Ko ʻEku Meʻaʻofa Kilisimasi Lelei Tahá
Ko hoku taʻu uá pē ia pea puke lahi ʻeku faʻeé. Naʻe ʻikai ha taha ke tuku au ai ko ia naʻá ne ʻave pē au ʻo ma ō ki he falemahaki ʻi Tupisa ʻi Poliviá. Naʻe taimi nounou pē mei ai kuó ne mālōlō, peá u siʻi paea leva.
Lolotonga ʻeku tupu haké pea ʻi hoku taʻu hongofulu tupu siʻí, naʻe ʻave au mei he feituʻu ʻe taha ki he feituʻu ʻe taha, pea naʻe ʻikai ʻaupito ke u ʻiloʻi pe ko e meʻa fēfē ke ʻi ai hato fāmili, pea naʻe teʻeki ai ke u maʻu ha faʻahinga meʻaʻofa ʻe taha—aʻu pē ki hoku ʻaho fāʻeleʻí pe Kilisimasí.
ʻI heʻeku tupu toko taha haké, naʻá ku fehangahangai mo ha ngaahi faingataʻa pea mo ha ngaahi meʻa fakatuʻutāmaki lahi. Ne u toki ʻilo ki mui tā ne ʻikai pē ha taimi ia te u toko taha ai pea naʻe maluʻi au ʻe he toʻukupu ʻo e ʻOtuá.
ʻI hoku taʻu 15, naʻe fakaafeʻi au ke u nofo mo ha fāmili Siasi. Naʻe kiʻi motuʻa siʻi pē hona ʻofefiné ʻiate au, pea naʻá ne ʻave au ki he Mutualé. Naʻe talitali lelei au ʻe he tokotaha kotoa pē ai pea nau tokanga mai kiate au. Ko e fuofua taimi ia ʻi heʻeku moʻuí ke ʻofa mo angalelei mai ha kakai kiate au.
Naʻe fakafeʻiloaki au ki he ongo faifekaú, peá na kamata akoʻi au. Naʻe ʻikai fuoloa kuó u ʻiloʻi naʻe ʻi ai ʻeku Tamai Hēvani ʻofa, ʻa ia naʻá Ne maluʻi au ʻi he kotoa ʻo ʻeku moʻuí. Naʻá ku tali ʻa e ongoongoleleí pea papitaiso au ʻi he Efiafi Faka-Kilisimasi ʻo e 1978. Ne u maʻu ʻi he efiafi ko ʻení ʻa ʻeku fuofua meʻaʻofa Kilisimasí ʻa ia ʻoku ou kei mahuʻingaʻia taha aí: ko ʻeku kau ki he Siasi ʻo e ʻEikí.
Ne toki hokohoko mai ai mo ha ngaahi meʻaʻofa kehe. Hili ha taʻu ʻe ua mei ai ne u feʻiloaki mo ha tangata naʻe ʻikai kau ki he Siasí. Ne u ʻave ia ki he lotú, pea hili ʻene fakahoko ʻene ngaahi fuakava ʻo e papitaisó, naʻá ma mali. Ne tāpuakiʻi au mo hoku husepānití ʻe he Tamai Hēvaní ki mui ai ʻaki ha fānau e toko tolu, ʻa ia naʻe silaʻi kiate kimaua ki he nofo taimí mo ʻitāniti ʻi he Temipale Puenosi ʻAealesi ʻĀsenitiná.
ʻI heʻeku kei siʻí, naʻe ui au ʻe he tokotaha kotoa pē “ko e kiʻi taʻahine paea fakaʻofá.” ʻI heʻeku manatu ki ai he ʻaho ní, ʻoku ou ongoʻi ʻa e loto houngaʻia he tāpuaki ko hono ʻiloʻi ʻoku ʻi ai ʻeku Tamai naʻe ʻofa maʻu pē ʻiate au. Kuó u aʻusia foki mo e ʻofa taʻefakangatangata ʻa e Fakamoʻuí. Naʻá Ne toe fakafoki mai Hono Siasí ʻi he Palōfita ko Siosefa Sāmitá, ʻa ia naʻe fili ʻi he maama fakalaumālié peá ne ngāue faivelenga ke liliu e Tohi ʻa Molomoná. ʻOku ou ʻilo ʻoku ʻi ai e kakato ʻo e ongoongoleleí.
Ne u maʻu ʻeku meʻaʻofa Kilisimasi ʻuluaki mo lelei tahá ʻi hoku taʻu 15, pea talu mei ai mo ʻeku maʻu ʻa e ngaahi ʻaloʻofa ongongofua ʻa e ʻEikí. ʻOku ou kei ongoʻi loto houngaʻia pē ʻi he meʻaʻofa ko iá, pea ʻoku ou feinga ke tuku maʻu pē ʻeku ngaahi fakakaukaú ʻi he moʻui kahaʻú ʻa ia ʻoku ou ʻamanaki atu ke fakamālō ai ki he Tamaí mo e ʻAló pea nofo ʻo taʻengata mo hoku fāmili ʻofeiná.