Ko ha Pōpoaki Faka-Kilisimasi mei he Kau Palesitenisī ʻUluakí ki he Fānau ʻo e Māmaní

Ko e Muimui ʻi he Māmá

“Pea kuo ʻaloʻi ʻa Sīsū ʻi Pētelihema ʻi Siutea, ʻi he ngaahi ʻaho ʻo Hēlota ko e tuʻí, vakai, naʻe haʻu ʻa e kau tangata poto mei he potu hahaké ki Selusalema,

“ʻO pehē, ʻOku ʻi fē ia ʻa ia kuo ʻaloʻi ko e Tuʻi ʻo e kakai Siú? He kuo mau mamata ʻi he potu hahaké ki hono fetuʻú, pea kuo mau haʻu ke hū kiate ia” (Mātiu 2:1–2).

Naʻe muimui ʻa e Kau Tangata Potó ʻi he maama ʻo e fetuʻú ke kumi mo hū ki he Fakamoʻuí. ʻOku tau hū kiate Ia ʻaki ʻetau muimui ʻi he maama ʻo ʻEne faʻifaʻitakiʻangá. ʻOku haohaoa ʻa Sisū Kalaisi, ko e ʻAlo ʻo e ʻOtuá, ʻi Heʻene talangofuá, ʻaloʻofá, mo e angaʻofá. Naʻá Ne fakamoleki hono taimi ʻi māmaní ʻi he ngāue tokoní, peá Ne foaki ʻEne moʻuí kae lava ke tau fakatomala pea moʻui ʻo taʻengata. Koeʻuhí naʻá Ne haʻu ki he māmaní, ʻoku tau ʻiloʻi ai ko hai ʻa kitautolu: ko ha fānau ʻofeina ʻa e Tamai Hēvaní.

Fakatauange ko e Kilisimasi ko ʻení te tau hiva ai ʻi he fiefia, lotu ʻi he houngaʻia, pea fai ha ngaahi ngāue ʻi he angaʻofa. ʻI heʻetau feinga ke tau hoko ʻo hangē ko e Fakamoʻuí, te tau maʻu ai ʻa e fiefia mo e nēkeneka lolotonga ʻa e faʻahitaʻu fakaʻofoʻofa ko ʻení pea mo e melino ʻi he ʻaho takitaha ʻo e taʻú.

Palesiteni Thomas S. Monson

Palesiteni Henry B. Eyering

Palesiteni Dieter F. Uchtdorf

Naʻa mo e Kau Tangata Poto ʻo Māmaní Kuo Pau ke Nau Muimui ʻi he Fakahinohino Fakalangí, tā ʻe J. Leo Fairbanks, ʻi he angalelei ʻa e Musiume Hisitōlia mo e ʻAati ʻa e Siasí.