Fehuʻi mo e Talí
“Ko e hā e meʻa ʻe lava ke u fai ke toe mahuʻingamālie ange ʻeku ngaahi lotú, kae ʻoua te u toutou leaʻaki ai e meʻa tatau pē?”
ʻOku fakamahino mai ʻe he folofolá ko e palopalemá ko e launoa ʻo toutou leaʻaki e meʻa tataú (vakai, Mātiu 6:7). ʻE ʻi ai e taimi ʻe niʻihi ʻe fie maʻu ia ke ke toutou leaʻaki ha ngaahi meʻa mahuʻinga ʻi hoʻo ngaahi lotú. Ka ʻo kapau te ke toutou leaʻaki ha ngaahi foʻi lea ʻo ʻikai te ke fakakaukau ki ai, ʻoku ʻikai te ke fetuʻutaki moʻoni koe mo e Tamai Hēvaní. Ke ke fakaʻehiʻehi mei hono toutou leaʻaki e ngaahi lea launoá, ako ke ke lotu “ʻi he loto fakamātoato moʻoni” (vakai, 2 Nīfai 31:13; Molonai 7:9; 10:4)—ʻa ia ko e pehē, lotu fakamātoato moʻoni mo fakataumuʻa ke ke ngāue ʻi he tuí.
ʻOku pehē ʻi he 3 Nīfaí naʻe lotu “taʻetuku” e kau ākonga ʻa e Fakamoʻuí, ka “naʻe ʻikai te nau leaʻaki ʻa e ngaahi lea tatau pē, he naʻe fakahā kiate kinautolu ʻa e meʻa ke nau lotuʻakí” (3 Nīfai 19:24). ʻE lava ke fakahinohino koe ʻe he Laumālie Māʻoniʻoní ʻi hoʻo ngaahi lotú mo ʻai ke mahuʻingamālie ange (vakai, Loma 8:26). ʻE tokoni foki ke tuku ha taimi ke ke lotu ai ʻi ha feituʻu ʻoku lōngonoa pea ʻikai fakavavevaveʻi ai hoʻo lotú.
Fakaʻosí, fakakaukau ki he ngaahi meʻa kehekehe ʻa ia ʻe lava ke ke lotuá. ʻOkú ke maʻu ha ngaahi tāpuaki lahi ʻi he ʻaho takitaha, pea ʻoku lahi mo e ngaahi meʻa ʻoku hoko ʻo ke fie maʻu ai ha tokoni fakalangi. Fakamālō ki he Tamai Hēvaní ʻi he ngaahi tāpuaki ʻokú ke maʻú, peá ke lotua e ngaahi meʻa ʻokú ke fie maʻú. ʻE lava ke ke lotu ke maʻu ha fakamolemole, ha tokoni ʻi he ngaahi faingataʻá, ha fakamoʻoni ʻoku mālohi angé, mo ha maluʻi mei he ʻahiʻahí.
Ngaahi Lotu Taʻesiokitá
ʻOku ou pehē ʻoku ʻi ai e taimi ʻoku tau siokita ai ʻi heʻetau lotú—ʻo tau fakakaukauʻi pē kitautolu mo ʻetau fie maʻú. Fakakaukau ki he niʻihi kehé foki mo ʻenau fie maʻú. Lau ʻa e tāpuaki kotoa pē, pea fakamālō ki he Tamai Hēvaní. ʻOku ʻikai ko e lotú ke fanongo ʻataʻatā mai pē ʻa e Tamai Hēvaní ki heʻetau ngaahi fie maʻú mo ʻetau ngaahi lāungá ka ke tau fakafanongo foki kiate Ia. Te tau maʻu fēfē ha fakahā kapau ʻoku tau lea fakavavevave ʻaki pē ʻa e meʻa ʻoku tau fie maʻú pea tau kaka ki mohenga? Fehuʻi kiate Ia ʻa e meʻa ʻokú Ne finangalo ke ke faí. Te ke hoko ai ko ha tokotaha lelei ange.
Lepeka W., taʻu 16, ʻAitahō, USA
Tuku ke Tataki Koe ʻe he Laumālie Māʻoniʻoní
Tuku hao taimi ke ke fakalaulauloto ai ki he ngaahi meʻa ʻokú ke houngaʻia taha aí pea mo hoʻo ngaahi fie maʻu vivili taha ʻi hoʻo moʻuí. ʻE tataki koe ʻe he Laumālié mo ʻoatu ʻa e ngaahi tali mo ha ngaahi fokotuʻu ʻe hoko ko ha ngaahi fakakaukau mo ha ngaahi ueʻi. ʻE lelei foki ke ke tauhi ha tohinoa ʻe lava ke ke hiki ai e ngaahi fakakaukau ko ʻení ke ke toe vakai ki ai ʻi he kahaʻú.
ʻEletā Seipo, taʻu 21, Misiona Tekisisi Hiusitoni
Fakakaukau ki Hoʻo Meʻa Naʻe Fai ʻi he ʻAho Ko Iá
ʻI heʻeku lotu he poʻulí, ʻoku ou fakakaukau ai ki he meʻa ne u lau ʻi he folofolá. ʻOku ou feinga ke manatuʻi ʻa e meʻa naʻe lava ke u fakahoko totonú mo e meʻa ʻoku fie maʻu ke u fakaleleiʻí. Te u lava ʻo kole ki he Tamai Hēvaní ke tokoniʻi au ʻi he ngaahi faingataʻa ʻo e ʻaho ko iá. ʻOku ou kole kiate Ia ke ne tokoniʻi maʻu pē au ke u manatuʻi ʻEne akonakí pea ʻomi ha ivi ke u muimui ki ai. Tupu mei he kehekehe ʻa e ʻaho kotoa peé, neongo ʻoku ʻi ai pē ʻetau taimi-tēpile pau, ka ʻe ʻi ai pē ʻa e ngaahi meʻa kehekehe ia ʻe hoko. ʻI heʻene peheé leva, ka tau fakakaukau ki he meʻa naʻe hoko ʻi he ʻaho ko iá, ʻe ʻi ai maʻu pē ʻa e ngaahi meʻa kehekehe te tau kole mo fakamālō ai.
Ketia F., taʻu 20, Palamasi, Palāsila
Lotu Leʻolahi
Kumi ha taimi mo ha feituʻu ʻe lava ke ke toko taha ai pē peá ke lotu leʻolahi. Te ke ongoʻi pea toe ʻuhingamālie ange ia ʻi he taimi ʻokú ke lea ai ʻo fai hoʻo lotú. ʻE faingofua ange ai haʻo fakaʻehiʻehi mei hono leaʻaki ʻo e meʻa tatau peé pea ʻikai ʻalu hoʻo fakakaukaú ki ha meʻa kehe. ʻOku hangē pē ia ha fetalanoaʻaki moʻoni mo e Tamai Hēvaní.
ʻEletā Mala, taʻu 20, Misiona Kololato Kololato Sipilingí
Lotu pea Fakafanongo Leva
ʻI hoʻo ongoʻi ʻoku fie maʻu ke ke falala ki he ʻEikí pea ke toe lelei ange ho vā fetuʻutaki mo Iá, fakakaukau ki he meʻa ʻokú ke fie maʻú peá ke tūʻulutui ʻo lotu. Fakakaukauloto ki he Tamai Hēvaní, pea talanoa kiate Ia ʻo hangē pē ko haʻo Tamaí, he ko hoʻo Tamaí Ia. Fakahā kiate Ia ʻa e meʻa kotoa pē ʻokú ke ongoʻí. Talanoa fakamātoato kiate Ia, pea leaʻaki ʻa e meʻa ʻi ho lotó. Falala kiate Ia, fakamālō kiate Ia, kole kiate Ia ke fakamolemoleʻi koe, fiefia Heʻene takauá, fakahā hoʻo ʻofá kiate Ia, hili iá peá ke fakafanongo fakalelei ki ha tali.
Laulu A., taʻu 20, Mekisikou Siti, Mekisikou
Lotua ha Ngaahi Meʻa Pau
Kapau te ke palani ki muʻa ke fokotuʻutuʻu hoʻo ngaahi fakakaukaú mo e ngaahi holi fakamātoato ʻa ho lotó, neongo ʻe fai ʻeni ʻi ha ngaahi miniti siʻi pē, ka te ne fakapapauʻi haʻo tokanga lahi ange ki he ngaahi lea ʻokú ke fai ki hoʻo Tamai Hēvaní. Fakakaukau ki ho fāmilí, kāinga ofí, mo e niʻihi te nau fie maʻu hoʻo ngaahi lotú. ʻOku tokolahi ʻaupito e kakai ʻoku fie maʻu tokoni, fakahinohino, mo ha maluʻí.
ʻI hoʻo fakataumuʻa ki ha ngaahi tāpuaki pau peá ke lotu ʻo fakamatalaʻi iá, ʻe lava ke fetongi ai ʻa e lea angamaheni ko e “Fakamolemole ʻo tāpuakiʻi au ke u maʻu ha ʻaho leleí” ki he “Fakamolemole kae fakahinohino au ʻi he ngaahi fili ʻoku ou faí ke u tā ha faʻifaʻitakiʻanga lelei maʻá e niʻihi kehé.” Ko e ngaahi lotu ʻeni te ke manatu fiefia ki ai ʻi ho lotó he ʻoku nau faka-Kalaisi ange—ko e founga totonu ia ke fai ʻaki ʻa e lotú.
ʻAna T., taʻu 14, Melilani, USA
Tā ʻo Palesiteni Monisoní naʻe fai ʻe he Busath Photography