Ngaahi hiva Kilisimasi ʻi he funga Fonuá
Naʻe fuʻu mahuʻinga maʻu pē ʻa e mūsiká mo e hivá ki hoku fāmilí. ʻI heʻeku kei tupu haké, naʻe tā ʻe hoku tokouá ʻa e pianó ka mau haʻohaʻo takai mo hoku ngaahi tokoua mo e tuongaʻane ʻe toko nimá ʻo hivaʻi e ngaahi hiva ʻa e Siasí naʻa mau saiʻia taha aí. ʻOku kau ʻeni ʻi he ngaahi taimi fakangalongataʻa taha kiate au.
Hili ʻeku ʻosi mei he akoʻanga māʻolungá, ne u nofo ʻo ofi pē ki hoku fāmilí ʻo aʻu ki heʻeku mali mo ha tangata lelei naʻe ngāue ʻi he Laulā Puna ʻa ʻAmeliká ʻi homau koló. Hili mei ai ha taʻu ʻe taha mo e konga, naʻá ku hiki mo hoku husepānití mo ʻema kiʻi pēpē fefine māhina ʻe uá, ki ha ʻuluʻi ʻapitanga sōtia ʻi he tafaʻaki ʻe taha ʻo e fonuá. Naʻe ʻi ai mo ʻema pēpē ʻe taha, pea koeʻuhí ko e ngaahi fakamole ki he ongo pēpeé, naʻe ʻikai te ma toe lava ʻo foki ke ʻaʻahi ki homa ongo fāmilí. Naʻe ʻikai foki ke lava ʻo ʻaʻahi ange ʻeku ongomātuʻá koeʻuhí ko e fānau ʻe toko ono naʻe kei ʻi ʻapí. Ne u faʻa ongoʻi taʻelata ʻi heʻeku nofo mamaʻo mei hoku fāmilí mo ʻeku ʻofa ki hoku husepānití ʻi heʻene faʻa ʻalu ʻi he ngaahi ngāue fakakautaú. Ko e taimi faingataʻa tahá ʻa e ngaahi ʻaho mālōloó.
ʻI he Efiafi kimuʻa he ʻaho Kilisimasi ʻo e 1966, lolotonga ia ʻeku kau atu mo hoku husepānití pea mo ʻema ongo kiʻi tamaikí ki heʻemau ngaahi ʻekitivitī tukufakaholo ʻo e Efiafi kimuʻa he ʻAho Kilisimasí, naʻe toutou haʻu ki heʻeku fakakaukaú ʻa ʻeku ongomātuʻá mo e ngaahi tokouá mo e tuongaʻané. Ne u sio hake ki he uasí peá u ʻiloʻi ʻoku nau lolotonga tangutu ʻi ha sipi kafu kuo folahi fakalelei ʻi he falikí ʻo fai ha “kaimeʻakai faka-Kilisimasi” ʻa ia ko e fuaʻiʻakau, fanga kiʻi sōsisi, siisi, mo e mā pakupaku lolotonga iá ʻoku lau ʻe heʻeku tamaí mei he folofolá ʻa e talanoa ki he ʻaloʻi ʻo Kalaisí. Naʻá ku sio loto atu pē ki honau matá. Ko e mata pē ʻoʻokú ʻe ʻikai ke ʻi aí.
ʻI heʻeku fakalaulauloto ki aí, ne u lotu ke ʻi ai ha founga te u ongoʻi vāofi ange ai mo e toenga ʻo hoku fāmilí. Fakafokifā pē kuo tatangi e telefoní, peá ma talanoa mo ʻeku faʻeé. Naʻá ne talamai ʻoku ʻi ai e meʻa ʻokú ne fie maʻu ke ma fanongo ki ai. Naʻá ku fakamoʻui e meʻa fakaongo leʻolahi ʻo e telefoní, peá ma fanongo kae haʻohaʻo takai hoku ngaahi tehina ʻe toko tolú ʻi he piano ʻa e fāmilí ʻo hivaʻi e fasi fakaʻofoʻofa taha ʻo e “Do You Hear What I Hear [ʻOkú ke Fanongo ki he Meʻa ʻOku ou Fanongo Ki aí]?” Ne ma loʻimataʻia mo hoku husepānití ʻi heʻema fanongo ki he ongo mai mei heʻema telefoní ʻa e hiva faʻahi-tolú. Naʻá ma ongoʻi ʻa e hangē naʻá ma ʻi he lokí pē mo hoku fāmilí.
Naʻe ʻomi ʻe he kiʻi hiva faingofua naʻa nau hivaʻí ha laumālie fakaʻofoʻofa ki homau ʻapí he Efiafi Faka-Kilisimasi ko iá pea te u mataʻikoloaʻaki maʻu pē ia. Neongo kotoa e ngaahi meʻaʻofa ne ma maʻu he Kilisimasi ko iá, ko e niʻihi naʻe fakatau mei falekoloa pea kofukofuʻi fakalelei mo tohi ai homa hingoá, ka ko e meʻaʻofa naʻe mahuʻinga taha kiate kimauá ko e foʻi hiva mālie ko iá.