Mei he Moʻui ʻa e Palōfita ko Siosefa Sāmitá

Ko Hono Fakapoongi ʻo e Palōfitá

Naʻe toʻo mei he tohi ʻa Reed Blake ko e “Martyrdon at Carthage,” Ensign, June 1994, 30–38; vakai foki, Ngaahi Akonaki ʻa e Kau Palesiteni ʻo e Siasí: Siosefa Sāmita (Tohi lēsoni ʻa e Lakanga Taulaʻeiki Faka-Melekisētekí mo e Fineʻofá, 2007), xxiii, 27–28, 532, 611–12.

Naʻe loto ha kakai angakovi ke tāmateʻi ʻa Siosefa Sāmita. Naʻá na fakakaukau mo hono tokoua ko Hailamé ke na mavahe mei hona ongo ʻapi ʻi Nāvuú ke na hao. Naʻá na lea fakamāvae ki hona ongo fāmilí pea kamata ʻena fonongá.

ʻOku kumi ʻe ha kau tangata ʻa hoku tokoua ko Siosefá ke tāmateʻi, pea kuo fakatokanga ʻe he ʻEikí kiate ia ke ne hola ki he ʻOtu Moʻunga Maká ke ne hao.

Naʻe haʻu ha kau sōtia ki Nāvū ke puke pōpula ʻa Siosefa mo Hailame. Naʻe hohaʻa e loto ʻo e kakai ʻi Nāvuú ki ha meʻa ʻe fai ʻe he kau sōtiá, ko ia naʻe fekau atu ʻe ʻEma ha kau tangata ke fakahā kia Siosefa mo Hailame. Naʻá na fakakaukau ke na ō ki Kātesi. Naʻe ʻiloʻi ʻe Siosefa te ne mate ai.

ʻOku ou ʻalu ʻo hangē ko e lami ke tāmateʻi; ka ʻoku nonga hoku lotó ʻo hangē ko e pongipongi malū ʻi he faʻahitaʻu māfaná; ʻoku ou maʻu ʻa e konisēnisi ʻoku ʻataʻatā mei he fai hala ki he ʻOtuá pea ki he kakai kotoa pē. Te u mate ʻoku ou taʻehalaia, pea ʻe pehē ʻo kau kiate au ʻi he kahaʻú—naʻe fakapoongi ia ʻi he anga-fitaʻa.

Naʻe puke ʻe ha ʻōfisa polisi ʻa Siosefa mo Hailame pea ʻave kinaua ki he Fale Fakapōpula ko Kātesí. Naʻe ʻaʻahi ha kakai tokolahi ki he Palōfitá ai. ʻI he ʻaho 27 ʻo Sune 1844, naʻá ne ʻi he loki ʻi ʻolunga ʻo e fale fakapōpulá mo Hailame, ʻEletā Sione Teila, mo ʻEletā Uiliate Lisiate.

Naʻe vela ʻaupito e ʻea he lokí ʻi he hoʻatā ko iá. Naʻe fakaava ʻe he kau tangatá ʻa e matapā sioʻatá ke mokomoko. Naʻe lautohi ʻa Hailame lolotonga ko iá naʻe talanoa ʻa Siosefa ki he tangata leʻó. Naʻe hivaʻi ʻe Sione Teila ʻa e “Ko ha Tangata Fononga Fonu he Loto Mamahi” (Ngaahi Himi, fika 17).

Ko ha tangata fononga fonu he lotomamahí naʻá ma faʻa fetaulakí.

Kātaki muʻa Sione ʻo toe hivaʻi e foʻi hiva ko iá.

ʻE Misa Hailame, ʻoku ʻikai te u ongoʻi ʻoku ou fie hiva.

Te ke maʻu pē ʻa e ongo ko iá.

Naʻe tuʻu takai he fale fakapōpulá ha kau tangata anga kovi mo loto ʻita. Hili iá naʻa nau kaka hake he sitepú mo fana ʻenau ngaahi meʻafaná. Naʻe mate ʻa Hailame.

ʻOiauē! Siʻoku tokoua ko Hailamé.

Naʻe fana tuʻo ono ʻa Siosefa ko e feinga ke taʻofi e kau fakatangá. Hili iá naʻá ne lele ki he matapā sioʻatá. Naʻe fanaʻi ia ʻe ha niʻihi ʻo e kau fakatangá peá ne tō ki tuʻa ʻi he matapā sioʻatá.

ʻE ʻEiki, ko hoku ʻOtua!

Naʻe loto-mamahi e Kāingalotu ʻi Nāvuú ʻi heʻenau fanongo ʻi he pekia ʻa e Palōfitá. Naʻe hūfia ʻe ha kakai ʻe toko 10,000 tupu ʻa e fale ʻo Siosefá ke mamata ki he sino ʻo e Palōfita ʻofeiná mo hono tokouá.

“Kuo fai ʻe Siosefa Sāmita, ko e Palōfita mo e Tangata Kikite ʻa e ʻEikí, ha meʻa lahi ange ki hono fakamoʻui ʻo e faʻahinga ʻo e tangatá ʻi he māmaní, tuku kehe ʻa Sīsū pē, ʻi ha toe tangata ʻe toko taha ʻa ia naʻe moʻui ʻi ai ʻi ha kuonga. … Naʻe fisifisimuʻa ʻa ʻene moʻuí, pea pekia ʻoku tuʻukimuʻa ʻi he ʻao ʻo e ʻOtuá mo hono kakaí; pea … kuó ne fakamaʻu hono tufakangá mo ʻene ngaahi ngāué ʻaki hono toto ʻoʻoná” (T&F 135:3).

Ngaahi tā fakatātā ʻa Sal Velluto mo Eugenio Mattozzi