Manumalo i le Taua ma le Amioleaga

Elder James J. Hamula

O Le Fitugafulu

Na faatuatuaina outou tou te o mai i le lalolagi i nei aso mulimuli e toe fai le mea sa outou faia foi muamua—e toe filifili le lelei nai lo le leaga.

Ou te talanoa atu i le po nei i o’u uso o le Perisitua Arona. Ou te manao e fesoasoani atu ia te outou ina ia talisapaia atili ma le loloto o outou faasinomaga, o lo outou faamoemoega i le olaga, ma le ala e mafai ai ona outou manumalo i le faataunuuina o lena faamoemoega.

Ua outou o mai i le lalolagi i se taimi e aupito sili ona taua. Ua tatou ulufale atu i vaega faaiu o se taua tele. Na amataina lenei taua i le faavaega o le lalolagi ma sa tuliloaina i taunuuga matautia i le talafaasolopito atoa o le lalolagi. Ou te talanoa e uiga i le taua i le va o soo o Keriso ma i latou uma ua faafitia o Ia o so latou Atua.¹

Na tusia e Ioane le Talifaaaliga e faatatau i lenei taua:

“Ua tau foi le taua i le lagi: o Mekaeli ma ana agelu ua latou tau ma le tarako; na ‘au foi le tarako ma ana agelu e tau ai le taua,

“A ua latou le manumalo; e le toe maua foi i le lagi se mea latou te nonofo ai.

“Ua lafo foi le tarako tele, o le gata tuai lea, ua igoa i le tiapolo, i le ma Satani, o le faasese i le lalolagi uma; ua lafo ifo i le lalolagi, ua lafo foi ana agelu faatasi ma ia.”²

O Satani na faamatua’ia lenei taua i le muai olaga. Na ia faia e ala i lona foua o le fuafuaga o le faaolataga a lo tatou Tama mo Ana fanau, ma le teenaina o le Keriso, o le na filifilia e faataunuu le fuafuaga. E faanoanoa, ona sa mulimuli ia Satani le tasi vaetolu o fanau a lo tatou Tama.³ Ae, e lua vaetolu e lei o ai. O outou na, a’u uo talavou, sa i ai [i lena lua vaetolu], ma ua outou o mai faatasi ma i latou i le lalolagi ina ia faataunuuina le fuafuaga o le fiafia a le Tama.

Ae paga lea, e lei uma ai le taua a Satani ina ua tulia mai le lagi. E pei ona vaai i ai Ioane, sa “lafo ifo i le lalolagi”⁴ ia Satani ma ana au, ma ua o mai iinei “ma le ita tele.”⁵ E mafai ona vaaia le faamaoniga o lo latou ita i le toto masaa ma le matautia ua mafatia ai le tagata mai le amataga o taimi.

Sa maoae ma ogaoga manu’aga na mafatia ai tagata na afua ai ona tutulu le Atua lava Ia,⁶ a o silasila solo ifo o ia i le tulaga o i ai le tagata.

Ua tatou i ai nei i aso mulimuli o le talafaasolopito faaletino o lenei lalolagi. E i ai se aso, o le a toe foi mai ai le Atalii o le Tama i le lalolagi lea na teena ai o Ia, ma toe avea ma Ana.⁷ I lena aso, o le a Ia fusifusia ai Satani ma ana au, ma amatalia ai se afe o tausaga o le filemu ma le amiotonu.⁸ I le faamoemoe atu mo lena aso, ua toefuatai mai ai e le Atua Lona malo i le fogaeleele mo le taimi mulimuli. O lena malo, o le Ekalesia lea a Iesu Keriso o le Au Paia o Aso e Gata Ai.⁹

E ui ina sa faavaeina le malo o le Atua i le fogaeleele i le taimi ua tuanai, o tagata sa tuu atu i ai muamua sa le mafai ona latou tausia. E ui i lea, ua ese le taimi lenei. Ua faapea mai le folafolaga faaperofeta, o le a le leiloa lava le malo o le Atua ae o le a faatoilaloina le lalolagi.¹⁰

Ina ia mautinoa lona manuia atoatoa, o lea na amatalia ai le toefuataiga o le malo o le Atua i le mana faaleagaga e le mafaatusalia,¹¹ ma o loo lagolagoina e lena lava mana faaleagaga ma se isi mea. Na faapolopolo sei o mai i nei aso e gata ai ma galulue mo lo tatou Tama ma Lona Alo, ia nisi o atalii ma afafine e sili ona totoa ma tamalii. Sa faaalia lo latou totoa ma le tamalii i le taua ma Satani i le muai olaga. O iina, “ina ua tuuina atu i ai e filifili le lelei po o le leaga,” sa latou “[filifilia] le lelei” ma sa faaalia ai foi “le faatuatua tele naua” ma “galuega lelei.”¹² O uiga na ua manaomia e lagolago ai le galuega a le Atua i le lalolagi, ma laveaiina ai agaga o tagata mai le ita ua faateleina o le tiapolo.

O lea, a’u uo talavou e o le Perisitua Arona, o outou o na atalii totoa ma le tamalii o lo tatou Tama! O outou “o le malosi o le maota o le Alii, o Lana autau!¹³ O outou o i latou ia na filifilia le lelei nai lo le leaga, ma o e foi na faaalia le “faatuatua tele naua” ma “galuega lelei!” Ma talu ai ona o lo outou talafaasolopito patino, o lea na faatuatuaina ai outou tou te o mai i le lalolagi i nei aso mulimuli e toe fai le mea sa outou faia foi muamua—e toe filifili le lelei nai lo le leaga, faaaoga le faatuatua e tele naua, ma faia galuega lelei—ma faia mo le malo o le Atua i le lalolagi ma o outou uso a tagata!

O le i ai o le malo o le Atua ua toefuatai mai i le fogaeleele ma lo outou ulufale mai i le lalolagi, ua iloa ai e Satani “ua puupuu lona taimi.”¹⁴ O le mea lea, ua tuufaatasia ai e Satani punaoa uma na te mafaia e faatosina ai outou ina ia solitulafono. Ua ia iloa afai e mafai ona ia tosina outou ia solitulafono, e ono mafai ona ia taofia outou mai le avea ma faifeautalai faamisiona, faaipoipo i le malumalu, ma taofia a outou fanau i le lumanai mai le faatuatua, o mea uma e le gata ina faavaivaia ai outou ae faapea foi le Ekalesia. Ua ia iloaina foi e leai lava se mea e mafai ona faatoilaloina le malo o le Atua “vagana ai [o] le solitulafono a [lona] nuu.”¹⁵ Ia outou iloa lelei lenei mea—o le tulimata’iga o lenei taua o outou—outou o loo saili e “tausia poloaiga a le Atua, ma i ai molimau ia Iesu Keriso.”¹⁶

O lenei au uo pele, e manaomia ona outou iloa o o tatou aso i le taimi nei ma aso o loo lumanai, ua “faigata.”¹⁷ I lea tulaga, na saunoa ai Peresitene Boyd K. Packer:

“Ou te le iloa se mea i le talafaasolopito o le Ekalesia po o le talafaasolopito o le lalolagi e faatusatusa i ai o tatou tulaga i le taimi nei. E leai se mea na tupu i Sotoma ma Kumora e sili atu ona amioleaga ma inosia nai lo mea ua siomia ai nei i tatou.”¹⁸

I le ta’ua ai o tulaga matautia o o tatou aso, ou te le o faamoemoe e musuia ai le fefe, ae o le faamaoni a’ia’i. O le faamaoni a’ia’i o lona uiga ia naunau ma faamao’i i le fuafuaina o ou tulaga, ma ia faaeteete ma ia faautauta a o e mafaufau i le taunuuga o au taga e fai. O lea la, o le faamaoni a’ia’i e mapuna mai ai le faamasinoga lelei, faapea foi le amio e faautauta lelei. E leitioa ona fautuaina e perofeta ia alii talavou ina ia faamaoni.¹⁹ Manatua le mea na mata’itu e Mamona na mataalia ai le autau talavou e 2,000 a Helamana i le taua, sa le na o lo latou totoa, malosi, ma le faatuatuaina, ae o lo latou “faamaoni.”²⁰ Sa faatauaina e Mamona lena uiga aua sa faamanuiaina ai foi o ia na te maua. O Mamona lea na tuuina i ai faamaumauga paia o le nuu o sa Nifae ae faatoa 10 ona tausaga, aua o ia o se “alii faamaoni” ma “mafaufau atamai.”²¹ Ma o Mamona foi i le 15 o ona tausaga, na “asiasi mai i ai le Atua” ma “iloa ai foi le agalelei o Iesu” ona e “mafaufau lelei.”²²

O lea, a o tatou ulufale atu i vaega faaiu aupito taua o le taua e faasaga ia Satani, ia outou malamalama lelei a’u uo talavou e. Ia malamalama e le mafai ona e faaaogaina fualaau faasaina, o le ava malosi, po o le tapaa. E le mafai ona e faaaogaina ponokarafi pe auai i isi gaoioiga le mama. E le mafai ona e pepelo, faaimamago, pe gaoi. E le mafai ona e faaaogaina le gagana pepelo, taufaaleaga, pe eleelea. E le tatau ona e faamatagaina lou tino i pe’a ma isi mea e tatui ai. E le mafai ona e faaaogaina nei mea ma e manumalo ai i le taua mo lou lava agaga, ae le tuua ai foi le avea ma se tagata tau lototoa i le taua tele mo agaga o isi fanau uma a lo tatou Tama.²³

Ia malamalama a’u uo talavou e, e na o le tasi lava le ala e manumalo ai i le taua ma Satani, ma o lena ala o le manumalo lea i le ala lava e tasi na manumalo ai i le amataga. Ina ua iu ina ausia le manumalo i le Taua i le Lagi, sa faalogoina se siufofoga o fetalai:

“Ua oo mai nei le faaolataga, ma le malosi, ma le malo o le Atua, ma le mana o lana Keriso… .

“Aua ua latou [e faasino ia Mekaeli ma ana agelu] faatoilaloina o ia [e faasino i le tiapolo] e ala i le toto o le Tamai Mamoe, ma le upu o la latou mau; aua ua latou le faapelepeleina lo latou lava ola, ae tausia la latou molimau e oo lava i le oti.”²⁴ Aua lava nei misi ia te outou le taua o lenei tautinoga. Sa faatoilaloina Satani i le amataga e ala i le (1) faatuatua ia Iesu Keriso ma Lana taulaga togiola, (2) molimau ia te Ia lea na tausisia ma le mausali e oo i le iuga, ma le (3) faapaiaina o le tagata lava ia i le Alii ma Lana galuega. Afai o le auala lea e faatoilalo ai o ia i le amataga, e mafai foi la ona e mautinoa o le auala mautinoa foi lena e faatoilalo ai o ia i le taimi nei.²⁵

Ia atonu o le a e taumanatunatu pe faapefea ona maua le faatuatua, molimau ma le faapaiaina o le agaga e tatau ai mo le faatoilaloina o le fili. Sei ou faamautinoa atu ia te outou, o lena ua i ai ia te outou na uiga auau mama. E na o lou toe faafoisia mai lava o na uiga auau mama. O le mea la lea, faataga mai au ou te tuuina atu ni fautuaga se tolu.

Muamua, ia faia e faapei ona faia e le taulealea o Iosefa Samita. Saili se nofoaga paganoa ma tatalo ai i lou Tama i le Lagi.²⁶ Ia faia e le aunoa ma le faatauanau. O le tatalo o se mea lea e tatau lava ona tupu a o lei oo mai se faaaliga. O le tatalo faifai pea ma le faatauanau, o le faalausosoo mai foi lena o faaaliga. A oo ina maua, e aumaia e faaaliga le faamaoniga po o le faamautinoaga o mea e le o vaaia, o le faavae ia o le faatuatua.²⁷

Lona lua, aoao ia faalogo i le siufofoga o le Alii. O Lona siufofoga e lemu, itiiti ma e pei e musumusu.²⁸ O se siufofoga e lagona nai lo le faalogoina. E oo mai i mafaufauga, lagona, ma uunaiga. Ina ia lagonaina lena ituaiga siufofoga, e tatau ona e toafilemu ma lē gaoia i lou lava agaga, ia faataatia ese lou ata leoleoa ma le mafaufau faasamasamanoa.²⁹ E ui atonu e le faigofie ona matua pulea lou olaga, o le faalogoina o le siufofoga pele, ma le alofa o le Alii o le a lagolagoina ai oe i tulaga uma, ma o le a tauaogaina ai taumafaiga uma lava.

Lona tolu, usitai i le Alii e pei ona tuuina atu ia te oe. O Lana upu e le gata ina alofa ma faamafanafanaina ai ae aoao ai foi e le aunoa ma faasa’o ai. Ia fai e pei ona ia poloaiina ai oe tusa lava po o le a le foliga mai e faigata ona e faia i le taimi nei. O loo i ai i le faia o le finagalo o le Alii le faateleina i lou agaga o le malamalama ma le alofa ia te Ia, lea e taitai atu ai oe i le naunautai atili e tuuina atu lou ola ma mulimuli ia te Ia.³⁰

Ou uso pele o le Perisitua Arona, o o outou aso nei! Aua le faamaumauina! Ia manino lou mafaufau! Ave “le talipupuni o le faatuatua … o le a faaumatia ai ufanafana mu a e amioleaga.”³¹ Ia “e tau ai le taua lelei o le faatuatua.”³² Ma a mae’a ona e tauina, ona e “tu”³³ mausali lea ma ‘vaai atu i le faaolataga a le Alii.”³⁴ Ou te faamautinoa atu ia te oe, o lana faaolataga o le a laveaiina ai oe ma outou mai le leaga. Ou te molimau atu ai i le suafa o le Alii o Iesu Keriso, amene.