Ofo ʻi he ʻOfa ʻOku Fai ʻe Sīsū Maʻakú
Mei ha lea naʻe fai ki he kau ngāue ʻo e Temipale Sōlekí ʻi he ʻaho 24 ʻo Nōvema, 1985.
ʻOku kamataʻaki ʻe ha taha ʻo ʻetau ngaahi himi manakoa tahá ʻa e ngaahi foʻi lea ko e “ʻOku fakaofo.”1 ʻI heʻetau fakakaukau atu ki he moʻui ʻa Kalaisí, ʻoku tau ofo ai ʻi he tafaʻaki kotoa pē. ʻOku tau ofo ʻi Heʻene ngāue ʻi he maama fakalaumālié Heʻene hoko ko e Sihova māfimafí, ko e fakafofonga ʻo ʻEne Tamaí, Tupuʻanga ʻo e māmaní mo e tauhi ʻo e faʻahinga ʻo e tangatá. ʻOku tau ofo ʻi Heʻene hāʻele mai ki he māmaní mo e tūkunga ʻo e ngaahi meʻa naʻe hoko peá Ne toki hāʻele maí.
ʻOku tau ofo ʻi he kamata ke ne fai ʻa e ngāue ʻa ʻEne Tamaí ʻi Hono taʻu 12 pē. ʻOku tau ofo ʻi he kamataʻanga ʻo ʻEne ngāue fakafaifekaú, hono papitaiso Iá mo ʻEne ngaahi meʻafoaki fakalaumālié.
ʻOku tau ofo kotoa pē hono ʻiloʻi naʻe kapusi ʻe Sīsū mo Ne ikunaʻi ʻa e ngaahi mālohi ʻo e tēvoló ʻi he feituʻu kotoa pē naʻá Ne hāʻele holo ai, ʻo aʻu pē ki heʻene fakaʻeveʻeva ʻa e heké, fakaʻā ʻa e kuí, ʻa e tulí ke fanongo, mo e pipikí ke tuʻu. ʻI heʻeku fakakaukau ki he ngāue fakafaifekau ʻa e Fakamoʻuí, ʻoku ou fifili ai, “Naʻe anga fēfē ʻEne fakahoko iá?”
ʻOkú Ne Faʻa Fakamolemole
ʻOku fakaofo ʻaupito kiate au ʻa e momeniti naʻe lea ai ʻa Sīsū hili ʻene feinga ke fua ʻa ʻEne kavenga mamafá ki he tumuʻaki ʻo Kalevalé, ʻo Ne pehē, “ʻE Tamai, fakamolemole ʻa kinautolu; he ʻoku ʻikai te nau ʻilo ʻa ia ʻoku nau faí” (Luke 23:34).
Kapau naʻe ʻi ai ha momeniti ne u ofo lahi taha ai, ko e momeniti ia ko ʻení. ʻI heʻeku fakakaukau ki Heʻene fua e mafatukituki ʻo ʻetau ngaahi angahalá pea fakamolemoleʻi ʻa kinautolu naʻa nau tutuki Ia ki he kolosí, ʻoku ʻikai te u fehuʻi loto pe “Naʻe anga fēfē ʻEne fakahoko iá?” ka ʻoku fehuʻi ʻo pehē, “Ko e hā naʻá Ne fai ai iá?” ʻI heʻeku fakafehoanaki ʻeku moʻuí ki he ʻaloʻofa ʻa e ʻEikí, ʻoku ou ʻiloʻi ai ʻa e ʻikai ke lahi ʻeku muimui kiate Ia ʻo hangē ko ia naʻe totonu ke u faí.
Kiate au, ko ha ofo ʻeni ia ʻoku toe māʻolunga ange. ʻOku feʻunga pē ʻeku ofo ʻi Heʻene malava ke fakamoʻui ʻa e mahakí pea fokotuʻu ʻa e maté, ka kuó u ʻosi aʻusia ʻa e fai fakamoʻuí ʻi ha founga naʻe fakangatangata pē. Ko kitautolú kotoa ʻoku māʻulalo ange ʻetau tuʻunga moʻui tāú, ka kuo tau ʻosi mamata ʻi he toutou fakahoko e ngaahi mana ʻa e ʻEikí ʻi heʻetau moʻuí pea ʻi hotau ngaahi ʻapí ʻaki ʻa e konga ʻo e lakanga fakataulaʻeiki ʻoku tau maʻú. Ka ko e ʻaloʻofá? Fakamolemolé? Fakaleleí? Fefakaleleiʻakí? ʻOku faʻa kehe ia ʻi he taimi ʻoku toutou hoko aí.
Naʻe lava fēfē ke Ne fakamolemoleʻi ʻa kinautolu naʻa nau fakamamahiʻi Iá he momeniti pē ko iá? Neongo ʻa e mamahí, mo e tafe ʻa e taʻataʻá mei he ava kotoa ʻo Hono kilí, ka naʻá Ne kei fakakaukau pē ki he niʻihi kehé. Ko ha toe fakamoʻoni fakaofo foki ʻeni ʻe taha ki Heʻene haohaoa moʻoní mo ʻEne fakaʻamu ke tau haohaoa mo kitautolu foki. ʻI he Malanga he Moʻungá, ki muʻa peá Ne fakahā ko ʻetau taumuʻá ia ke tau haohaoá, naʻá Ne fakahā mai ha meʻa fakaʻosi ʻoku fie maʻu ke tau fai. Naʻá Ne folofola kuo pau ke “ʻofa [ʻa e kakai kotoa pē] ki homou ngaahi filí, tāpuakiʻi ʻa kinautolu ʻoku kapeʻi ʻa kimoutolú, fai lelei kiate kinautolu ʻoku fehiʻa kiate kimoutolú, pea hūfia ʻa kinautolu ʻoku fai kovi mo fakatanga kiate kimoutolú” (Mātiu 5:44).
Ko e taha ʻeni ʻo e ngaahi meʻa faingataʻa taha ke faí.
Ko Sīsū Kalaisi ʻa e tokotaha maʻa taha mo e tokotaha haohaoa pē ʻe taha kuo moʻuí. Ko Ia toko taha pē ʻi māmani kotoa ʻo kamata meia ʻĀtama ʻo aʻu mai ki he lolotongá ni, naʻe taau ke fai ki ai ʻa e hū mo e fakaʻapaʻapá mo e hohoí mo ʻetau ʻofá, ka naʻe fakatangaʻi Ia, siʻaki, pea tāmateʻi. Neongo ʻeni kotoa, ka naʻe ʻikai pē te Ne fakamalaʻiaʻi ʻa kinautolu naʻe fakatangaʻi Iá.
Ko Ia ʻa e Feilaulau Haohaoá
ʻI he taimi ne kapusi ai ʻa ʻetau ʻuluaki mātuʻá, ʻa ʻĀtama mo ʻIvi, mei he Ngoue ko ʻĪtení, naʻe fekau ʻe he ʻEikí “ke na hū ki he ʻEiki ko hona ʻOtuá, pea … ʻoatu ʻa e veloaki ʻo ʻena ngaahi tākanga monumanu īkí, ko e feilaulau ki he ʻEikí” (Mōsese 5:5). Naʻe pehē ʻe he ʻāngeló kia ʻĀtama, “Ko hono tatau ʻeni ʻo e feilaulau ʻo e ʻAlo pē Taha naʻe Fakatupu ʻo e Tamaí, ʻa ia ʻoku fonu ʻi he ʻaloʻofa mo e moʻoni” (Mōsese 5:7).
Naʻe hoko ʻa e feilaulaú ko hano toutou fakamanatu ʻo e loto fakatōkilalo pea mo e mamahi ʻe totongi ʻe he ʻAló ke huhuʻi ʻaki kitautolú. Ko hano toutou fakamanatu ʻo e angavaivai mo e ʻaloʻofa mo e angamalū—io, ʻa e fakamolemole—ʻa ia ʻoku totonu ke hoko ko e konga ʻo e moʻui ʻa e Kalisitiane kotoa pē. Ko e ngaahi ʻuhinga kotoa ʻeni mo ha ngaahi ʻuhinga lahi ange, naʻe feilaulau ʻaki ai ʻi he ngaahi ʻesi feilaulau maká ʻi he taʻu ki he taʻu mo e toʻu tangata ki he toʻu tangata, ʻa e veloaki ʻo e fanga lamí, ʻa ia naʻe maʻa mo taʻe ha mele, pea haohaoa ʻi he meʻa kotoa, ko e fakatātā ʻo e Lami ʻa e ʻOtuá, ko Hono ʻAlo pē Taha Naʻe Fakatupú, ko ʻEne ʻUluaki Fānaú, ʻa ia naʻe haohaoa taʻe hano mele.
ʻI hotau kuongá ni, ʻoku tau toʻo ai ʻa e sākalamēnití---ko ha fakataipe ʻo e feilaulau ʻoku fakahā ai ʻa ʻetau loto-mafesifesí mo e laumālie fakatomalá (vakai, T&F 59:8). ʻI heʻetau maʻu iá, ʻoku tau palōmesi ai ke “manatu maʻu ai pē kiate ia mo tauhi ʻene ngaahi fekaú … ; koeʻuhí ke ʻiate [kitautolu] maʻu ai pē ʻa Hono Laumālié” (T&F 20:77).
ʻI he kuonga ʻo ʻĀtamá mo hotau kuongá ni, ʻoku ʻuhinga e ngaahi fakataipe ʻo e feilaulau ʻa e ʻEikí ke tokoniʻi kitautolu ke tau manatuʻi ke moʻui melino mo talangofua mo ʻaloʻofa. ʻE tokoniʻi kitautolu ʻe he ngaahi ouau ko ʻení ke tau manatuʻi ke fakaʻaliʻali ʻa e ongoongolelei ʻo Sīsū Kalaisí ʻi heʻetau faʻa kātaki fuoloa mo feangaleleiʻakí, ʻo hangē ko ʻEne fakaʻaliʻali ia kiate kitautolu ʻi he funga kolosí.
Ka ʻi he ʻosi atu ʻa e ngaahi senitulí, ko hotau tokosiʻi pē kuo nau fakaʻaongaʻi e ngaahi ouaú ni ʻi he founga totonú. Ko Keini ʻa e fuofua tokotaha ke ne ʻoatu ha feilaulau naʻe ʻikai ke tali. Hangē ko e fakamatala ʻa e Palōfita ko Siosefa Sāmitá: “Naʻe ʻohake ʻe ʻĒpeli ha feilaulau ki he ʻOtuá ʻa ia naʻe tali, ko e veloaki ʻo ʻene tākanga monumanu īkí. Naʻe ʻohake ʻe Keini ʻa e ʻuluaki fua ʻo e kelekelé ko e feilaulau, pea naʻe ʻikai ke tali koeʻuhí he … naʻe ʻikai te ne lava ʻo ngāueʻaki ʻa e tuí ʻa ia naʻe fepaki ʻeni mo e palani ʻo e langí. Kuo pau ke lilingi ʻa e taʻataʻa ʻo e ʻAlo pē Taha naʻe Fakatupú ke fai ʻa e fakalelei maʻá e faʻahinga ʻo e tangatá, he ko e palani ʻeni ʻo e huhuʻí, pea he ʻikai ha fakamolemole taʻe kau ai e lilingi ʻo e taʻataʻá. Pea koeʻuhi naʻe kamata ʻa e feilaulaú ko ha fakataipe ke mamata ai ʻa e tangatá ki he Feilaulau maʻongoʻonga kuo teuteu ʻe he ʻOtuá, ke ʻohake ha feilaulau ʻoku kehe mei ai, ko ia naʻe ʻikai lava ke ngāueʻaki ai ʻa e tuí he naʻe ʻikai fakatau ʻa e huhuʻí ʻi he founga ko iá, pe fakahoko e mālohi ʻo e fakaleleí ʻi he fokotuʻutuʻu ko iá. … Ko e moʻoni, naʻe ʻikai ʻaonga ki ha tangata hono lilingi ʻo e toto ʻo ha manu, tuku kehe pē hono fai ko ha fakatātā, pe fakataipe, pe ko hano fakamatalaʻi ʻo e meʻa naʻe teu ke foaki ʻo fakafou ʻi he meʻaʻofa ʻa e ʻOtuá tonu pē.2
Pea ʻoku ʻi ai ha niʻihi ʻi hotau kuongá ni, ʻoku nau kiʻi hangē pē ko Keiní, ʻo foki ki ʻapi hili ʻenau maʻu e sākalamēnití ʻo fakakikihi mo ha mēmipa ʻo e fāmilí pe loi pe kākā pe ʻita ki hano kaungāʻapi.
Naʻe lea ʻa e palōfita ʻi ʻIsileli ko Samuelá, ʻo kau ki he taʻeʻaonga ke fai ha feilaulau kae ʻikai ke fakaʻapaʻapaʻi ʻa hono ʻuhinga ʻo e feilaulaú. ʻI he angatuʻu ʻa Saula, ko e tuʻi ʻi ʻIsilelí, ki he ngaahi fakahinohino ʻa e ʻEikí ʻaki ʻene foki mai mei he kakai ʻAmalekí mo e “fanga sipi fungani leleí mo e fanga pulú, ke feilaulauʻaki ki [he ʻEiki] ko [hono] ʻOtuá,” naʻe pehē ange ʻe Samuela: “He ʻoku fiemālie tatau pē ʻa [e ʻEikí] ʻi he ngaahi feilaulau tutú, mo e ngaahi feilaulaú, ʻi he fai talangofua ki he leʻo ʻo [e ʻEikí]? Vakai, ʻoku lelei lahi ʻa e talangofuá ʻi he feilaulaú, pea ko e fakafanongó ʻi he ngako ʻo e fanga sipi tangatá” (1 Samuela 15:15, 22).
Naʻe fai ʻe Saula ʻa e feilaulaú ka naʻe ʻikai mahino kiate ia ʻa hono ʻuhinga ʻo ʻene feilaulaú. ʻOku tatau pē ʻeni mo e kāingalotu ʻo e Siasí ʻoku nau ʻalu ki he houalotu sākalamēnití ka ʻoku ʻikai ke nau mohu ʻaloʻofa pe faʻa kātaki pe faʻa fakamolemole ange ai. ʻOku nau fakahoko pē ʻa e ngaahi ouaú ka ʻoku ʻikai mahino kiate kinautolu ʻa e taumuʻa naʻe fokotuʻu ai e ngaahi ouau ko ʻení. Ko e ngaahi taumuʻa ko iá ke tokoniʻi kitautolu ke tau talangofua mo angavaivai ʻi heʻetau fekumi ki ha fakamolemole ʻo ʻetau ngaahi angahalá.
Ko Hono Manatuʻi ʻEne Feilaulaú
Naʻe akonaki ʻa ʻEletā Melevini J. Pālati (1873–1939) ʻi he ngaahi taʻu lahi kuo hilí ʻo pehē ko e ʻOtuá “ko ha ʻOtua fuaʻa—fuaʻa telia naʻa faifai pea tau taʻetokangaʻi mo fakangaloʻi Ia pea tau lau ʻoku ʻikai ke mahuʻinga ʻEne meʻaʻofa maʻongoʻonga taha kiate kitautolú”3—ʻa e moʻui ʻa Hono ʻAló ko e ʻUluaki Fohá.
ʻE anga fēfē leva haʻatau fakapapauʻi he ʻikai ke tau teitei taʻetokangaʻi pe lau ʻoku ʻikai mahuʻinga pe ngalo ʻEne meʻaʻofa maʻongoʻonga taha kiate kitautolú?
ʻOku tau fai ia ʻaki hono fakahā ʻetau holi ke fakamolemoleʻi ʻetau ngaahi angahalá mo ʻetau houngaʻia taʻengatá ʻi he lotu ko ia mei he ngaahi lotu hono kotoa kuo fai ʻi he loto-toʻa, ʻo pehē: “ʻE Tamai, fakamolemole ʻa kinautolu; he ʻoku ʻikai te nau ʻilo ʻa ia ʻoku nau faí.” ʻOku tau fai ia ʻaki ʻetau kau ʻi he ngāue ki hono fakamolemoleʻi e ngaahi angahalá.
“ʻMou fetoutou fefuaʻaki hoʻomou kavengá, pea fakamoʻoni ai ki he fono ʻa Kalaisíʻ (Kalētia 6:2) [ʻOku fekauʻi kitautolu ʻe Paula]. … Ko e fono ʻa Kalaisí, ʻa ia ko hotau fatongia ke fakahoko, ko hono fua ia ʻo e kolosí. ʻOku ʻikai ko e kavenga pē ʻa hoku tokouá kuo pau ke u fuá, ʻa ē ʻoku hā ki tuʻá [mo e tūkunga ʻoku ʻi aí], … ka ko ʻene angahalá. Pea ko e founga pē ʻe taha hono fua e angahala ko iá ko hono fakamolemoleʻi. … Ko e fakamolemolé ʻa e mamahi faka-Kalaisí ʻa ia ko e fatongia ʻo e Kalisitiané ke ne fua.”4
ʻOku moʻoni ko hono ʻuhinga naʻe folofola ai ʻa Kalaisi ʻo pehē, “ʻE Tamai, fakamolemole ʻa kinautolú,” he naʻe aʻu pē ki he houa fakamamahi ko iá mo ʻEne ʻafioʻi ko e pōpoaki ʻeni kuó Ne haʻu ai ʻi hono kotoa ʻo e taʻengatá ke fakahoko maí. Naʻe mei taʻeʻaonga kotoa ʻa e palani ʻo e fakamoʻuí ʻo kapau naʻe ngalo ʻiate Ia neongo ʻa e taʻefakamaau totonú mo e fakamamahí mo e taʻeʻofá mo e talangataʻá ka ko e ngaahi meʻa ʻeni naʻe ʻuhinga ai ʻEne hāʻele mai ke fakamolemoleʻi ʻa e faʻahinga ʻo e tangatá. ʻE lava ke angalelei mo faʻa kātaki mo faʻa fakamolemole ha taha pē ʻi ha ʻaho ʻoku lelei. Ko e tokotaha Kalisitiané kuo pau ke ne angalelei ia mo faʻa kātaki mo faʻa fakamolemole ʻi he ʻaho kotoa pē.
ʻOku ʻi ai nai ha taha ʻi hoʻo moʻuí ʻokú ne fie maʻu ʻa e fakamolemolé? ʻOku ʻi ai ha taha ʻi homou ʻapí, ha taha ʻi homou fāmilí, ha taha ʻi ho kaungāʻapí naʻá ne fai ha anga taʻetotonu pe taʻeʻofa pe taʻefakakalisitiane? ʻOku tau halaia kotoa pē ʻi he ngaahi maumaufono hangē ko ʻení, ka ʻoku pau pē ʻoku ʻi ai ha taha ʻoku fie maʻu ke ke fakamolemoleʻi.
Pea kātaki ʻo ʻoua muʻa naʻá ke fehuʻi pe ʻoku totonu nai ke fua ʻe he tokotaha mamahí ʻa e kavenga hono fai ʻo e fakamolemolé maʻá e tokotaha fakatupu mamahí. ʻOua naʻá ke fehuʻi pe ʻoku ʻikai koā ke fie maʻu ʻe he “fakamaau totonú” ke fai ia ʻe he tokotaha fakatupu mamahí. ʻI he taimi ʻoku tau fai angahala aí, ʻoku ʻikai ke tau kole ʻe kitautolu ʻa e fakamaau totonú. ʻOku tau kole ʻe kitautolu ʻa e ʻaloʻofá—pea ko e meʻa ia kuo pau ke tau loto fiemālie ke foakí.
ʻOku lava nai ke tau sio ki hono fakaoli kae fakamamahi ʻo e ʻikai ke tau fai ki he niʻihi kehé ʻa e meʻa pē ko ia ʻoku tau fuʻu fie maʻu ʻe kitautolú? Mahalo ko e ngāue maʻongoʻonga, māʻoniʻoni mo haohaoa tahá, ke mou lea ʻi he taimi ʻoku mou fehangahangai ai mo e anga taʻeʻofá pea mo e fakamaau taʻetotonú ʻo pehē ko e moʻoni ʻoku mou “ʻofa ki homou ngaahi filí, tāpuakiʻi ʻa kinautolu ʻoku kapeʻi ʻa kimoutolú, [mo] fai lelei kiate kinautolu ʻoku fai kovi mo fakatanga kiate kimoutolú.” Ko e meʻa ia ʻoku fie maʻu ʻi he hala ki he haohaoá.
Ko e Fiefia ʻi he Toe Fakatahá
ʻOku ou manatu ki heʻeku mamata he ngaahi taʻu siʻi kuo hilí ki ha meʻa naʻe hoko ʻi he Malaʻe Vakapuna Fakavahaʻapuleʻanga ʻi Sōlekí. Ne u hū ki tuʻa mei ha vakapuna he ʻaho ko ʻení ʻo lue atu ki he loto fale he malaʻe vakapuná. Naʻe ʻosi mahino pē he taimi ko iá naʻe ʻi ai ha faifekau naʻe foki mai he naʻe fonu e malaʻe vakapuná he ngaahi kaumeʻa mo e kāinga ʻo e faifekaú.
Ne u feinga ke tala e kau mēmipa ʻo hono fāmili tonú. Naʻe ʻi ai ha tamai naʻá ne tui ha suti naʻe ʻikai ke feʻunga lelei mo ia pea ʻi he ākenga motuʻá pea hangē naʻe ʻikai te ne ongoʻi fiemālie hono tuí. Ne hangē ia ha tangata ngoué, he naʻe melomelo hono kilí pea kaukaua, lahi pea patu hono nimá ʻi he ngāué.
Naʻe ʻi ai mo ha faʻē naʻe tutue, pea hangē ia naʻá ne ngāue lahi ʻi he kotoa ʻo ʻene moʻuí. Naʻá ne toʻotoʻo ha holoholo—pea ʻoku ou tui ko ha holoholo līneni ia ki muʻa, ka ʻoku hangē ia ha pepa holoholó he taimí ni. Kuo mei mahaehae ia mei he tatali ko ʻení, pea ko ha faʻē pē ʻa ha faifekau ʻoku foki ki ʻapi te ne lava ʻo ʻiloʻi ʻeni.
Ne lele takai hano ngaahi tehina ʻe toko tolu mo hono tuofāfine iiki angé, ʻo ʻikai ke nau fakatokangaʻi ʻe kinautolu e meʻa naʻe hokó.
Ne u fifili pe ko hai nai ʻa e tokotaha ʻi he kau tali folaú ʻe ʻuluaki ʻalu atu ke feʻiloaki mo e faifekaú. ʻI heʻeku vakai atu ki he holoholo ʻo e faʻeé, naʻá ne fakapapauʻi mai kiate au ko ia.
Lolotonga ʻeku tangutú, ne u sio atu ʻoku ʻasi mai e faifekaú. Ne u ʻilo mei he kaikaila fiefia ʻa e kakai aí ko e faifekaú ia. Naʻe hangē ʻene ʻasí ko e ʻEikitau ko Molonaí, ʻo hā maʻa mo talavou pea tuʻu hangatonu mo māʻolunga. ʻOku ʻikai ha veiveiua kuó ne ʻosi ʻiloʻi ʻa e mahuʻinga ʻo ʻene ngāue fakafaifekaú ki heʻene tamaí mo e faʻeé.
ʻI heʻene ofi mai ki he kulupú, naʻe mahino ʻa e ʻi ai ha tokotaha naʻe ʻikai kei faʻa tatalí. Naʻe ʻikai ko e faʻeé, pea naʻe ʻikai ko ha taha ʻo e fānaú. Ka ko e Tamaí. Naʻe lele atu ʻa e fuʻu tangata lahi mo fakalongolongo ko ʻeni kuo melomelo hono kilí mei he laʻaá, ʻo fāʻofua ʻi hono fohá.
Mahalo naʻe 6′2″ (senitimita ʻe 188) e māʻolunga ʻo e faifekaú, ka naʻe kuku mai ia ʻe he tamai sino lahi ko ʻení pea hiki ia ki ʻolunga ʻo ne mavahe mei he kelekelé, pea naʻá ne pukepuke ia ai ʻi ha taimi lōloa. Naʻá ne kuku fakalongolongo pē ia. Naʻe ala atu e ongo nima ʻo e tamasiʻí ʻo kuku mai ʻene tamaí, pea naʻá na tuʻu pē ʻo fefaʻofuaʻaki. Hangē ne tuʻu maʻu ʻa ʻitānití kotoa. Naʻe hangē ia kuo fakalongolongo kātoa ʻa māmani ko e fakaʻapaʻapa ki ha momeniti toputapu pehē.
Naʻá ku fakakaukau leva ki he ʻafio atu ʻa e ʻOtua ko e Tamai Taʻengatá ki he mavahe ʻa Hono ʻAló ke ngāue fakafaifekaú, ke feilaulau neongo naʻe ʻikai ko ha meʻa Ia ke Ne fai, pea tau pehē pē naʻá Ne totongi pē ʻe Ia ʻEne ngaahi fakamolé, ʻo totongi ʻaki ʻa e meʻa kotoa pē kuó Ne tānaki ʻi he kotoa ʻo ʻEne moʻuí ke foakí. ʻI he momeniti mahuʻinga ko iá, naʻe ʻikai fuʻu faingataʻa ke u fakakaukauloto atu ki he ongo naʻe maʻu ʻe he Tamaí ʻi Heʻene folofola kiate kinautolu naʻe lava ke fanongo kiate Iá, “Ko hoku ʻAlo ʻOfaʻangá ʻeni, ʻa ia ʻoku ou fiemālie lahi aí” (Mātiu 3:17). Pea naʻe lava pē foki ke u fakakaukauloto atu ki ha pehē ʻe he ʻAló ʻi Heʻene foki atu kuó Ne ikuná, “Ko hono ngatá ia” (Sione 19:30). “ʻE Tamai, ʻoku ou tuku hoku laumālié ki ho nimá” (Luke 23:46).
Fakaʻofoʻofa kiate Au
Neongo ʻa e fakangatangata ʻo e meʻa ʻoku lava ke u fakakaukau ki aí, ka ʻoku lava pē ke u sio ki he toe fakataha ko ia ʻi he langí. Pea ʻoku ou lotua ʻe hoko ha toe fakataha pehē kiate kitaua. ʻOku ou lotua ha fakalelei mo ha fakamolemole, ha ʻaloʻofa, pea mo ha tupulaki faka-Kalisitiane pea mo e ʻulungāanga faka-Kalisitiane ko ia kuo pau ke tau fakatupulaki ʻo kapau ʻoku tau fie maʻu ke aʻusia kakato ha momeniti pehē.
ʻOku fakaofo kiate au ʻa e kei ʻi ai ha faingamālie maʻá ha tangata hangē ko aú. ʻOku ʻi ai moʻoni ha faingamālie, kapau naʻe tonu ʻeku fanongo ki he “ongoongo leleí”—maʻaku pea mo koe pea mo kinautolu kotoa pē ʻoku kei ʻamanaki lelei mo feingá pea ʻoange ʻa e faingamālie tatau ki he niʻihi kehé.
[ʻOku fakaofo kiate au ʻene hifo mei hono taloni fakalangí
Ke fakahaofi ha taha angatuʻu mo fielahi hangē ko kita ní. …
ʻOku ou fakakaukau ki he lavea mo toto hono nimá ke totongi e moʻuá!
ʻE ngalo fēfē ʻiate au ha ʻaloʻofa pehē, ha ʻofa pehē, mo ʻene līʻoá?
He ʻikai, ka te u fakahīkihikiʻi mo hū kiate ia ʻi he nofoʻa ʻo e ʻaloʻofá,
Kae ʻoua kuó u punou ʻi hono vaʻé ʻi he taloni nāunauʻiá. …
ʻIo, ʻoku fakaofo, fakaofo kiate au!]5
Naʻe laui taʻu mo laui toʻu tangata hono feilaulauʻaki he ngaahi ʻesi feilaulau maká , ʻa e veloaki ʻo e fanga lamí, ʻa ia naʻe maʻa mo taʻe ha mele, pea haohaoa ʻi he meʻa kotoa, ko hono teuteuʻi kitautolu ki he Lami ʻa e ʻOtuá, ko Hono ʻAlo pē Taha Naʻe Fakatupú, ko ʻEne ʻUluaki Fānaú, ʻa ia naʻe haohaoa taʻe hano mele.
ʻE anga fēfē haʻatau fakapapauʻi he ʻikai ke tau teitei taʻetokangaʻi pe lau ʻoku ʻikai mahuʻinga pe ngalo ʻiate kitautolu ʻEne meʻaʻofa mahuʻinga taha kiate kitautolú—ʻa e moʻui ʻa Hono ʻAlo ko ʻEne ʻUluaki Fānaú? ʻOku tau fai ia ʻaki hono fakahā ʻetau holi ke fakamolemoleʻi ʻetau ngaahi angahalá mo ʻetau houngaʻia taʻengata ʻi he lotu maʻongoʻonga taha ko ia kuo fai ʻi he loto-toʻá, ʻo pehē: “ʻE Tamai, fakamolemoleʻi ʻa kinautolu; he ʻoku ʻikai ke nau ʻilo ʻa ia ʻoku nau faí.” ʻOku tau fai ia ʻaki ʻetau kau atu ʻi he ngāue ʻo e fakamolemolé.
Tā-tongitongi ʻe Dee Jay Bawden; faitaaʻi ʻo e tā-tongitongí ʻe Robert D. Talbot, Iconbronze.com
Tā-tongitongi ʻe Dee Jay Bawden: faitā ʻa Robert D. Talbot, Iconbronze.com
Tā-tongitongi ʻe Steven Lloyd Neal; faitā ʻa John Luke