Ko e Tokotaha Foaki Fakapulipulí
“ʻOku ʻofa ʻa e ʻOtuá ki ha foaki fiefia” (2 Kolinitō 9:7).
ʻOku ou saiʻia au he meʻa kotoa pē kau ki he Kilisimasí: ʻa e ngaahi māmá, hiva kilisimasí, ʻa e taimi mo e fāmilí—ʻa e meʻa kotoa pē ʻoku mau fai ke fakamanatuʻaki e ʻaloʻi ʻo Sīsuú. Pea ʻoku fakatautefito ʻeku saiʻiá ki he maʻu mai e ngaahi meʻaʻofá. ʻOku kamata pē ʻi Sepitema ʻeku hiki e lisi ʻo e ngaahi meʻa ʻoku ou fie maʻú.
ʻI he taʻu ʻe taha naʻe lōloa tatau pē ʻeku lisí mo hoku nimá. Peá u kei fakakaukauʻi pē ha ngaahi meʻa ke tānaki atu ki ai. Naʻá ku fiefia ke fakahā ia ki heʻeku tamaí. “Tēvita, ʻoku ou sio ki he meʻa ʻokú ke loto ke ke maʻu he Kilisimasí,” ko ʻene leá ia heʻene lau ʻeku lisí. “Ka ko e hā hoʻo meʻa ʻe foakí?”
“ʻOku ou ngaohi pē ʻi ʻapiako hoʻomo meʻaʻofa mo e fineʻeikí. Te ma ō mo e fineʻeikí he ʻaho Falaité ʻo kumi mai e meʻaʻofa ʻa Sēnoni mo Soní. Kuó u ʻosi palani kotoa ia ʻe au.”
Naʻe ngū ange pē ʻene tamaí. Heiʻilo pe ko e hā ʻene ʻuhingá ka naʻe ʻikai te ne saiʻia heʻeku talí. Naʻe ʻikai te u saiʻia he ongo ʻo ʻene ngū maí.
ʻI he efiafi fakafāmili hokó, naʻe fakamatala ai ʻeku ongomātuʻá ki he foakí mo e maʻu maí pea mo hono ʻuhinga totonu ʻo e Kilisimasí. Naʻe lava pē ke u sio ki he holo ʻeku lisí ʻo nounou ange ʻi he miniti kotoa pē. Naʻá na ʻeke mai pe naʻe ʻi ai haʻamau ngaahi fakakaukau ʻe tokoni ke mau manatuʻi ai ke toe lahi ange ʻemau foakí. Naʻe hiki nima fiefia ʻa Sēnoni. Naʻá ku māpuhoi atu mo hoku tuongaʻane lahi ko Soní. Ko e ngaahi fakakaukau ia ʻa Sēnoní ʻoku fekauʻaki maʻu pē ia mo hono fai ha ngāue maʻá ha kakai kehe, hangē ko e huo e ngoue ʻa homau kaungāʻapí.
Naʻe pehē ange fiefia ʻe Sēnoni, “Tau fili ha kakai ʻoku taʻelata pe faingataʻaʻia pea tau tuku ʻi honau sitepú ha ngaahi meʻaʻofa kae ʻoua naʻa ʻai ke nau ʻilo pe ko e meʻaʻofa meia hai.”
Naʻe pehē ange ʻe Soni, “Ko ha fakakaukau lelei ia.” “ʻE fakapulipuli ʻaupito.”
Ne u fakakaukau hake, “Mahalo ʻe fakafiefia pē.”
Naʻa mau loto taha kātoa ko ha palani fakaʻofoʻofa ia. Naʻa mau fili ha fāmili ʻe ua. Ko e taha ai ko e fāmili Suenisoní ʻi homau uōtí. Talu pē e foki ʻa Misa Suenisoni ki he akó mo e ʻikai pē ha taimi te nau maʻu ai ha paʻanga feʻunga. Naʻe tokolahi foki ʻenau fānaú, pea te nau saiʻia ʻaupito ke maʻu ha ngaahi meʻa fakaʻohovale ʻi he Kilisimasí. Ko e fāmili ʻe tahá ko Misa mo Mīsisi Pelesi, ko ha ongomātuʻa matuʻotuʻa ange kinaua naʻá na nofo ki kō atu he halá. Naʻe hangē maʻu pē ʻokú na kiʻi taʻelatá.
Ne mau ō kātoa ke kumi mai e ʻū meʻaʻofá. Ne mau loto taha ke mau fakatau ʻaki mai e ngaahi meʻaʻofá ʻa e paʻanga naʻa mau mei fakatau mai ʻaki ʻemau ʻū meʻaʻofa pē ʻamautolú. Naʻe sai pē ia kiate au. Naʻe lahi ange ʻeku fiefiá ʻaʻaku he fili e meʻavaʻinga maʻá e fānau tangata iiki ange ʻa e fāmili Suenisoní. Naʻe ʻikai toe mahuʻinga kiate au e ngaahi meʻa ia naʻá ku fie maʻú.
Naʻa mau fakakaukau ke ʻave ha meʻaʻofa ʻe taha ʻi he pō ki he fāmili takitaha ʻo kamata he ʻaho ʻe 12 ki muʻa he Kilisimasí. ʻI heʻene aʻu ki he pō ʻuluakí, naʻá ku tui ha fuʻu kofu ʻuliʻuli pāpātoho pea fakaʻuli leva ʻa Soni ʻo ʻave au ki he fale ʻo e fāmili Suenisoní. Ne u tuku fakalongolongo hifo e meʻaʻofa ʻuluakí ʻi he falefakatoló, lomiʻi e fafangu he matapaá, peá u lele ʻaki e vave tahá. Ne u puna ki ha tuʻa ʻā mo e fakaava hake e matapaá ʻe ha taha ʻo e fānaú. Naʻe lava pē ke u fanongo atu ki honau leʻó ʻi heʻenau ʻohovale hono maʻu e meʻaʻofá. Ne u ongoʻi e fuʻu fiefia lahi. Kuo kamata ʻeku moʻui ko ha Tokotaha Foaki Fakapulipulí.
Naʻe ʻalu pē taimí mo ʻene lelei angé—mo toe faingataʻa ange foki. Naʻe pau ke mau ō ʻi ha taimi kehekehe ʻi he pō kotoa pē pea taimi ʻe niʻihi naʻa mau ō ai he pongipongí he naʻe kamata ke fakasiosio mai e fānau Suenisoní ia he matapā sioʻatá ʻi heʻenau feinga ke maʻu kimautolú. Pea ko e taimi kotoa pē naʻá ku tolotolo atu ai ki he sitepu ʻo Misa mo Mīsisi Pēlesí, ne u fakakaukauloto atu pē ʻoku talitali mai ʻa Mīsisi Pēlesi ke ne fakaava fakavave hake ʻa e matapaá, fāʻofua kiate au, mo talamai ko ha tokotaha lelei au. Kuo pau ke u fakaʻehiʻehi ʻaupito mei haʻane hoko. Ko e konga ʻe taha naʻe fakafiefia aí ko hono ʻai ke ʻoua ʻe toe ʻilo ki ai ha tahá.
Ko e kamataʻangá pē ʻa e taʻu ko iá. ʻI he Kilisimasi hoko aí, naʻa mau fili ha fāmili naʻe ʻi ai ʻenau taʻahine naʻe tuʻo 11 ʻene tokoto ʻi falemahakí he taʻu pē ko iá mo e fāmili ʻe taha naʻe puke ʻenau faʻeé he kanisaá. Masiʻi—naʻe ʻikai te u ʻilo ʻe au naʻe faingataʻaʻia pehē ha kakai. Ko ʻeni kuo toe hokosia e
Kilisimasí, pea kuo mau fakakaukau ke tokoni ki ha fāmili ʻe tolu. Ko e konga faingataʻa tahá hono fili kinautolú. Hangē naʻe fuʻu tokolahi e kakai naʻe fie maʻu ke fai hanau kiʻi fakafiefiaʻi he Kilisimasí.
Kae fēfē leva ʻeku lisí? Naʻe holo pē ʻo toe kiʻi nounou ange ʻi he taʻu takitaha. ʻOku ou fuʻu femoʻuekina hono fokotuʻutuʻu ʻeku ngaahi palani ki he Tokotaha Foaki Fakapulipulí ʻo ʻikai haku taimi ke u fakakaukau ai ki heʻeku fie maʻu ʻaʻakú. ʻOku ʻi ai ha ngaahi meʻaʻofa ke fili mo ha ngaahi palani ngāue ke fokotuʻutuʻu.
Ka ʻoku pau e meʻa ʻe taha—ʻoku fakafiefia hono fai ha meʻa maʻá e niʻihi kehé. ʻOku ʻikai lakasi ʻe ha meʻa ʻa e ongo ko ia ʻoku ou maʻu ʻi heʻeku vakai atu ki he ʻohovale mo e fiefia ʻi he mata ʻo e kakai ʻoku mau tokoniʻí. Kuo hoko e foakí ko e taha ʻo e ngaahi meʻa ʻoku ou saiʻia taha ai he Kilisimasí.
Ngaahi tā fakatātā ʻa Matt Smith; faitā ʻa e Busath Photography