ai i tagata ia latou iloa le upumoni o loo latou taufai iloaina. O lena upumoni o loo latou taufai iloaina, e maoae atu ma e sili atu ona taua i taimi uma nai lo o latou feeseeseaiga. E mafai ona e fesoasoani ia te oe lava ma isi ia iloa na itu e manatu tutusa ai pe afai e te ole atu mo se fesoasoani mai le Atua, ona e galue lea. O le a Ia tali mai i lau tatalo e fesoasoani e toe aumai le filemu, e pei ona Ia faia mo au.
E faaaoga foi lena mataupu faavae pe a tatou fausia le lotogatasi ma tagata e matua eseese o latou talaaga. E tele atu mea e tutusa ai fanau a le Atua nai lo mea e eseese ai. E oo lava foi i eseesega, e mafai ona vaai i ai o se avanoa. O le a fesoasoani le Atua ia tatou iloa se eseesega i se isi tagata e le o se faapogai o le faasoesa, ae o se saofaga. E mafai ona fesoasoani le Alii ia e iloa ma faataua le mea o loo fai ma sao o lena tagata ae o loo e vaivai ai. E sili atu ma le tasi ona fesoasoani le Alii ia ou iloa Lona agalelei, i le tuuina mai lea ia te au o se mafutaga ma se tasi, o lona eseesega o le mea tonu lava lea na ou manaomia. O le auala lena a le Alii o le faaopoopoina o se mea sa ou le mauaina ina ia atili lelei ai le tautuaina o Ia.
O lena mea ua oo atu ai i se isi mataupu faavae o le lotogatasi. O le tautala lelei lea o le tasi i le isi. Mafaufau i le taimi mulimuli na fesili atu ai ia te oe, po o le a sou manatu pe o faapefea mai se isi tagata o lou aiga po o le Ekalesia. Ua faafia ona tupu lena mea ia te au i le vaiaso na te’a nei. Ia, e i ai taimi e tatau ai ona tatou faamasinoina isi. O nisi taimi e manaomia ai ona faaleo atu na faamasinoga. Ae o le tele o taimi e mafai ona tatou faia se filifiliga. Mo se faataitaiga, faapea la e fesili atu se tagata po o le a sou manatu i le epikopo fou.
A o faasolosolo ina lelei lo tatou faateleina o le lotogatasi, o le a tatou mafaufau i se mau, pe a tatou faalogo i lena fesili: “O lenei foi, o’u uso e, ona ua outou iloa le malamalama tou te faamasino atu ai, o lea malamalama foi o le malamalama o Keriso, ia outou, nei outou faamasino atu ma le sese, aua o le faamasinoga tou te faamasino atu ai, e faamasinoina ai outou.”4
O le iloaina e te vaai atu i isi ma le le atoatoa, atonu ai o le a fai si ou agalelei teisi atu i mea e te tautala ai. E faaopoopo atu i lena mau, atonu e te manatua na fai mai lou tina—o au na fai mai—“Afai e le mafai ona e faia se tala lelei e uiga i se tagata, aua lava nei e tautala.”
O lena mea o le a fesoasonai e te vaavaai ai mo le mea e sili ona lelei i le faatinoga ma uiga o le epikopo. O le mea lena o le a fai moni lava e le Faaola, i le avea ai ma ou faamasino alofa, a o ia faamasinoina au faatinoga ma a’u foi. O le mau ma mea sa e faalogo ai mai lou tina, e mafai ona taitai atu ai oe e faamatala le mea sili ona lelei i le faatinoga a le epikopo ma lona faamoemoega lelei. E mafai ona ou folafola atu ia te oe se lagona o le filemu ma le olioli pe a e tautala ma le agalelei e uiga i isi i le Malamalama o Keriso. O le a e lagonaina, mo se faataitaiga, le lotogatasi ma lena epikopo, faapea foi ma le tagata sa fesili atu mo sou manatu, e le faapea ona ua atoatoa le epikopo, pe ona o le tagata sa fesili atu e tutusa la oulua iloiloga agalelei. E afua ona o le a tuu atu e le Alii e te lagonaina le agaga talisapaia ona o le filifili e aloese mai le avanoa e totoina ai fatu o le le lotogatasi.
E ao ona tatou mulimuli i na mataupu faavae a o faapotopotoina e le Alii tagata e toatele e le pei o i tatou. O le mea o le a iloagofie atili ia i tatou, o le aumaia lea e le Togiola o suiga e tasi ia i tatou uma. E avea i tatou ma soo e agamalu, agaalofa, e ganagofie, ma e le fefefe foi ae faamaoni i mea uma. E eseese atunuu tatou te nonofo ai, ae tatou te o mai i le Ekalesia e ala mai i se faasologa e suia ai i tatou. E avea i tatou ma tagata na vaai i ai le Aposetolo o Paulo, e ala i meaalofa a le Agaga:
“Ua faatau maua e i tatou uma ona o ia o le taitaiga i le Tama, e le Agaga e toatasi.
“O lenei, e le toe tagata ese outou, po o e ua aumau, a ua nuu faatasi ma le au paia, o le aiga foi o le Atua.”5
O le lotogatasi lea ua ou vaaia ua faateleina, o le a mafai ai e le Alii ona faataunuu le mea o le a manatu le lalolagi o se vavega. E mafai e le Au Paia ona faataunuu soo se faamoemoega o le Alii pe a tasi atoatoa i le amiotonu.
Ua viia i tatou e peresitene o atunuu, kovana, ma taitai o faalapotopotoga agaalofa i le lalolagi atoa—i la’u faalogo—i upu e pei o ia: “O la outou ekalesia na muamua lava taunuu e fesoasoani ina ua oo mai le mala. E faitau fiaselau o outou tagata na taunuu, sa latou aumaia mea uma sa manaomia e tagata na faasaoina. E oo lava i o latou faleie ma sapalai na o mai ma aumai. E lei le lavava ma sa foliga fiafia foi. Sa foliga mai sa latou iloa le mea e o i ai, ma le taimi.” Ona sau ai lea ma se faaupuga e masani ona faapea, “E iloa lelei lava e le tou ekalesia le auala e faatulaga ai ma faataunuu mea e fai.”
Ou te faafetai ia te i latou e aunoa ma le faapea atu e le na o le faapotopotoga po o le faatulagaina o i ai le vavega, ae o totonu o loto o tagata. Na o mai le Au Paia i le suafa o le Alii e tuuina atu le faamama avega semanu Na te tuuina mai e Ia lava. Sa latou o mai a o faalogologo i le faatonuga a taitai filifilia a le Alii. Aua ua lalagaina faatasi o latou loto o lea ua faalauteleina ai lo latou mana.
Ou te tuuina atu la’u molimau maua’i o le lotogatasi ua tatou oo nei i ai, o le a faateleina. O loo soifua le Atua le Tama. E faafofoga mai o Ia ma tali mai ia tatou tatalo i le alofa. O le Faaola o Iesu Keriso ua toetu ma le mamalu, o loo soifua ma e aapa mai o Ia i le alofa mutimutivale. O Lana Ekalesia moni lenei. O Peresitene Monson o le perofeta soifua a le Atua. Afai tatou te lotogatasi i le lagolagoina o ia faatasi ai ma o tatou loto uma, ma le naunau e usitai i mea ua finagalo le Atua tatou te faia, o le a tatou agai atu faatasi i le malosi e o i soo se mea e finagalo o Ia tatou te o i ai, ma ia avea ma tagata e finagalo o Ia e avea ai i tatou.
Ou te tuuina atu la’u faamanuiaga o le a outou olioli i le lotogatasi i o outou aiga ma le Ekalesia. Ma ou te tuuina atu foi ia te outou le folafolaga a le Alii o le a outou maua manaoga amiotonu o outou loto mo lena olioli i le lotogatasi. I le suafa paia o Iesu Keriso, amene.