Ko ha Fakaafeki ha ʻAho ʻEkitivitī
“Tānaki fakataha ʻa e fānau ʻa e ʻOtuá” (Sione 11:52).
Naʻe pehē ange e fineʻeikí he taimi kai pongipongí, “Manatuʻi ʻoku fai e ʻaho ʻekitivitií he tuku ʻa e akó he ʻahó ni.”
Naʻe māpuhoi ʻa Kālisa. “ʻOku ou ʻiloʻi.”
“Ko e hā e meʻa ʻoku hokó?” ko e fehuʻi ange ia ʻene fineʻeikí. “Pehē ʻe au ʻokú ke saiʻia he ʻaho ʻekitivitií.”
Naʻe pehē ange ʻe Kālisa, “ʻOku sai pē ia.”
“Manatuʻi hoʻo fiefia ke ʻalu ki ai he hoko ho taʻu valú?” ko ʻene faʻeé ange ia. “Pea ʻokú ke saiʻia ʻia Sisitā Kopiani.”
Naʻe pehē ange ʻe Kālisa, “Ko e fefine lelei ia.” “Ka ʻoku faingataʻá he ko au pē mo ʻEsilī ʻoku ʻalu ki aí. ʻOku ou saiʻia pē au ʻia ʻEsilī, pea ʻokú ne angalelei maʻu pē kiate au. Ka ʻoku mei hoko hono taʻu 12, he ko e toki hoko pē ʻeni hoku taʻu 9. ʻOku ʻikai te u ʻilo pe ko e hā te u lea ʻaki kiate iá. ʻOku taʻeoli.”
Naʻe ala mai e faʻē ʻa Kālisá ʻo puke atu. “ʻOku ou ʻilo pē ʻoku faingataʻa he taimi ʻe niʻihi. ʻOku ʻikai ke tokolahi e tamaiki fefine heʻetau kiʻi Palaimelí, ka ʻoku ou ʻilo pau te ke maʻu ha taimi fakafiefia ai he efiafí ni.”
Naʻe lue mai ʻa Kālisa he tuku ʻa e akó ki he feituʻu naʻe ʻi ai e falelotu naʻe fai ai ʻenau ʻaho ʻekitivitií. Naʻe talitali lelei ia ʻe Sisitā Kopiani mo ʻEsilī. Hili e fua lotú, naʻe pehē ange ʻe Sisitā Kopiani, “Ne u fehuʻi ki he palesiteni ʻo e Palaimelí ʻa e tamaiki fefine ʻoku ʻi he tohi taliui ʻa e Palaimelí ka ʻoku ʻikai ke nau haʻu ki he ʻaho ʻekitivitií pe Palaimelí. ʻOku ou maʻu heni e lisi ʻo e tamaiki fefiné mo honau fika telefoní. Ne u fakakaukau kapau te tau telefoni kiate kinautolu ki muʻa he ʻaho ʻekitivitī takitaha, te nau haʻu ke tau kau fakataha.”
Naʻe kaila ʻa Kālisa, “Foʻi fakakaukau lelei ia!” “ʻE fakafiefia ke tokolahi ange e tamaiki fefiné.”
Naʻe malimali ʻa Sisitā Kopiani. “ʻOku ou fiefia hoʻo saiʻia he fakakaukaú he ʻoku ou fie maʻu ke ke telefoni ki he tamaiki fefiné ki muʻa heʻetau ʻaho ʻekitivitī hokó.”
“ʻA au?” Naʻe ʻohovale ʻa Kālisa. Naʻá ne ongoʻi taʻefiemālie ki ai. Ne ʻoange ki ai ʻe Sisitā Kopiani e lisí. Naʻá ne ʻiloʻi kotoa e tamaiki fefine he akó, pea naʻe faʻa maʻulotu pē hanau niʻihi. Ka ʻe ilifia ia ke telefoni ʻo fakaafeʻi kinautolu.
Naʻe fehuʻi ange ʻe Sisitā Kopiani, “Te ke fai ia?”
Ne toe sio hifo ʻa Kālisa ki he lisí. Naʻá ne toʻu pē mo ha niʻihi ʻo e tamaiki ko ʻení. ʻE fakafiefia ange e ʻaho ʻekitivitií kapau te nau haʻu ki ai. Naʻá ne pehē ange, “ʻIo.”
Ki muʻa he ʻaho ʻekitivitī hokó, naʻe tā ʻa Kālisa ki he tamaiki fefine he lisí. Naʻá ne tuku ha fekau pe talanoa mo kinautolu kotoa. Naʻe ʻikai faingataʻa fēfē.
Naʻe kole ange kia Kālisa ha taha ʻo e tamaiki ne telefoni ki aí ʻi ʻapiako he ʻaho hono hokó pe ʻe lava ke na lue fakataha ki he ʻaho ʻekitivitií. Naʻe fiefia ʻa Kālisa! ʻI he tuku ʻa e akó naʻe lue fakataha ʻa Kālisa mo ʻOlivia ki ʻapi siasi. Ne malimali ange ʻa Sisitā Kopiani heʻena hū fakataha atu ki he loki Palaimelí.
Naʻe toe telefoni pē ʻa Kālisa ki he tamaiki fefiné ki muʻa he ʻaho ʻekitivitī hokó. Naʻe toe fiefia pē ʻa ʻOlivia ke haʻu. Naʻe talaange ʻe Selesī ʻe haʻu mo ia. Naʻe fiefia ʻa Kālisa heʻenau lue atu mo ʻOlivia mo Selesī ki falelotu he efiafi hono hokó.
Naʻe fakamatala ange ʻe Kālisa ki heʻene faʻeé he pō ko iá ʻa e fakafiefia ʻo e ʻaho ʻekitivitií he tokolahi ange ʻa e tamaikí. Naʻe pehē ʻe Kālisa, “Fakaʻamu ange ʻe au ʻe haʻu mo Metisoni.” “Ko hoku kaumeʻa lelei tahá ia.”
Ne fehuʻi ange ʻe he fineʻeikí, “He ko e hā ʻoku ʻikai haʻu aí?”
“ʻOku ʻikai ke kau hono hingoá ʻoʻona he lisí. ʻOku ʻikai ko ha mēmipa ia ʻo e Siasí.”
Naʻe pehē ange ʻe he fineʻeiki, “ʻOku ʻikai hano kovi.” “Ko hoʻo ngāue fakafaifekau ʻa hoʻo fakaafeʻi iá. ʻOkú ke ʻosi hoko koe ko ha faifekau ʻi hoʻo fakalotolahiʻi ʻa ʻOlivia mo Selesií.”
Naʻe fakakaukau ʻa Kālisa ki ai. Naʻá ne tā foki kia Metisoni ʻi heʻene toe tā ki he tamaikí ʻo fekauʻaki mo e ʻaho ʻekitivitií. Naʻe kole ange ʻa Metisoni ki heʻene faʻeé pe ʻe lava ke ne ʻalu, pea naʻá ne ʻio ange. Naʻe ʻikai faʻa tui ʻa Kālisa ki heʻene faingofua peheé. Naʻá ne fifili pe ko e hā naʻe ʻikai te ne fakaafeʻi ai ʻa Metisoni he ngaahi māhina kuo ʻosí!
Naʻe fai ʻe Sisitā Kopiani ha fanongonongo fakafiefia he ʻaho ʻekitivitī ʻo e uike ko iá. ʻE haʻu ha tokotaha fakaafe makehe heʻenau ʻaho ʻekitivitī hokó ʻo akoʻi kinautolu ʻi hono teuteuʻi ʻo e keké. Ne femalimaliʻaki ʻa Kālisa mo Metisoni. ʻE fakalata! ʻI heʻenau mavahe mai he efiafi ko iá, naʻe pehē ange ʻe Metisoni, “Mālō hono fakaafeʻi aú. ʻOku ou fie haʻu ʻo kau he teuteu keke hono hokó.”
ʻI he ʻaho pē naʻe hokó, naʻe kamata talanoa ai ʻa Kālisa ʻi ʻapiako ki hono ngaahi kaungāmeʻá kātoa ʻo kau ki he ʻekitivitī teuteu keké. Naʻe tokoni ange ki ai ʻa Metisoni. Ne talaange ʻe he tokolahi ʻo hona ngaahi kaungāmeʻá ʻoku nau fie ō ange.
Naʻe talaange ʻe Kālisa ki heʻene faʻeé, “Mahalo pē ʻe toko 15 ʻemau ʻaho ʻekitivitī hokó.
Naʻe pehē leʻo lahi ange ʻe heʻene faʻeé, “Taha nima!” “Ko e tamaiki fua ia mei fē?”
Naʻe talaange ʻe Kālisa,“Naʻá ku fakaafeʻi kotoa e tamaiki fefine ʻi heʻeku kalasí.”
Naʻe pehē ange ʻe heʻene faʻeé, “Sai ʻaupito!” “Ka ke fakahā ke ʻilo ʻe Sisitā Kopiani ke ne teuteu mai ki he tokolahi ko iá.”
Naʻe tā ʻa Kālisa ʻo fakahā kia Sisitā Kopiani e tokolahi e tamaiki fefine ʻe haʻú. Naʻe fonu e loki Palaimelí he ʻaho ʻekitivitií he tamaiki fefiné heʻenau talanoa mo kata lolotonga ʻenau teuteu keké. Ne fakakuitaha mo malimali atu ʻa Sisitā Kopiani kia Kālisa.
ʻI heʻene tukú, naʻe tokoni ʻa Kālisa kia Sisitā Kopiani ke fakamaʻa ʻa e lokí. Naʻe haʻu hono kaumeʻa ko ʻEmilií ʻo fakalea ange kae ʻalu. Naʻá ne lea fakamāmā ange pē kia Sisitā Kopiani, “Mālō.” “ʻE sai pē ke u fakaafeʻi mai hoku tokoua lahí mo ha ongo tamaiki ʻoku ou tokouaʻaki ki he ʻaho ʻekitivitī hoko maí?”
Naʻe malimali ʻa Sisitā Kopiani. Naʻá ne pehē ange, “ʻE fakaʻofoʻofa ʻaupito, ʻEmelī.”
Ne ʻikai faʻa tatali ʻa Kālisa ki he ʻaho ʻekitivitī hokó!
Ngaahi tā fakatātā ʻa Jennifer Tolman