Ko Ha Lēsoni Taʻeʻamanekina
Hili ʻeku hiki ki Niu ʻIoke Siti ʻi heʻeku ngāué, naʻá ku ʻalu ʻi ha efiafi ʻe taha ʻi Tīsema ʻo fakatau mai ha ngaahi meʻa naʻá ku fie maʻu ki hoku ʻapi nofoʻanga foʻoú. Ne toki tō foki ha afā he koló, pea naʻe ʻalu hake pē ʻa e sinoú he halá ʻo aʻu ki he tuí. Ne u tui ha kote māfana peá u ʻalu atu ki he lēlué fakataha mo ha kakai ne nau femoʻuekina he fai ʻenau ngaahi fakatau Kilisimasí.
Ne u fiu he tatali ke tau mai e lēlué, mo fakakaukau pē ki heʻeku lisi fakataú. ʻI he faifai pea tau mai e lēlué, ne u manga hake ki loto ʻo fakasio ha sea ke u tangutu ai. Ko e sea ofi taha maí ne hanga hake ki ha tangataʻeiki tukuhausia. Naʻe ʻikai hano kote māfana pe vala matolu. Ko ʻene meʻa pē naʻe toʻotoʻó ko ha ʻū tangai milemila naʻe fonu he fanga kiʻi meʻa noaʻia pē.
Naʻe ʻikai te u fie nofo ofi ki ai ko ʻene nanamu taʻefeʻungá, pea tupu mei he ʻasi taʻemaau hono fōtungá ne u fifili naʻa ko ha tokotaha fakatuʻutāmaki nai ia. Ka ko e meʻa lahi tahá ʻa e ʻikai te u fie maʻu ke kole silini maí. Ne u lue fakavave ki he tafaʻaki ʻe tahá ʻo tangutu he sea aí. Naʻe ʻalu kotoa foki mo e kau pāsese kehé ki he tafaʻaki ʻe taha ʻo e lēlué kae nofo toko taha pē ʻa e tangatá.
Taimi siʻi pē kuo heka hake ha talavou ki he lēlué peá ne tangutu hifo he sea ʻi muʻa tonu pē he tangataʻeikí. Naʻe ʻikai toe momou e talavoú ka ne malimali atu ki he tangataʻeikí, lulululu mo ia, pea lea fakafeʻiloaki fiefia ange. Naʻe mata fiefia ʻa e tangataʻeikí, pea kamata ke na talanoa lelei. Naʻá na talanoa he miniti ʻe 15 hoko aí, ʻo na fiefia pē heʻena feohí.
ʻI heʻeku vakai ki aí, naʻe fakamanatu mai ai kiate au ʻa e laumālie totonu ʻo e faʻahitaʻu Kilisimasí. Lolotonga pē ʻena talanoá kuo tuʻu hake ʻa e talavoú ʻo vete hono uasikoté, soté, mo ha sote nima lōloa naʻá ne tui ʻi loto. Naʻá ne tui pē hono sote ʻi lotó ka ne ʻoange ʻa e sote nima lōloá ki he tangataʻeiki tukuhausiá. Naʻe tali ia ʻe he tangataʻeikí mo e fakamālō ange, pea toe hoko atu pē ʻena talanoá. Ne u hifo mei he lēlué he tauʻanga lēlue hono hokó kuo ongo ki hoku lotó e angaʻofa ʻa e talavoú. Ne u ongoʻi halaia ʻi heʻeku siokitá, ka naʻá ku fakaʻamu ke u hoko ko ha tokotaha lelei ange.
Naʻe hāʻele mai e Tuʻi ʻo e ngaahi tuʻí ki he māmaní ʻi he feituʻu māʻulalo tahá, ʻa ia ko ha ʻaiʻangakai ʻo e manú. Naʻe foaki ki he māmaní ha meʻaʻofa mahuʻinga mo fakamoʻui—ko e ʻAlo ʻo e ʻOtuá. ʻOku hounga kiate au ʻa e meʻaʻofa ʻo e Fakamoʻuí ʻi heʻeku moʻuí pea mo hono fakamanatu mai ʻo ʻEne ʻofa taʻefakangatangatá mo ʻEne manavaʻofa ki he fānau ʻa e ʻOtuá. ʻI he faʻahitaʻu Kilisimasi ko iá, ne u ongoʻi ha holi foʻou ʻi hoku lotó ke u toe angaʻofa ange, toe lahi ange ʻeku taʻesiokitá, peá u feinga ke tatau ange mo hoku Fakamoʻui ko Sīsū Kalaisí.