Susu Maia ma Talaaao mai i le Konafesi
Ua silafia e lo tatou Tama Faalelagi i tatou taitoatasi ma mea tatou te manaomia. Ia faatumulia i tatou i Lona agaga a o tatou auai i taualumaga o lenei … konafesi.
Ou uso e ma tuafafine pele, e foliga mai ua matua vave tele ona mavae atu masina e ono talu mai ona tatou potopoto talu ai. Ua tele naua mea ua tutupu a o agai i luma le galuega a le Alii e aunoa ma se faalavelaveina.
O se faamanuiaga mo au, sa matou auai ma o’u fesoasoani ma isi Pulega Aoao, e faapaia malumalu fou e tolu: i Curitiba, Pasila; i le Aai o Panama, i Panama; ma Twin Falls, Idaho—ua atoa ai le 128 o malumalu ua faagaoioi i le lalolagi atoa.
O le afiafi a o loma faapaiaga o malumalu taitasi e tolu i le aso e sosoo ai, sa faia ai gaoioiga maoae faaleaganuu. I Curitiba, i Pasila, e 4,330 tagata o le au paia mai itulagi e i ai le malumalu, ma sa lagolagoina e se aufaipese e 1,700 ni leo, na faatinoina se polokalama e aupito sili ona musuia e ala i pese, o siva ma vitio. Sa matua faatumulia le falematamata tele o le malae soka lea sa fai ai, i le au maimoa. Sa agi le matagi, ma taufaamatau foi timuga. Sa ou faia se tatalo le leoa na aioi atu ai i le Tama Faalelagi e silasila ifo ma le alofa ia i latou sa saunia ma le matua maelega mo la matou faafiafiaga, ma o le a faaleagaina a latou toniga ma faatinoga pe afai o le a matagi ma timuga. Sa Ia tali mai i le tatalo, ma sa faatoa mamafa timuga ina ua maea le faafiafiaga i se taimi mulimuli ane i lena afiafi.
Sa faaalia se talafaasolopito o le Ekalesia i Pasila i pese ma siva. O se vaaiga na aupito sili ona faamomoiloto, o le faaali mai lea o ata o Elders James E. Faust ma William Grant Bangerter, o e sa avea ma faifeautalai i Curitiba i le 1940. A o faaali o laua ata i luga o ni lau tetele, sa maena ae se mua tele mai le aofia. I sona aotelega, o se mea sa matagofie lava.
I le Aai o Panama, i Panama, o le afiafi a o loma le faapaiaga o le malumalu i le aso na sosoo ai, sa matou matauina pe tusa ma le 900 o tatou tupulaga talavou na faapotopoto mai vaega eseese o Panama. Sa fai a latou toniga felanulanuai faaleaganuu, a o latou sisiva ma faailoa mai la latou savali e uiga i le aiga, faaaumea ma le faatuatua. Sa matou iloaina ai, na atoa le tausaga o fai a latou faataitaiga. Na o mai i latou mai nofoaga e mamao e pei o Motu o San Blas ma le itulagi o Changuinola i matusasae o Panama. O le malaga i le taulaga mo le autalavou a San Blas, e manaomia ai aso e tolu e malaga ai i le laueleele ma le sami. Sa matua matagofie ma musuia lea faamoemoe.
I sauniuniga mo le faapaiaga aupito lata mai o le malumalu, i Twin Falls, Idaho, sa fauina ai e tagata o le Ekalesia i le lotoifale se tulaga tele lava i le malae taalaelae o Filer, Idaho, ma sa latou faatumuina le malae palapala i vao ma isi teuga, e aofia ai se afu tele lava e faatusa i le Afu o Shoshone, o se mataaga logologoa e lua maila (3 kilomita) le mamao mai le malumalu fou. I le afiafi o le faafiafiaga, e 3,200 alii talavou ma tamaitai talavou sa ulufale atu i le malae ma talotalo a latou lipine lanumoana ma papae, ma avea ai le malae e pei o se vaitafe tele o loo tafe. Sa faaulutalaina “O Le Vai Ola,” mai le Ioane 4, 10, 14, ma sa aumaia faatasi e le faafiafiaga ia tupulaga talavou mai siteki e 14 i le itulagi o le malumalu fou. Sa latou faapupula mai e ala i pese ma siva, lo latou faalagolago i le vai ola mai le Faaola mo o latou ola faaleagaga, ma lo latou faalagolago i vai mai mauga ma vaitafe i o latou eria mo o latou olaga faaletino. O i matou sa faamanuiaina e molimauina lenei faamoemoe, sa siitia ma faagaeetia.
O au o se lagolago mo na faafiafiaga. E mafai ai e o tatou tupulaga talavou ona auai e faatino se mea latou te le mafaagaloina lava. O faigauo sa latou faavaeina ma manatua na latou maua, o le a fai mo latou e faavavau.
O le masina lea o le a toe faapaia ai le Malumalu o le Aai o Mekisiko, i Mekisiko ina ua maea se faafouga tele. I masina o i luma, o le a faamaea ai le fausaga o isi malumalu, ona fai ai lea o maimoaga ma faapaiaga.
O le taeao nei, ou te fiafia lava e faasilasila atu malumalu fou e lima ia ua maua nofoaga e faatutu ai, ma i masina ma tausaga a sau, o le a fausiaina ai i nofoaga nei: Calgary, Alberta, Kanata; Córdoba, Atenitina; o le eria tele o le Aai o Kansas; Filatelifia, Penisilevania; ma Roma, Italia.
Uso e ma tuafafine, o la tatou au faifeautalai o loo auauna atu i le lalolagi atoa, o loo faaauau pea ona sailia i latou o loo saili mo le upumoni, ia o loo maua i le talalelei a Iesu Keriso. Ua tupu ma le toto’a le Ekalesia, e pei ona i ai talu mai lona faavaeina i le silia ma le 178 tausaga talu ai.
Sa ou maua se avanoa i le ono masina ua tuanai, e feiloai ai ma taitai o atunuu ma sui o malo. O i latou sa matou feiloai, e lagona lava le fiafia i le Ekalesia ma ona tagata, ma e loto fesoasoani ma lagolago mai. Peitai, o loo i ai lava vaega o le lalolagi e le tele so tatou aafiaga o i ai, ma e le o faatagaina ona tatou faasoa saoloto atu i ai le talalelei. E pei ona faia e Peresitene Spencer W. Kimball i le silia ma le 32 tausaga talu ai, ou te fautuaina outou ina ia tatalo mo le tatalaina o na eria, ina ia mafai ona tatou faasoa atu ia i latou le fiafia o le talalelei. A o tatou tatalo i lena taimi, sa tatou vaaia le tutupu o vavega, o le tali i aioiga a Peresitene Kimball, o lea atunuu ma lea atunuu, sa tapunia talu ai i le Ekalesia, ua tatala. O le a toe tulai mai foi lena mea pe a tatou tatalo ma le faatuatua.
O lenei, o’u uso e ma tuafafine, ua tatou o mai iinei ina ia aoaoina ma musuia. O nisi o outou e fou i le Ekalesia. Matou te faafeiloai atu ia te outou. O nisi o outou o loo tauivi ma faafitauli, o luitau, o faanoanoaga, ma ni toesea. Matou te alolofa ia te outou ma tatalo foi mo outou. E tele savali o le a faasoa atu i nei aso e lua. E mafai ona ou faamautinoa atu ia te outou, o na tamalii ma tamaitai o e o le a saunoa atu ia te outou, sa tatalo e uiga i mea o le a latou saunoa atu ai. Sa musuia ma uunaia i latou, a o latou sailia le fesoasoani ma le taitaiga a le lagi.
Ua silafia e lo tatou Tama Faalelagi i tatou taitoatasi ma mea tatou te manaomia. Ia faatumulia i tatou i Lona Agaga a o tatou auai i taualumaga o lenei Konafesi Aoao Lona 178 Faaleafatausaga a le Ekalesia. O la’u tatalo faamaoni lea, ma ou te tuuina atu i le suafa o Iesu Keriso, amene.