Ngaahi Fakakaukau Maʻá e Efiafi Fakafāmili ʻi ʻApí

ʻE lava ke fakaʻaongaʻi ʻa e ngaahi fokotuʻu fakafaiakó ni ʻi he loki akó pe ʻi ʻapi foki. Te ke lava pē ʻo liliu ke feʻunga ʻa e ngaahi fakakaukaú ni ki ho fāmilí pe kalasí.

“Naʻe ʻAtā ha Loki ʻi he Fale Tali-fonongá” p. 8: Mou pūlou ha sipi kafu ʻo haʻohaʻo fakataha ai ʻo hangē pē ʻoku mou ʻi he loto meʻalele he talanoá. Fai e talanoá. Mou aleaʻi pe naʻe mei fēfē nai kapau naʻa mou nofo pē he loto vēní he Efiafi kimuʻa he Kilisimasí. Aleaʻi e founga naʻe tokoniʻi ai e fāmilí ʻe he tokotaha tauhi ʻo e fale tali-fonongá. Mou palani ʻi he faʻa lotu ha founga ʻe lava ke tokoniʻi ai ʻe homou fāmilí ha niʻihi kehe lolotonga e faʻahitaʻu Kilisimasi ko ʻení.

“Ko Ha Mana ʻo e Kilisimasí,” p. 12: Vahevahe mo homou fāmilí e talanoa ʻo e ongo faifekaú. Aleaʻi ʻa e fiefia naʻe ʻomi ʻe he hivá ki he kakai he lēlué. Palani ha ngāue tokoni ʻe lava ke fai ʻe homou fāmilí ki ha taha he Kilisimasí.

“Fakatapui Hoʻo Ngaahi Ngāué,” p. 20: Fili ha meʻa ʻe nima ke fakaʻaongaʻi ko ha maka tuʻuʻanga, hangē ko ha ngaahi foʻi maka pe pepa. Fakahingoaʻaki e meʻa takitaha e tefito ʻo e ngaahi konga mei he fakamatalá. Manga mei he foʻi maka ʻe taha ki he foʻi maka ʻe taha lolotonga hoʻomou aleaʻi e konga ko ʻení. Fakakaukau ke lau ha ngaahi potufolofola mei he fakamatalá. Aleaʻi e ngaahi maka tūkiaʻanga ʻoku tau fehangahangai mo ia ʻi heʻetau moʻuí. Fakaʻosiʻaki hano lau e ngaahi palakalafi fakamuimuitaha ʻo e fakamatalá.

“Ofo ʻi he ʻOfa ʻOku Fai ʻe Sīsū Maʻakú,” p. 28: Lau ʻa e konga ko e “Fiefia ʻi he Toe Fakatahá” ʻo aʻu ki he taimi ʻoku kamata ke lea ai ʻa e faifekaú ki hono fāmilí. Tuku ke mateʻi atu ʻe he kau mēmipa ʻo homou fāmilí pe ko hai ʻe fuofua lele atu ke feʻiloaki mo e faifekaú. ʻI he ʻosi hono fai ʻo e talanoá, mou aleaʻi ʻa e ʻofa ko ia ʻa e mātuʻá ki heʻenau fānaú pea mo e ʻofa ʻa e Tamai Hēvaní kiate kitautolú kotoa.

“Ko e Tokotaha Foaki Fakapulipuli” p. K14: Vahevahe mo homou fāmilí ʻa e talanoa kia Tēvitá. Ko e hā e meʻa ne ako ʻe Tēvitá? Fakakaukauʻi hano fai ha taha ʻo e ngaahi meʻa ko ʻení ʻo fakaʻaongaʻi ʻa ʻene sīpingaʻaki ʻa e hoko ko e Tokotaha Foaki Fakapulipuli. Palani ha ngaahi ngāue tokoni ʻe feʻunga mo kinautolu. (2) Hiki e hingoa ʻo e kau mēmipa ʻo e fāmilí ʻi ha fanga kiʻi laʻipepa. Fili ha hingoa, peá ke fai ha ngāue tokoni fakapulipuli ki he tokotaha ko iá he uiké ni.