Tohi ki he ʻĒtitá
Maʻu Lahi Ange ʻa e Laumālié
Ko ha faʻē au ki ha fānau fakaʻofoʻofa ʻe toko ua mo ha husepāniti ʻokú ne poupouʻi au. ʻI he māmani taʻepau ko ʻení, ʻoku hoko e Liahoná ko e kāpasa fakaonopooni homau fāmilí. ʻI heʻemau lau e Pōpoaki ʻa e Kau Palesitenisī ʻUluakí mo e ngaahi fakamatala fakalaumālie kehé ʻi heʻemau ngaahi efiafi fakafāmili ʻi ʻapí, ʻoku toe lahi ange ai ʻa e hū mai ki homau ʻapí e Laumālie ʻo e ʻEikí. ʻOku mau ongoʻi e mālohi ʻo e Fakalelei ʻa hotau Fakamoʻui ko Sīsū Kalaisí, pea mau maʻu ha fiemālie mo ha nonga.
Kilisanitā ʻEsiteio Patila, Filipaini
Loto-fakatōkilalo mo e Faʻa Fakamolemole ʻi he Nofo-malí
Ne tokoniʻi au ʻe he fakamatala ko e “Ko Hono Fakamuʻomuʻa ʻEku Nofo-malí ʻi Heʻeku Taʻefieʻulutukuá” (Sānuali 2008) ke toe mahino ange ʻa e mamafa ʻo e fuakava ʻo e malí. Ne u lau e fakamatalá mo e tamasiʻi ne ma teu malí, peá ma fokotuʻu ha taumuʻa ke hoko e loto-fakatōkilaló mo e faʻa fakamolemolé ko ha ongo tefitoʻi moʻoni mahuʻinga ʻi heʻema feohí. Ne u fakakaukau ke fakaʻesia e fakamatalá ke tuʻu ʻi homa ʻapi ʻi he kahaʻú koeʻuhí ke ma manatuʻi maʻu pē ʻa e laumālie fakaʻofoʻofa ko ia ne ma ongoʻi heʻema vahevahe ʻa e pōpoakí ni mo fakamālohia ai ʻema ʻofá.
Kēlepi Nasimenito, Palāsila
Ko e Ivi Takiekina ʻo e Liahoná
Ne fakaului au ki he Siasí ʻe he ngaahi pōpoaki fakalaumālie ʻi he Liahoná. Ne u ʻiloʻi naʻe lava ke u fakafehoanaki ʻeku moʻuí ki he lea ʻa e kau takí kiate kitautolú, pea naʻá ku fakaʻaongaʻi ʻenau akonakí ʻi heʻeku moʻuí. Ko e founga ʻeni ne kamata ke tupulaki ai ʻeku fakamoʻoní. Ne u vēkeveke ke lau e makasiní mo lotu ke u lava ʻo maʻu ʻo lahi ange ʻa e Laumālié pea mo ha fakahinohino mei ʻolunga.
Lolotonga ʻeku ngāue fakafaifekaú, ne u ʻalu holo pē mo ha ngaahi tatau ʻo e makasiní ʻo foaki ia ki he kau fiefanongó mo e kāingalotu māmālohí. Ne u toki foaki kimuí ni mai ha ngaahi tatau ki haku ngaahi kaumeʻa ʻoku nau manako ke lautohi ʻo fekauʻaki mo ʻetau tuí.
Kuo uiuiʻi au he taimí ni ke u hoko ko e fakafofonga maʻá e Liahoná. Ko ʻemau taumuʻá ke takitāuhi e mēmipa takitaha ʻo homau koló ʻi he tatau. ʻOku mau foaki ki he kau papi ului foʻoú, e makasini ʻoku mau maʻu mei he senitā tufakiʻanga nāunaú pea ʻoku nau fakalakalaka ʻi he ongoongoleleí mo manako ʻi he Liahoná. ʻOku ou ʻiloʻi ʻoku ʻakoʻi ʻe he Liahoná ʻa e ongoongolelei ʻo Sīsū Kalaisí mo ʻetau Tamai Hēvani ʻofá. ʻOku mau fakamālō ʻi he ueʻi fakalaumālie, ʻi he moʻoni, ʻa e faingofua, mo e faleʻi lelei ʻoku mau maʻu ʻi he pulusinga takitaha.
ʻEtisoni Siovani Sapata Heletia, ʻEkuatoa