Lototele Faakerisiano: O Le Tulaga Manaomia o se Soo
Tali atu i e tuuaifuaina i tatou i le ala a le Faaola
Ua tatou potopoto faatasi e faapei ua tasi, ua tatou tauaveina i o tatou luga le suafa o Iesu Keriso, ma o i tatou o ni Kerisiano. O se tasi o fesili tatou te ono fesili ai: aisea la, pe afai ua ia te i tatou lena alofa o le Faaola, o le a manao ai se tasi e avea ma se fili pe faasagatau mai ia i tatou?
Talu ai nei sa tusia ai e se vaega o talavou atamamai, faamaoni o le Au Paia o Aso e Gata Ai ni fesili sa latou matua atugalu ai. Sa fesili se tasi tuafafine, “Aisea e le matua puipuia ai e le Ekalesia ia lava pe a i ai ni tuuaiga e faasaga i ai?”
I lana fesili ou te faapea atu ai, o se tasi o tofotofoga tele o le olaga nei e oo mai pe a fesiligia o tatou talitonuga pe faitioina. O taimi faapena, atonu tatou te mananao e tali faalilii atu i ai—e “faalala a tatou moto.” Ae o avanoa taua na e mafaufau ai, tatalo, ma mulimuli i le faataitaiga a le Faaola. Manatua o Iesu lava Ia na inosia ma teena e le lalolagi. Ma i le miti a Liae, o i latou na o mai i le Faaola sa latou onosaia foi “e tauemu ma tusitusi mai … o latou lima” (1 Nifae 8:27). “Ua inoino le lalolagi [i o’u soo[,” na fetalai ai Iesu, “aua e le ni o le lalolagi i latou, faapei o au, ou te le so le lalolagi” (Ioane 17:14). Peitai, a tatou tali atu i e tuua’ia i tatou e pei ona faia e le Faaola, e le gata ina atili avea ai i tatou faapei o Keriso, ae ua tatou valaaulia foi isi e lagonaina Lona alofa ma mulimuli foi ia te Ia.
Ina ia tali atu i se ala e faapei o Keriso, e le mafai ona tusitusia muamua pe faavae i se fua faatatau. Sa eseese lava tali a le Faaola i tulaga uma. Ina ua faafesagai o Ia ma le Tupu amioleaga o Herota, sa lei gagana o Ia i se upu. Ina ua tu o ia i luma o Pilato, sa Ia tuuina atu se molimau faigofie ma le mamana e uiga i Lona paia ma Lona faamoemoega. Ina ua silasila atu i le au faatautupe ua faaaogaina ma le le migao le malumalu, sa Ia faaaogaina Lona tiutetauave paia e tausisia ai ma puipuia le mea paia. Ina ua siitia i luga o le satauro, sa ia gagana i se tali faaKerisiano e le mafaatusalia: “Lou Tama e, ia e faamagalo atu ia te i latou; aua ua latou le iloa le mea sa latou fai” (Luka 23:34).
E i ai nisi tagata e mafaufau sese faapea o tali e pei o le le gagana, agamalu, faamagalo atu, ma le tuuina atu faamaualalo o se molimau e le tinoa pe vaivai foi. Peitai, o le “alofa i e ita mai ia [te i tatou], ia faamanuia atu i e ua fetuu mai ia [te i tatou], ia agalelei atu i e ua inoino mai ia [te i tatou], ia tatalo foi mo e ua tuua’ifua mai ma faasaua mai ia [te i tatou]” (Mataio 5:44) e manaomia ai le faatuatua, malosi, a o le mea sili o le lototele faaKerisiano.
Na faaalia e le Perofeta o Iosefa Samita lenei lototele i lona soifuaga atoa. E ui lava ina sa “mafatia i sauaga mamafa mai lima o ituaiga tagata eseese, o tagata lotu ma tagata le lotu” (Iosefa Samita—Talafaasolopito 2:27), e lei tauimasui o ia pe inoino ia i latou. E pei lava o soo moni uma o Keriso, sa mulimuli o ia i le faataitaiga a le Faaola o le alofa lea i isi i se ala agaalofa ma le onosai. O le lototele faaKerisiano lena.
Tatou te le tauimasui—a tatou liliu atu le isi alafau ma teena faalogona o le ita—ua tatou mulimuli foi i faataitaiga a le Faaola. Tatou te faaali atu Lona alofa, ona pau lena o le mana e mafai ona pulea le fili ma tali atu ai i e tuuaia i tatou e aunoa ma lo tatou tuuaia foi o i latou. E le o se vaivaiga lena mea. O le lototele faaKerisiano lena.
I le gasologa o tausaga ua tatou aoao ai e le fou ia luitau o lo tatou faatuatua, e le faapea foi e ono mou vave atu. Peitai, o soo moni o Keriso e iloa avanoa i le lotolotoi o mea faafeagai.
I le Tusi a Mamona, na saisaitia le perofeta o Apinati ma aumaia i luma o le Tupu amioleaga o Noa. E ui lava ina sa matua tetee le tupu ia Apinati, ma iu lava ina faasalaina o ia i le oti, ae sa aoao atu ma le toa e Apinati le talalelei ma tuu atu lana molimau. O le faaaogaina e Apinati o lena avanoa, sa liua ai se ositaulaga e igoa ia Alema i le talalelei, ma sa ia aumaia le tele o agaga ia Keriso. O le lototele o Apinati ma Alema o le lototele faaKerisiano.
Ua faaalia i le poto masani, o vaitau o faasalalauga lē lelei e faasaga i le Ekalesia e mafai ona fesoasoani i le faataunuuina o faamoemoega o le Alii. I le 1983, na tusi mai ai le Au Peresitene Sili i taitai o le Ekalesia, “O tetee lava ia e ono avea ma se avanoa. I le lotolotoi o luitau faifai pea o loo feagai ma o tatou faifeautalai, ua i ai foi ma le faalefiafia i mataupu tau lotu ma la tatou savali. O nei faitioga ua faatupuina ai … le fiafia i le Ekalesia… . Ua maua ai se avanoa [mo tagata o le ekalesia] e tuuina atu ai le upumoni ia i latou ua aga taulai mai ia i tatou.”1
E tele ni auala e mafai ona tatou faaaogaina na ituaiga avanoa: o se tusi agalelei i le faatonu [o se nusipepa], se talanoaga ma se uo, se manatu i se mataupu, po o se upu faamautinoa i se tasi na faia se faamatalaga e taufaaleaga [ai le lotu]. E mafai ona tatou tali atu ma le alofa ia i latou ua tosina i faamatalaga le sa’o ma le faasausili—o e ua “taofia mai le upumoni ona ua latou le iloa le mea e maua mai ai” (MFF 123:12). Ou te faamautinoa atu ia te oe, o le tali atu faapea i e ua tuuaia i tatou e le o se vaivaiga. O le lototele faaKerisiano lena i lona faatinoina.
A tatou tali atu i isi, o le a eseese uma lava tulaga. O le mea e lelei ai, ua silafia e le Alii loto o e tuuaia i tatou, ma le ala e mafai ona tatou tali lelei atu ai ia te i latou. A o saili e soo moni le taitaiga mai le Agaga, latou te mauaina musumusuga e talafeagai lelei ma mea taitasi latou te feagai. Ma o mea uma lava tou te fetaiai, o soo moni e tali atu i auala e valaaulia ai le Agaga o le Alii. Sa faamanatu atu e Paulo i Korinito e faapea, o lana talaiga “e lei sauni mai upu malie o le poto o tagata, ae peitai o le faasino mai e le Agaga ma le mana” (1 Korinito 2:4). Talu ai o lena mana e nofo i le Agaga o le Alii, o lea e le tatau ai lava ona tatou faafinauvale pe a tatou talanoaina lo tatou faatuatuaga. E pei lava ona aoaoina e le toatele o faifeautalai, o le finau i aoaoga faavae e faaaoga ai le Tusi Paia, e aveese ai le Agaga i taimi uma. Ua fetalai mai le Faaola: “O le ua i ai le agaga o le finauga, e le mai ia te au lea” (3 Nifae 11:29). E sili atu ona faanoanoa nai lo le tuuaia o le Ekalesia faapea e le o se lotu Kerisiano, pe a tali atu tagata o le Ekalesia i na tuuaiga i se ala e le a Keriso ia! Ia iloagofie a tatou talanoaga ma isi i fua o le Agaga—“o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoia, [ma le ] faapalepale” (Kalatia 5:22–23). O le agamalu, e pei ona faamatalaina e le Lomifefiloi o le Webster, o le “faaali atu o le onosai ma le faapalepale: onosaia o le tiga e aunoa ma le ita.”2 O le agamalu e le o le vaivai. O se faailoga o le lototele faaKerisiano
E faapitoa lava le taua o lenei mea i a tatou fegalegaleaiga ma tagata o isi lotu Kerisiano. E moni lava e faanoanoa lo tatou Tama Faalelagi—e ata foi le tiapolo—pe a tatou felafolafoai faafinau ma o tatou tuaoi Kerisiano i eseesega o aoaoga faavae.
E le faapea ua ou fautua atu ai ina ia fetuunai ai a tatou mataupu faavae pe tuuitiitia le mamana o o tatou talitonuga. E le mafai ona tatou suia aoaoga faavae o le talalelei toefuataiina, tusa lava pe o le aoaoina ma le usitaia o i latou e inosia ai i tatou i mata o le lalolagi. Ae tusa lava foi pe tatou te lagona e ta’uta’u atu le afioga a le Atua ma le lototoa, e tatau lava ona tatou tatalo ina ia faatumulia i le Agaga Paia (tagai Galuega 4:29, 31). E le tatau lava ona tatou faaluafesasia le lototoa ma le taufaasese o Satani: faasaua (tagai Alema 38:12). O soo moni e tautatala ma le mautinoa e le leoa, ae le o le faasausili limalala’u.
I le avea ai ma soo moni, e tatau ona avea ma o tatou popolega aupito taua le soifua sololelei o isi, ae le o le sa’o o le tagata lava ia. O fesili ma faitioga tatou te maua ai se avanoa e aapa atu ai i isi, ma faaali atu ai e taua i latou i lo tatou Tama Faalelagi ma i tatou. O lo tatou faamoemoe o le fesoasoani lea ia latou malamalama i le upumoni, ae le o le taupunipuni o o tatou manatu po o le tau faamaonia e sa’o o tatou manatu ae sese isi i se felafolafoaiga faatofamanino. O a tatou molimau mai le taele o o tatou loto, o le tali aupito mamana lena e mafai ona tatou tuuina atu i e tuuaifuaina i tatou. Ma o na ituaiga o molimau e na o le alofa lava ma le agamalu e mafai ona tuuina atu ai. E ao ina avea i tatou e faapei o Eteuati Paterika, lea na fetalai ai le Alii, “Ua mama lona loto i o’u luma, aua o ia e faapei o Natanielu anamua, o le e leai sona pepelo” (MFF 41:11). Ina ia aunoa ma le pepelo, o le lotomama lea e faapei o se tamaitiiti, e faatelegese ona ita ma e vave foi ona faamagalo atu.
O nei uiga auau mama e muai aoaoina lava i le fale ma le aiga, ma e mafai ona faaaoga i a tatou fegalegaleaiga uma. Ina ia aunoa ma le pepelo, o le vaavaai muamua lea i o tatou lava sese. A tuuaifuaina, e ao ina tatou fesili e pei ona faia e Aposetolo a le Faaola, “Le Alii e, o au ea?” (Mataio 26:22). A tatou faalogo i le tali e tuuina mai e le Agaga, e mafai, pe a manaomia, ona faia faasaoga, faatoese, saili atu mo le faamagaloga, ma fai le mea e sili atu ona lelei.
E aunoa ma le pepelo, o soo moni e aloese mai le faamasino le tonu fua o manatu o isi. O le toatele o i tatou ua atiina ae faauooga malolosi ma i latou e le o ni tagata o la tatou Ekalesia i le taimi nei—o uo i le aoga, o paaga i galuega, ma uo ma tuaoi i itu eseese o le lalolagi. Tatou te manaomia i latou, ma e latou te manaomia foi i tatou. E pei ona sa aoao mai e Peresitene Thomas S. Monson, “Ia tatou aoao e faaaloalo i isi … . E leai se tasi o lo tatou aai, lo tatou atunuu, po o lo tatou lalolagi— e ola na o ia”3
E pei ona faaalia e le Faaola ina ua faatasi ma Herota, e i ai nisi taimi e tatau ai i soo moni ona faaali atu le lototele faaKerisiano e ala i le leai lava o se tala. Sa i ai se taimi sa ou ta polo ai, sa faafuasei ona ou lavelavea i se laau tele matuituia na pei e tauai mai ai ni nila e pei o se porcupine [meaola matuituia]. Sa pipii solo tala o le laau i o’u ofu, e ui lava ou te lei pa’i tele i le laau. O nisi tulaga e pei lava o lena laau: e na ona faamanu’aina ai lava o i tatou. I na tulaga faapena, e sili ai ona tatou tutu mamao ma ui ese mai ai. A tatou faia o lena, atonu e taumafai nisi e faaita i tatou ma faaauai i tatou i se feupuaiga. I le Tusi a Mamona, ua tatou faitau ai e uiga ia Le’oneti ma lana au sa tolauapi i luga o se mauga. Sa tauanau e Amalekia taufaalata ia Le’oneti e “alu ifo i lalo” la te fetaiai ma ia i le vanu. Ae ina ua tuua e Le’oneti le mauga, sa faa’ona o ia “i le mea e gata mai ai” seia oo ina oti ai o ia, ma pauu atu ai ona tagata i lima o Amalekia (tagai Alema 47). O feupuaiga ma tuuaiga, e maunu ai e nisi tagata i tatou ina ia tuua o tatou tulaga maualuluga po o le saogalemu. O le eleele maualuga po o le saogalemu, o iina o i ai le malamalama. O iina tatou te vaaia ai le uluai malamalama o le taeao ma le toe malamalama i le afiafi. O le eleele saogalemu lena. E moni ma o iina o i ai le malamalama. O nisi taimi e mananao isi tatou te o mai i lalo ina ia tuua o tatou tulaga saogalemu ae auai atu ma i latou i se sikalamu faatofamanino i le palapala. O nei tagata finauvale, e naunau lava e faamatua’ia ni finauga faalelotu, i luga o peau o le ea po o le faafesagai. E sili atu lava lo tatou nonofo ai i le eleele maualuga o le faaaloalo a’ia’i ma le alofa.
O le faia o lena mea, ua tatou mulimuli ai i le faataitaiga a le perofeta o Neemia, o le sa fausiaina se pa faataamilo i Ierusalema. Sa talosagaina faatauanau Neemia e ona fili ia latou fetaiai i le fanua laugatasi, lea “ua latou manatu e fai ai [ia te ia] se mea leaga.” Peitai, e le faapei o Le’oneti, sa le taliaina ma le poto e Neemia la latou valaaulia ma sa auina atu i ai le savali lenei: “O loo faia e au le galuega tele, ou te le mafai ai ona alu ifo: Se a le mea e tuua ai le galuega i lo’u tuulafoai ma alu ifo ia te outou?” (Neemia 6:2–3). O tatou foi ia o loo i ai se galuega tele e fai, lea o le a le faataunuuina pe afai e faatagaina i tatou lava e tuu ae finau ma faalavelaveina ai. Ae e tatau ona tatou aoina le lototele faaKerisiano ma liliu atu i se isi mea. E pei ona tatou faitau i le Salamo, “Aua e te faameo ona o e amio leaga” (Salamo 37:1).
O le a i ai pea lava le leaga faatasi ma i tatou i lenei lalolagi. O se vaega o le tofotofoga tele o le olaga nei, o le i ai lea i le lalolagi e aunoa ma le avea ma ni e o le lalolagi. I Lana Tatalo Faatoga, sa ole atu ai le Faaola i Lona Tama Faalelagi, “Ou te le ole atu ina ia e aveese ia te i latou i le lalolagi, a ia e tausi ia te i latou ina ne’i leaga” (Ioane 17:15). Ae e oo lava foi ina ua lapatai le Faaola e uiga i sauaga: “Ou te tuuina atu ia te outou le [filemu]; o lo’u [filemu] ou te avatu ai ia te outou… . Aua le atuatuvale o outou loto, aua foi tou te matatau” (Ioane 14:27). Ou te molimau atu, faatasi ai ma Lana faamanuiaga o le filemu i o tatou luga, o le a faataunuuina le folafolaga a le Au Peresitene Sili: “O le faafeagai lea e foliga mai e faigata ona tauave, o le a avea ma se faamanuiaga i le malo o le Atua i luga o le fogaeleele.”4
I lo’u tuafafine lea na fesili ma i latou uma o loo saili pe faapefea ona tali atu i e tuuaifuaina i tatou, ou te tali atu, tatou te alolofa ia i latou. Po o le a lava o latou lanu, faatuatuaga, lotu, po o tulaga faaupufai, afai tatou te mulimuli ia Keriso ma faaali atu i ai Lona lototoa, e tatau ona tatou alolofa ia i latou. Tatou te le manatu ua sili atu i tatou nai lo i latou. Ae, tatou te naunau ma le alofa e faasino atu ia i latou se ala sili—le ala o Iesu Keriso. O Lona ala e tau atu i le faitotoa o le papatisoga, le ala sao ma le vaapiapi o le ola amiotonu, ma le malumalu o le Atua. O Ia “o le ala, le upumoni, ma le ola” (Ioane 14:6). E na o Ia e mafai ona tatou maua ai ma o tatou uso uma ma tuafafine le meaalofa aupito silisili e mafai ona tatou maua—o le ola faavavau ma le fiafia faavavau. Ina ia fesoasoani ia te i latou, ia avea ma se faataitaiga mo i latou, e le o se mea e mafai ona fai e i latou o e vaivai. E na o e malolosi e mafai ona faia. O se mea e tatau ona faia e oe ma au, o le Au Paia o Aso e Gata Ai, o e ua totogia le tau e avea ai ma soo e ala i le tali atu ma le lototele faaKerisiano i e o tuuaifuaina i tatou.
Ou te avea le molimau a Mamona e fai ma a’u lava molimau, e faaiu atu ai: “Faauta, o au o le soo o Iesu Keriso le Alo o le Atua. Ua valaauina au e ia e talai atu lana afioga i lona nuu, ina ia maua e i latou le ola faavavau” (3 Nifae 5:13). Ou te tuuina atu la’u molimau faapitoa e uiga ia te Ia—e mafai ona faavavau o tatou olaga aua e faavavau Lona alofa. Ia mafai ona tatou faasoa atu Lona alofa faavavau, ma le le faatuaoia, i o tatou uso ma tuafafine i soo se mea, o la’u tatalo faamaulalo lea i le suafa o Iesu Keriso, amene.