Maʻá e Ngaahi Kaumeʻa Īkí
Ko Hono Fakahā ʻo ʻEtau ʻOfa kia Sīsuú
“He kuo ʻaloʻi kiate kimoutolu ʻi he ʻahó ni, ʻi he kolo ʻo Tēvitá,ʻa e Fakamoʻui, ʻa ia ko Kalaisi ko e ʻEikí” (Luke 2:11).
Naʻe sio pē ʻa Sinei kae tuku ʻe he Fineʻeikí ʻa e keke hinehina naʻá ne toki taʻó ʻi he tēpile ʻi peitó. Ko e Pō Faka-Kilisimasí e pooni, ʻa ia ʻe fakamanatu ai ʻe hono fāmilí ʻa e ʻaloʻi ʻo Sīsuú.
Naʻe saiʻia ʻa Sinei he ʻalu holo ʻo hiva Kilisimasi mo hono fāmilí, taʻo mā sinisaá, mo teuteuʻi e fuʻu ʻakaú. Ka ko e meʻa naʻá ne saiʻia taha hono fai he Kilisimasí ko e manatu ki he ʻaho ʻaloʻi ʻo Sīsuú.
ʻE lava ke u tokoni atu ʻi hono ʻai e kilimi ʻo e keké?
ʻE fie maʻu ke ʻuluaki tuku ia ke mokomoko.
Naʻe tokoni ʻa Sinei ki he Fineʻeikí ʻi hono fakamaʻa e funga kānitá mo fufulu e ipú. ʻOkú ke pehē kuo ʻosi mokomoko e foʻi keké?
ʻOku ou tui pē kuo sai.
Naʻe valiʻaki ʻe he Fineʻeikí mo Sinei e kilimi hinehiná ʻa e foʻi keké.
Hili e kai efiafí naʻe kole ʻa e Tangataʻeikí ki he fāmilí ke nau fakataha mai ki he loki talanoá. Neongo ʻoku tau ʻiloʻi naʻe ʻaloʻi ʻa Sīsū ʻi he faʻahitaʻu failaú, ka ʻoku tau saiʻia ke fakamanatu Hono ʻaho ʻaloʻí ʻi he taimi ko ʻeni ʻo e taʻú.
Naʻe lau ʻe he Fineʻeikí ʻa e talanoa ki he ʻaloʻi ʻo Sīsuú mei he Tohi Tapú mo e Tohi ʻa Molomoná. Hili ko iá naʻe fai ʻe he Tangataʻeikí ʻene fakamoʻoní ʻo kau ki he Fakalelei mo e Toetuʻu ʻa Sīsuú.
Naʻe fakaava tahataha ʻe he kau mēmipa ʻo e fāmilí ʻenau ngaahi meʻaʻofa kia Sīsuú pea lau mo e meʻa kuo nau tohiʻi ʻi ha laʻipepa. Naʻe tokoni ʻa e Fineʻeikí kia Sinei ke ne tohiʻi ʻeni, “Toe loto ʻapasia ange ʻi he lotú.”
ʻOku ou laukauʻaki kimoutolu takitaha. ʻOku fakahā ʻe hoʻomou ngaahi meʻaʻofá ʻa hoʻomou ʻofa kia Sīsū Kalaisí.
Naʻe tofi ʻe he Fineʻeikí ʻa e keké pea tufa ia ʻi ha fanga kiʻi peleti fakaʻofoʻofa. Naʻe uʻu ʻe Sinei ʻene meʻi keké peá ne malimali. ʻOku ou ʻofa ʻia Sīsū, pea ʻoku ou ʻilo ʻokú Ne ʻofa ʻiate au. Naʻe ʻalu hake ʻiate ia ha ongoʻi nonga ʻo hangē ha kafu vavae māfaná.
Ngaahi tā fakatātā ʻa Elise Black