O Mai i Siona
I totonu o o tatou aiga ma a tatou siteki ma itu, ia tatou saili e fausia Siona e ala i le lotogatasi, faaleatua, ma le alofa mama.
Na saunoa le Perofeta o Iosefa Samita: “O le fausiaina o Siona o se faamoemoe ua fiafia i ai tagata o le Atua i tupulaga uma; o se mataupu ua uigaese le fiafia i ai o perofeta, faitaulaga ma tupu; sa latou tulimatai ma le naunautaiga fiafia aso ua tatou ola ai; ma le musuia i le fiafia ma le naunautaiga faalelagi na latou pepese ai ma tusia ai ma valoia ai o tatou aso nei; ae ua latou maliliu e aunoa ma le vaai i mea ua tutupu i o tatou aso; o i tatou o tagata filifilia e le Atua ina ia aumaia le mamalu o Aso e Gata Ai” (Aoaoga a Peresitene o le Ekalesia: Iosefa Samita [kosi aoaoina a le Perisitua Mekisateko ma le Aualofa, 2007], 197).
O Siona o se nuu ma o ni tagata foi. O Siona o le igoa lea na faaigoa ai le nuu anamua o Enoka i vaitaimi a o le’i oo i le lolo. “Ma sa oo ina faatuina e Enoka i ona vaitaimi se aai, sa taua o le Aai Paia, o Siona lava lea” (Mose 7:19). O lenei Siona sa faaauau ai lava i le pe a ma le 365 tausaga. (tagai Mose 7:68). O loo taua i tusitusiga paia, “Sa savavali Enoka ma ona tagata faatasi ma le Atua, ma sa ia afio ai i Siona, ma sa oo ina mou atu Siona, aua ua aveina ae e le Atua i lona lava fatafata; na afua ai lea aso ona faapea le upu, Ua sola Siona” (Mose 7:69). Mulimuli ane, na taua ai Ierusalema ma lona malumalu o le Mauga o Siona, ma ua valoia e tusitusiga paia se Ierusalema Fou i le lumanai o le a faapea ona nofotupu ai Keriso o le “Tupu o Siona” mo “tausaga foi e afe o aso ia e mapu ai le lalolagi” (Mose 7:53, 64).
Sa taua e le Alii le nuu o Enoka o Siona “aua sa tasi o latou loto ma lo latou manatu, ma sa latou ola i le amiotonu; ma sa leai foi se tasi o i latou sa mativa” (Mose 7:18). I se isi nofoaga sa Ia fetalai ai, “Aua o Siona lenei—o e loto mama” (MFF 97:21).
O le faafeagai moni ma le fili o Siona o Papelonia. O le nuu o Papelonia sa taua muamua o Papelu, ona o le lauiloa o le Olo o Papelu, ma mulimuli ane na avea ai ma laumua o le malo o Papelonia. O lona fale aupito ta’uta’ua o le malumalu o Pele, po o Paala, le tupua lea na taua e perofeta o le Feagaiga Tuai “O Le Maasiasi,” ona o feusuaiga faatufanua sa faapea ona aofia ai i ona tapuaiga. (Tagai Bible Dictionary, “Assyria and Babylonia,” 615–16; “Baal,” 617–18; “Babylon, or Babel,” 618). O lona faalelalolagi, o ona tapuaiga faatiapolo, ma le faatagataotauaina o Iuta iina ina ua mavae le faoaina i le 587 TLM, ua tuufaatasia uma ma avea ai Papelonia o le faatusa o tagata lē mama ma le pologa faaleagaga.
O le tulaga lenei na mafua ai ona fetalai mai le Alii i tagata o Lana Ekalesia, “Ina o ese ia outou nai Papelonia; ina potopoto ia outou mai atunuu, mai matagi e fa, mai le tasi tuluiga o le lagi e oo i le tasi” (MFF 133:7). Sa Ia valaauina toeaina o Lana Ekalesia ina ia auina atu i le lalolagi atoa e fai lenei faapotopotoina, ia amata se taumafaiga o loo faapea ona faaauauina i le malosi atoa i aso nei. “Faauta foi, ma vaai ia, o le a faapea la latou valaauga, ma le leo o le Alii i tagata uma: Ina o atu ia outou i le laueleele o Siona, ina ia faalauteleina tuaoi o lo’u nuu, ina ia faamalolosia ona siteki ma oo atu Siona i le laueleele lata mai” (MFF 133:9).
Ma o aso nei ua faapotopoto ai le nuu o le Alii “mai atunuu” a o latou faapotopoto i aulotu ma siteki O Le Ekalesia a Iesu Keriso o le Au Paia o Aso e Gata Ai o loo taape i atunuu uma. Na muai vaaia e Nifae ia nei “malo” o le a toaitiiti ae o le mana o le Alii e alu ifo “i le au paia a le ekalesia a le Tamai Mamoe, … o e na faasalalauina i le fogaeleele uma, ma [o le a] fai auupega i latou i le amiotonu” (tagai 1 Nifae 14:12–14). Ua fetalai mai le Alii ia fai i tatou ma faailoga o le amiotonu e taitaia ai i latou o loo sailia le saogalemu ma faamanuiaga o Siona:
“E moni ou te fai atu ia te outou uma: Ina tutulai ia ma susulu atu, ina ia faia lo outou malamalama ma tagavai mo atunuu;
“Ina ia faia foi ma olo, ma sulufaiga mai le afa, ma le ita pe a liligi ifo e lē faafefiloia i le lalolagi atoa, le faapotopotoina faatasi i le laueleele o Siona ma ona siteki” (MFF 115:5–6).
I lalo o le taitaiga a le Perofeta o Iosefa Samita, sa taumafai ai tagata anamua o le Ekalesia e faatu le nofoaga tutotonu o Siona i Misuri, ae sa le’i agavaa i latou e fausia le aai paia. Na faamalamalama mai e le Alii se tasi o mafuaaga o lo latou toilalo:
“E lei aoaoina e i latou le usiusitai i mea na ou manaomia mai ia i latou, a ua tumu i amioleaga eseese, ua le tuuina atu foi i ai a latou mea, e pei ona tatau ai i le au paia, i e matitiva ma e mafatia ia te i latou;
“Ua le au faatasi foi e tusa ma le faatasiga e ao ina faia i le tulafono o le malo selesitila” (MFF 105:3–4).
“Sa i ai misa, ma fefinauaiga, ma losilosivalega, ma tauaimisaga, ma manao tuinanau ma le faaloloto ia te i latou; o lea na latou faaleagaina ai o latou tofi i ia mea” (MFF 101:6).
Nai lo le faamasinoina ma le faalealofa o le Au Paia anamua, e tatau ona tatou vaai ifo ia i tatou lava pe o faapeī i tatou.
O Siona e Siona ona o aga, uiga, ma le faamaoni o ona tagatanuu. Manatua, “sa taua e le Alii lona nuu o Siona, aua sa tasi o latou loto ma lo latou manatu, ma sa latou ola i le amiotonu; ma sa leai foi se tasi o i latou sa mativa” (Mose 7:18). Afai o le a tatou fausia Siona i o tatou aiga, paranesi, uarota ma siteki, e ao lava ona tatou ausia lenei tulaga. O le a manaomia (1) ia lotogatasi i le loto e tasi ma le manatu e tasi; (2) ia avea ma ni tagata paia taitoatasi ma tuufaatasi; ma (3) ia tausia e matitiva ma e le tagolima i se lelei ia faapea ona leai ai se tasi e mativa ia i tatou. E le mafai ona tatou faatalitali sei iloga e oo mai Siona ona faatoa tupu lea o nei mea—o le a oo mai Siona pe afai e faia ia mea.
Lotogatasi
A o tatou mafaufau i le tasi e manaomia mo Siona ina ia faamanuiaina, e tatau ona tatou fesili ifo ia i tatou lava pe ua tatou faatoilaloina le femisaai, fefinauaiga, losilosivale, ma tauaimisaga (tagai MFF 101:6). Pe ua tatou saoloto mai i le avea o ni tagata taitoatasi ma se nuu mai tauaimisaga ma fefinauaiga a ua au faatasi “e tusa ma le faatasiga e ao ina faia i le tulafono a le malo selesitila”? (MFF 105:4). O le faamagalo atu o le tasi i le isi e taua i lenei au faatasi. Na fetalai Iesu, “O au, le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma” (MFF 64:10).
O le a avea i tatou ma loto e tasi ma le mafaufau e tasi pe a taitoatasi i tatou ma tuuina le Faaola i le ogatotonu o o tatou olaga ma mulimuli ia i latou ua Ia tofia e taitaiina i tatou. E mafai ona tatou au faatasi ma Peresitene Thomas S. Monson i le alofa ma le popole o le tasi i le isi. I le konafesi aoao ia Aperila ua mavae, na saunoa mai ai Peresitene Monson ia i latou ua o ese mai le Ekalesia ma ia i tatou uma ina ua ia saunoa: “I le loto fuatiaifo o le tagata lava ia, o loo taoto ai lena agaga, le naunautaiga lena e aveese le tagata tuai ae tulai mai i le tulaga moni o se tagata malosi. I lena lava agaga, matou te toe tuuina atu ai lena valaaulia faamaoni: Foi Mai. Matou te aapa atu ia te oe i le alofa mama o Keriso ma faailoa atu lo matou mananao e lagolago ia te oe ma ia toe taliaina oe i le faaaumeaina atoatoa. Ia i latou o e o loo manunua faaleagaga po o e o loo tauivi ma le fefe, matou te faapea atu, Tuu mai sei o matou fesoasoani ia te oe ma faafiafia oe ma faatoamalie ou popolega” (Thomas S. Monson, “Toe Tepa i Tua ma Agai i Luma,” Liahona, Me 2008, 90).
I le faaiuga o Iulai i le tausaga lenei, na faapotopoto ai le autalavou nofofua matutua mai nisi o atunuu i sasae o Europa i se nofoaga e lata i Putapesi, Hanikeri, mo se konafesi. Na i ai i lenei vaega ni alii ma ni tamaitai talavou se 20 mai Molotova, o e na tele ni aso na faaalu i le taumafaiga o o latou tusifolau ma visa ma le silia i le 30 itula na o ai i le pasi ina ia taunuu ai i le konafesi. O le polokalama o le konafesi na aofia ai ni vasega faaleaoaoga se 15. Sa tatau ona filifili e le tagata lava ia ni vasega se lua pe tolu e sili ona manao e auai. Nai lo le taulai atoa atu i le mea e fiafia i ai le tagata lava ia, na aufaatasi ai nei talavou Molotova ma fai ni fuafuaga ina ia tofu le tagata o la latou vaega ma se vasega e tasi e alu i ai ma tusi mai ni faamatalaga mae’ae’a. Ona latou fetufaai lea i mea sa latou aoaoina o le tasi ma le isi, ma mulimuli ane ai ma le autalavou o loo i Molotova o e sa le mafai ona auai. I lona uiga faigofie lava, o le faataitaiga lenei o le lotogatasi ma le alofa o le tasi i le isi, lea e faafia afe ona faatele i ni auala eseese, o le a “faafoisia [mai ai] Siona” (Isaia 52:8).
Paia
O le tele o le galuega e tatau ona faia i le faatuina o Siona e aofia ai a tatou taumafaiga faaletagata lava ia ina ia avea ma “e loto mama” (MFF 97:21). “E le mafai foi ona atiina ae Siona vagana e faia i mataupu faavae o le tulafono a le malo selesitila,” na fetalai le Alii, “a leai ou te le mafai ona talia o ia ia te au” (MFF 105:5). Ioe, o le tulafono o le malo selesitila, o le tulafono ma feagaiga o le talalelei, lea e aofia ai lo tatou manatuaina pea o le Faaola ma la tatou tautinoga ia usiusitai, ositaulaga, faapaiaina, ma faamaoni aiai.
Sa le fiafia le Faaola i nisi o le Au Paia anamua ona o o latou “manao … tuinanau” (MFF 101:6; tagai foi MFF 88:121). O tagata nei sa ola i se lalolagi sa leai ni televise, leai ni tifaga, leai se Initoneti, leai ni iPod. I se lalolagi ua lilofia i le taimi nei i vaaiga ma musika e faaalia ai tulaga o feusuaiga, mata ua aunoa ai i tatou mai manao tuinanau ma mea leaga ia e o mai faatasi ai? Ia taumamao mai le taumafai e tauamiotonu lavalava e le talafeagai tele e faapea e lelei, po o le aafia i amioga le mama a isi tagata e ala i le matamataina o ponokarafi, ae tatau ona tatou fiaaai ma fiafeinu i le amiotonu. Ina ia o mai i Siona, e le lava mo oe ma au ona faapea ia laitiiti ifo le amioleaga nai lo isi. E le gata ia avea i tatou ma ni tagata lelei ae ia avea o ni alii ma ni tamaitai paia. E manatua ai le saunoaga a Elder Neal A. Maxwell, ia tatou atiina ae nei loa o tatou fale i Siona ae lafoai loa le fale o le taumafanafana i Papelonia (tagai Neal A. Maxwell, A Wonderful Flood of Light [1990], 47).
Tausia o e Matitiva
I le talafaasolopito atoa, ua faamasinoina e le Alii faapotopotoga ma tagata taitoatasi i le lelei sa latou tausia ai tagata matitiva. Na fetalai o Ia:
“Aua o loo tumu le lalolagi, ua lava foi ma totoe mea o i ai; ioe, na ou saunia mea uma, ma ua tuuina atu i le fanau a tagata latou te fai ma o latou lava taitai.
“O lea, afai e tago soo se tagata i mea e tele ua ou faia a e le tuuina atu lona vaega, i e matitiva, ma e le tagolima, e tusa ma le tulafono o la’u tala lelei, o le a ia sii ae ona mata faatasi ma e amioleaga i seoli, o loo puapuagatia” (MFF 104:17–18; tagai foi MFF 56:16–17).
Sa Ia folafola mai foi, “Ia tutusa outou i a outou mea tau le tino, e aunoa ma le faalotoloto, a le faia faapea o le a taofia le tele o faaaliga a le Agaga” (MFF 70:14; tagai foi MFF 49:20; 78:5–7).
Tatou te pulea le faaaluina o a tatou tupe ma punaoa, ae tatou te tali atu i le Atua mo lenei [tiute] o le tausimea i mea o le olaga nei. E matagofie naua le molimauina o lo outou agalelei a o outou foai atu i taulaga anapogi ma galuega fesoasoani alofa. Mai le tele o tausaga, o le puapuagatia o le fia miliona [o tagata], ua fai ifo, ma e anoano isi tagata ua mafai ona fesoasoani ia i latou lava e ala i le agalelei o le Au Paia. E ui lava i lea, a o tatou tulitulimatagauina le faamoemoe o Siona, e tatau ia i tatou taitoatasi ona manatunatu ma le agaga tatalo po o tatou faia mea e tatau ona tatou faia ma mea uma ua faamoemoe le Alii e tatau ona tatou faia mo e matitiva ma lē tagolima.
Tatou te ono fesili ifo ia i tatou lava, i le ola ai e pei ona faia e le toatele o i tatou i faalapotopotoga ia e fiafia i oa ma tuinanau, pe o tumau pea ona tatou taumamao mai le faaloloto ma le tuinanau ina ia maua ma saga maua ni mea se tele o le lalolagi. O le manao i mea o le lalolagi o se tasi lea ata faaalia o le ifo i tupua ma le faamaualuga e faauigaina ai Papelonia. Atonu e mafai ona tatou aoao ia lotomalie i mea ua maua mo o tatou manaoga.
Na lapatai e le Aposetolo o Paulo ia Timoteo e uiga i tagata ua manatu “o le mea e maua ai le oloa o le amio Atua lea” (1 Timoteo 6:5).
Fai mai a ia, “Tatou te lei au mai lava se mea e tasi i le lalolagi, ua mautinoa foi tatou te le mafai ona ave ese ai o se mea.
“Afai ua maua e i tatou o mea e aai ai ma mea e oofu ai, ia gata ai o tatou manao” (1 Timoteo 6:7–8).
I le tele o le lalolagi, o loo ua tatou oo atu i taimi le mautu o tulaga i le tamaoaiga. Ia tausi e le tasi le isi i le ala sili tatou te mafaia. Ou te manatua le tala i se aiga Viatename na sosola ese mai Saikone i le 1975 ma iu ai ina nonofo i se tamai fale feaveai i Provo, Iuta. Na avea le alii talavou mai le aiga sulufai ma le soa faiaoga o aiga ia Uso Johnson o le sa le mamao ese le mea na nonofo ai ma lona aiga toatele. Na faamatala e le alii talavou le tala lenei:
“I se tasi aso na iloa atu ai e Uso Johnson e leai se laulau ’ai a le matou aiga. Sa tu mai o ia i le aso na sosoo ai ma se laulau e ese lava ona foliga ae sa aoga lava, lea sa fetaui lelei lava i talaane o le puipui o le fale feaveai e faafesagai ma le fata ma le faatanoa o le umukuka. Ua ou fai atu e ese lava aua e lua vae o le laulau na tutusa ma le folaluga o le laulau, ae ese le isi lua. Ma le isi, sa i ai ni pine laupapa tautau lavalava na lala mai luga o le laulau tuai.
“E lei umi ae matou faaaogaina loa lenei laulau tulaga ese i aso uma lava e gasese ai meaai ma mo ni taumafataga faavavave. Sa faaauau ona matou aai faatasi o se aiga i luga o le fola o le fale … i le faiga moni faaViatename.
“I se tasi afiafi na ou tutu ai i totonu o le fale o Uso Johnson, a o ou faatalitali ma te o i se ma asiasiga faaleaiga. Na ou tei i lou vaaia ai—i iina i le umukuka—i se laulau e talitutusa lava ma le laulau sa ia tuuina mai i lo matou aiga. Ae na pau lava lona eseesega, o le matou laulau na i ai ni pine tautau lavalava, ae o le laulau a le au Johnsons sa i ai ni pupu! Ona ou iloa ai lea, i le vaaia [e Uso Johnson] o le mea na matou manaomia, na tipi afa ai e lenei tamalii lotoalofa lana laulau ai ma fauina ni vae fou tailua mo ia afa taitasi.
“Sa mautinoa lava sa le ofi uma le aiga o Johnson i lenei meaafale laitiiti—atonu foi sa le ofi lelei ai a o atoa le laulau… .
“I lou olaga atoa, o lenei ituaiga faatinoga na avea pea ma faamanatu mamana o le foai moni” (Son Quang Le, e pei ona faamatalaina ia Beth Ellis Le, “O Laulau Tutusa e Lua,” Liahona, Iulai 2004, 45).
Na saunoa le Perofeta o Iosefa Samita, “E tatau ona tatou avea le atiina ae o Siona ma o tatou faamoemoega sili” (Teachings: Joseph Smith, 198). I totonu o o tatou aiga ma a tatou siteki ma itu, ia tatou saili e fausia Siona e ala i le lotogatasi, faaleatua, ma le alofa mama, e sauniuni ai mo lena aso sili o le a faatuina ai Siona, le Ierusalema Fou. I upu o la tatou viiga:
Isaraelu, lou Atua,
Fetalai mai foi mai.
Ua pau Papelonia;
Le Atua na lepetia… .
O mai i Siona o mai,
Tatou te fiafia ai… .
O mai i Siona o mai,
Lata lona afio mai.
(“Isaraelu, Ua Valaau Mai le Atua,” Viiga, nu. 6).
Ou te molimau atu ia Iesu Keriso, o le Tupu o Siona, i le suafa o Iesu Keriso, amene.