Tānaki Fakataha ki he Temipalé
ʻI he 1992, naʻe fakakaukau ai ʻa Penetito Kālosi to Kamo Menitesi Mātini ke ʻave hono fāmilí ki he temipale ofi tahá, ka naʻe fie maʻu ha ʻaho ia ʻe 15 ke ne mālōlō ai mei he ngāué kae lava ʻa e fononga faingataʻa ko ʻeni mei hono ʻapi ʻi Manaú, ʻi he fakatokelau ʻo Palāsilá. Ko ha taimi femoʻuekina ʻeni ki he kautaha naʻe ngāue aí, pea naʻe ʻikai loto hono pulé ke ʻoange hano taimi mālōlō mei he ngāué.
Koeʻuhí ne ʻosi teuteu e fāmilí, fai e feilaulau, mo fakahaofi ha paʻanga ki he folau ko ʻení, naʻa nau lotu ai ke ʻi ai ha founga te nau kei lava pē ʻo ʻalu. Naʻe ʻikai fuoloa kuo tali ʻenau lotú.
Naʻe pehē ʻe Misa Mātini, “ʻI he ʻaho ki muʻa pea mau folaú, naʻe talamai ʻe he toketaá ʻoku ʻi ai e siemu ʻoku ou maʻu.” “Naʻá ku fiefia ʻaupito ke u puke!”
Naʻe ʻoange ʻe heʻene toketaá he taimi pē ko iá ha faitoʻo mo ha tohi ke mālōlō mei he ngāué ʻi ha uike ʻe ua, pea fakatatau ki he laó, kuo pau ke tali ia ʻe he kautahá. ʻI he ʻaho hokó naʻe mavahe atu e fāmilí ki he temipalé.
Naʻe pehē ʻe Misa Mātini, “Ne u ʻalu mo ʻeku faitoʻó, pea fai hoku ngaahi huhu lolotonga ʻemau fonongá.” ʻI he taimi naʻá ne foki aí, kuo ʻosi e siemú ia.
Naʻá ne pehē, “Ne u foki ki ʻapi mo e tui pea mo ha fakamoʻoni ki he ngaahi ouau ʻo e temipalé, kae tautautefito ki he ouau hono silaʻi au ki hoku uaifí mo e fānau ʻe toko tolú.”
Ki muʻa pea hoko ʻa Manau ko e konga ʻo e Vāhenga Temipale Kalakasi Venesuelá ʻi he 2005, ko e temipale ofi tahá pē ʻa e Temipale Sao Paulo Palāsilá, ʻa ia ne tuʻu ʻi ha maile ʻe lauiafe ʻi he fakatonga-hahake ʻo Palāsilá. Ne matuʻaki fakapapau ha Kāingalotu ʻe niʻihi ʻi Manau ke nau ʻalu ki he temipalé ʻo nau fakatau atu ai honau ngaahi ʻapí, meʻalelé, meʻangāué—ha faʻahinga meʻa pē naʻe ʻi ai hano mahuʻinga—ke maʻu mei ai ha paʻanga.
Ke aʻu e kāingalotú ki Sao Paulo, naʻe pau ke nau heka vaka ʻi he Vaitafe Nikuloó ki he fetaulakiʻanga mo e vaitafe ʻAmasoní pea ʻalu fakahahake mei ai ki he Vaitafe Mateilá—ko hono mamaʻó ko e maile ʻe 70 (km ʻe 115). Hili iá te nau folau ʻi ha maile ʻe 600 tupu (km ʻe 965) ʻi he Vaitafe Mateilá ki he kolo ko Pōto Veihoó. Te nau heka pasi leva mei ai ʻi ha toe maile ʻe 1,500 (km ʻe 2,400) ki Sao Paulo. Hili ʻenau ngāue ʻi he fale ʻo e ʻEikí, te nau toe fononga ʻi ha ʻaho ʻe fitu ke foki ki ʻapi.
ʻI he teuteu ʻa e Kāingalotu mei Manaú ki heʻenau ʻuluaki ʻalu ki he temipale ʻi Kalakasí, naʻa nau fiefia ʻaupito ʻo nau pehē, “Ko ʻeni ʻoku houa pē ʻe 40 ke aʻu ki he temipalé!” Ke aʻu e Kāingalotú ki Kalakasi, naʻe pau ke nau kātakiʻi ha heka pasi maile ʻe 1,000 (km ʻe 1,600) ʻa ia naʻe kau ai haʻanau fou atu ʻi ha ngaahi konga ʻo e vaotā ʻAmasoní naʻe ʻikai nofoʻi pea nau fetongi mei ha pasi lahi ki ha pasi siʻisiʻi ange ʻi he kauʻāfonua ʻo Palāsila mo Venesuelá. Naʻe nounou ange ʻa e fonongá, ka naʻe kei fie maʻu pē foki ke ʻi ai ha feilaulau fakapaʻanga lahi, fakataha mo e fakamole ki he paasipōtí.
ʻI he kamata ʻa e fonongá, ne hivaʻi ʻe he Kāingalotú ʻa e “Kāinga Tau Hū he Temipalé.”1 Koeʻuhí ke nau kei maʻu ʻa e ongoʻi ʻapasiá mo nofo ʻenau fakakaukaú ʻi he taumuʻa ʻo ʻenau fonongá, naʻe fai ai ʻenau ngaahi faeasaiti ʻi he pasí mo sio he ngaahi heleʻuhila ʻa e Siasí hangē ko e The Mountain of the Lord.
ʻI ha tohinoa naʻe faʻu ʻe kinautolu naʻa nau kau ʻi he ʻuluaki fononga ko iá, naʻe manatuʻi pē ʻe he kāingalotu ʻo e Siasí honau ngaahi tāpuakí, kae ʻikai ko ʻenau feilaulaú. Naʻe tohi ʻe ha fefine ʻe taha ʻo pehē: “Ko e ʻaho ní ko e fuofua taimi ia te u ʻalu ai ki he temipalé. Ne u fakamanatu ʻaneafi ʻa e taʻu ʻe 20 ʻeku kau ki he Siasí—ko ha ngaahi houa, ngaahi ʻaho, mo ha ngaahi taʻu lahi ia ʻo ʻeku tatali mo teuteú. ʻOku fonu hoku lotó ʻi he fakafetaʻi mo e fiefia koeʻuhí ko hoku ngaahi kaumeʻá, kau taki lakanga fakataulaʻeikí, kae tautautefito kia Sīsū Kalaisi, ʻEne Fakaleleí, mo e faingamālie ko ʻeni ke u ʻalu ai ki he fale ʻo ʻeku Tamai Hēvaní.”
Naʻe pehē ʻe ha tangata naʻe sila ki hono uaifí mo e fānaú ʻi he ʻalu ko ʻení naʻe fakaʻali kiate ia ʻe he temipalé ʻa e ngaahi meʻa ʻoku mahuʻinga moʻoni mo tolongá. Naʻá ne tohi ʻo pehē, “ʻOku ʻikai haʻaku veiveiua kapau te tau tauhi e ngaahi fuakava ʻoku tau fai ʻi he temipalé, te tau moʻui fiefia mo tupulaki ange.” “ʻOku ou ʻofa ʻi hoku fāmilí, pea te u fai e meʻa kotoa te u lavá ke u fakataha mo kinautolu ʻi he puleʻanga silesitialé.”
Naʻe fokotuʻu e Misiona Palāsila Manaú ʻi he ʻaho 1 ʻo Siulai 1990, ke ʻoatu ʻa e ongoongoleleí ki ha siteiti ʻe ono ʻi he fakatokelau ʻo Palāsilá. ʻI he taimi ko iá naʻe ʻikai ke fuʻu ʻiloa ʻa e Siasí ʻi he ngaahi siteiti ko iá pea tokosiʻi ʻaupito e kāingalotú. Kae hangē ko hono folofolaʻaki ʻe he ʻEikí ʻi he Tohi ʻa Molomoná, ko kinautolu ʻe fakatomala pea haʻu kiate Iá, ʻe lau fakataha ʻa kinautolu mo Hono kakaí ʻi he ngaahi ʻaho fakaʻosí (vakai, 3 Nīfai 16:13).
ʻI he ʻaho ní, ʻoku ʻi ai ha siteiki ʻe valu ʻi he kolo ko Manaú, ʻi he Siteiti ʻAmasoní, mo ha toe ngaahi siteiki ʻi he ngaahi siteiti kehé, pea ʻi ai e vahefonua ʻe fitu ʻi he ngataʻanga ʻo e ngaahi vahevahe fakamisioná. ʻI heʻeku fakakaukauloto atu ki he tupu ʻa e Siasí mo e ngāue ʻoku fakahoko ʻe he ngaahi temipalé ʻi he feinga ʻa e ʻEikí ke tānaki fakataha ʻEne fānaú, ʻoku ʻalu ai ʻeku fakakaukaú ki Heʻene talaʻofa ʻi he Tohi ʻa Molomoná: “ʻIo, pea ʻe toki kamata leva ʻa e ngāué, ʻi he ngaahi puleʻanga kotoa pē pea teuteu ʻe he Tamaí ʻa e hala ke lava ai ʻo tānaki mai hono kakaí ki ʻapi ʻi he fonua ʻo honau tofiʻá” (3 Nīfai 21:28).
ʻI heʻeku hoko ko ha palesiteni fakamisiona ʻi Manau mei he 1990 ki he 1993, ne u mamata ai ki hono tali ʻe he kakai ʻAmasoni tokolahi ʻa e ngaahi tefitoʻi moʻoni ʻo e ongoongolelei ʻo Sīsū Kalaisi kuo toe fakafoki maí, kau ki he Siasí, pea nau “kau ki he fuakavá” (3 Nīfai 21:22). Ko e meʻa naʻe hoko aí ko e kamata ke faitāpuekina ʻe he mālohi ʻo e lakanga fakataulaʻeikí ʻa ʻenau moʻuí mo honau ngaahi fāmilí—kae tautautefito ʻi hono fakafou mai ʻi he ngaahi ouau ʻo e temipalé.
Naʻe fiefia e kāingalotu ʻo e Siasí ʻi he fakatokelau ʻo Palāsilá ʻi hono fakahā ʻe he Kau Palesitenisī ʻUluakí ʻi Mē ʻo e 2007 ʻe langa ha temipale ʻi Manaú, ʻa ia ko e temipale ia hono ono ʻi Palāsilá. ʻE hoko ʻa e temipale ʻi Manaú ko ha tāpuaki maʻongoʻonga ki he fāmili Mātiní mo e Kāingalotu naʻe fakaʻau ke tokolahi ʻi Palāsila tokelaú. Neongo ia, ʻe kei hokohoko atu pē ʻa e fie maʻu ke fakahoko ʻe ha Kāingalotu tokolahi ʻi māmani ha feilaulau lahi ke nau ʻalu ki he temipalé.
Fakatauange ʻe fakahā ʻe he tokolahi ʻo kitautolu ʻoku nofo ofi ki ha temipalé, ʻa ʻetau houngaʻiá ʻaki e toe lahi ange ʻa ʻetau ʻalu ki he temipalé. Pea fakatauange ke tau hangē ko e Kāingalotu ʻi Palāsila tokelaú, ʻo tau faʻifaʻitaki ki he sīpinga ʻa e kau Nīfaí ʻa ia naʻa nau “ngāue lahi ʻaupito” ke fakataha ki he temipalé “koeʻuhí ke nau … ʻi he potu ko ia ʻe fakahā mai ai ʻe Sīsū ia ki he kakaí” (3 Nīfai 19:3).
Tā fakatātaaʻi ʻe Steve Kropp
Fakatātā ʻo e Temipale Manau Palāsilá naʻe tā ʻe Craig Lofgreen
Ko e sīpinga ʻo e temipale ke langa ʻi Manau ʻi Palāsilá.