Ko Hono Lavaʻi Lelei ʻEte Hoko ko ha Tokotaha Papi Ului Foʻoú
ʻE ʻāsili ʻa e mālohi ʻetau falalá ʻi heʻetau tokoni ki he niʻihi kehé ʻi he anga fakakaumeʻá, ngāue tokoní, mo keinanga ʻi he folofolá.
Naʻe maama mo mokomoko makehe ʻa e pongipongi ko ia he faʻahitaʻu momokó ne u fuofua maʻulotu ai ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI heʻeku hū atu ki he falelotú, naʻe ʻikai ke u lavelaveʻiloa ʻe liliu ʻeku moʻuí heʻeku kau ki he Siasí. Meʻamālie ko e ʻi ai ʻa e ngaahi meʻa ʻe lava ʻe he kau ului hangē ko aú ʻo fai ke mau mālohi ai ʻi he Siasí. ʻOku fie maʻu ke mau tanumaki ha ngaahi feohi fakakaumeʻa, ngāue ʻi he Siasí, pea “keinanga ʻi he ngaahi folofola ʻa Kalaisí” (2 Nīfai 32:3).
Ko Hono Tanumaki ʻo ha Feohi Fakakaumeʻá
ʻOku fie maʻu ʻe he kāingalotu kotoa pē ʻo e Siasí ha ngaahi kaumeʻa ke tokoniʻi kinautolu, kae tautautefito ki he kau papiului foʻoú. Ko ha ngaahi founga ʻeni ʻe fakatupu ai ha lelei ʻi hono tanumaki ha ngaahi feohi fakakaumeʻá.
ʻE lava ke tokoni e kāingalotú ki he kau papi uluí. Ki muʻa peá u papitaisó, naʻe lue mai ha fefine angaʻofa mei he feituʻu tuliki mamaʻo taha ʻo e falelotú koeʻuhi pē ko ʻene fie maʻu ke ma feʻiloaki. Naʻe ongo kiate au ʻene fie helaʻia ke tokoni ke u ongoʻi ʻoku ʻi ai hoku mahuʻingá. Naʻe fai pehē mo ha niʻihi kehe tokolahi. ʻI hono ʻiloʻi ko ia ʻe he kau papi uluí ʻa e ʻofa lahi ʻa e kāingalotu ʻo e Siasí ʻiate kinautolú, ʻe fonu foki mo honau lotó ʻi he ʻofá.
ʻOku tokanga mai foki mo e kau faiako ʻi he ngaahi kalasi ʻa e Siasí. Naʻe hoko ʻeku faiako ʻi he Ngaahi Tefito Mahuʻinga ʻo e Ongoongoleleí ko ha maʻuʻanga tokoni lahi kiate au. Ne u faʻa ongoʻi hangē naʻe folofola fakahangatonu mai pē ʻa e Fakamoʻuí ia kiate au ʻi he ngaahi lēsoni ko ʻení, ʻo nau langaki hake ʻeku moʻuí mo poupouʻi au ke u vilitaki atu ki muʻa.
ʻOku pehē foki hono tokangaʻi mo faitāpuekina ʻe he kau faiako fakaʻapí mo e kau faiako ʻaʻahí ʻa e kāingalotu ʻo e Siasí. Talitali lelei kinautolu ki homou ʻapí pea fakahā kiate kinautolu mo e ʻEikí hoʻo houngaʻia koeʻuhí ko ʻenau tokoní. Hangē ko e akonaki ʻa ʻEletā Tēvita B. Heiti (1906–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻE lava ke tāpuekina ʻa hotau lotó, ʻatamaí mo hotau laumālié… .[ʻe he loto houngaʻiá] ʻo aʻu pē ki ha tuʻunga te tau loto ai ke hokohoko atu hono fai ʻo e ngaahi meʻa ko ia ʻoku kole mai ke tau fakahokó.”1
ʻE tāpuekina foki mo e kau papi uluí ʻi he taimi te nau tokoni ai ki he niʻihi kehé. ʻI he ʻaho ʻe taha ne u fakatau mai ai ha kaati talamonū ʻoku tuʻu ʻi hono takafí ha foʻi mata fōlahi. ʻI lotó naʻe pehē ai, “Mālō hono tokangaʻi aú!” Ne u ʻave ʻa e kātí ki ha fefine ʻi he uōtí naʻe anga fakakaumeʻa mai kiate au. ʻI heʻeku fai ʻení, ne u ongoʻi ha ʻofa faka-Kalisitiane kiate ia.
Fakaʻosí, ʻoku fie maʻu ke tau fakamālohia ʻetau fetuʻutaki mo ʻetau Tamai Hēvaní pea mo Sīsū Kalaisi. ʻE hoko ʻeni ʻi he taimi te tau tokoni ai ki he niʻihi kehé, fakahā ʻa e loto houngaʻiá pea mo lotu. ʻE fakamoʻoniʻi ʻe he Laumālié ʻoku tau taau mo e feilaulau maʻongoʻonga ne fai ʻe he Fakamoʻuí maʻatautolú.
Ko e Ngāue ʻi he Siasí
ʻOku faʻa ʻi ai pē taimi hili e papitaisó ʻe kole ai ki he kāingalotu foʻoú ke nau fua ha fatongia lahi ange ʻi he uōtí pe koló. ʻE ʻoange ʻe he pīsopé pe palesiteni fakakoló ha uiuiʻi. ʻE hoko ʻeni ko ha taimi faingataʻa ki ha niʻihi.
ʻI heʻeku tali e fuofua uiuiʻi ne fai kiate aú—ko e sekelitali ʻo e Fineʻofá—ne u fifili ai, “ʻOku anga fēfē hono ʻomi kiate au ha fatongia mahuʻinga pehē?” Naʻe fakamatalaʻi hono foungá ʻe Palesiteni Henelī B. ʻAealingi, ko e Tokoni ʻUluaki ʻi he Kau Palesitenisī ʻuluakí: “ʻE ʻi ai ha ngaahi taimi te ke ongoʻi lōmekina ai. Ko e founga ʻe taha ʻe ʻohofi ai koé, ko hano ʻai ke ke ongoʻi taʻefeʻunga. … Ka ʻoku lava ke ke maʻu ha mālohi ʻoku mahulu ange ia ʻi ho ivi pē ʻoʻoú, pea ʻoku ʻikai ke ke ngāue tokotaha.” 2
Ne pehē ʻe he palesiteni Fineʻofá kimui ange naʻe hā mei he ngaahi fokotuʻu ne u fai ʻi ha fakataha ʻa e kau palesitenisī ʻo e Fineʻofá, ʻa hono ueʻi au ʻe he Laumālié. Ne u puputuʻu ʻo u pehē ange, “Ko e moʻoni?” Naʻá ne fakapapauʻi mai ʻi he angaʻofa ʻoku ou fakaongoongo ki he Laumālié. ʻI he kamataʻangá ʻe ʻikai faingofua hono ʻiloʻi ʻoku tataki ʻe he toʻukupu ʻo e ʻOtuá ʻa e ngāue ʻoku tau faí, ka ʻi heʻetau tauhi e ngaahi fekaú mo ngāue faivelengá, te tau ʻiloʻi ʻokú Ne fakafeʻungaʻi ʻa kinautolu ʻokú Ne uiuiʻí.
Keinanga he Ngaahi Folofola ʻa Kalaisí
Mahalo ko e founga lelei taha pē ke ʻiloʻi ai ʻoku ʻofa pea poupouʻi kitautolu ʻe he ʻEikí, ko ʻetau ako e folofolá. ʻOku akoʻi ʻi he folofolá ʻa e fakaafeʻi ʻe he ʻEikí “ʻa kinautolu kotoa pē ke nau haʻu kiate ia ʻo maʻu ʻi heʻene angaleleí; pea ʻoku ʻikai te ne taʻofi ha tokotaha ʻoku haʻu kiate ia” (2 Nīfai 26:33).
Mahalo ʻe ofo ha kāingalotu foʻou ʻe niʻihi ʻi he ʻilo mo e fakamoʻoni ʻa e niʻihi kehé. Kae manatuʻi, ko e founga faiako ia ʻa e ʻEikí, ko e “ʻotu lea ki he ʻotu lea, ʻa e akonaki ki he akonaki” (2 Nīfai 28:30). Kuo pau ke tau takitaha ako pē lolotonga ʻetau fonongá. Naʻa mo Sīsū “naʻe ʻikai te ne maʻu mei he fonú ʻi he kamataʻangá, ka naʻá ne fai atu mei he ʻaloʻofa ki he ʻaloʻofa, ʻo aʻu ki heʻene maʻu hono fonú; pea ko ia naʻe ui ia ko e ʻAlo ʻo e ʻOtuá, koeʻuhí he naʻe ʻikai te ne maʻu mei he fonú ʻi he kamataʻangá” (T&F 93:13–14).
ʻOku tupu mei he ʻilo ko iá ʻa e toe lahi ange ʻeku ʻapasia mo fakaʻapaʻapa kiate Iá. ʻOkú ne ʻafioʻi moʻoni pē ʻa e mamahi, ʻahiʻahi, faingataʻa, mo e taʻelata kuó u aʻusiá (vakai, ʻAlamā 7:11). Te u lava ʻo kumi tokoni kiate Ia ʻi he loto-falala kakato. ʻOku akoʻi ʻe he folofolá ʻo pehē ʻoku haohaoa pea ʻikai hano ngataʻanga ʻo e ʻofa, loto-mahino, mo e manavaʻofa ʻa e Fakamoʻuí kiate kitautolú.
ʻI heʻetau tokoni ki he niʻihi kehé ʻi he anga fakakaumeʻá, fai ʻa e ngāue tokoní, mo keinanga ʻi he folofolá, ʻe mālohi ange ai ʻetau falalá pea te tau hoko ko e Kāingalotu faivelenga ʻo hangē ko ʻetau fakaʻamú.
ʻŪ tā ʻa Matthew Reier, John Luke, mo Frank Helmrich