Haʻu ʻo Fanongo ki he Leʻo ʻo e Palōfitá
Tokoni ke Fakamoʻui
Mei ha lea ʻi he konifelenisi lahi ʻo ʻEpeleli 2007.
Ko hono fakamoʻoniʻi ʻe Palesiteni Monisoni ʻoku ʻi ai ʻetau totonu ki he tokoni ʻa e ʻEikí.
Lolotonga e Tau Lahi Hono II ʻa Māmaní, ne fakanofo au ko ha kaumātuʻa—ko e uike ia ʻe taha ki muʻa peá u ʻalu ʻo ngāue he tautahí. Naʻe fakahekeheka au ʻi he tauʻanga lēlué ʻe ha taha ʻo ʻeku kau pīsopelikí. Ki muʻa pea mavahe e lēlué, naʻá ne tuku ki hoku nimá ha tohi: Ko e Tohi Tuʻutuʻuni ʻa e Faifekaú. Ne u kata peá u pehē ange, “Ko ʻeku ʻalú ki he tautahí—ʻoku ʻikai ko haʻaku ʻalu ʻo ngāue fakafaifekau.” Naʻá ne tali mai, “ʻAve pē. Mahalo pē naʻa ʻaonga.”
Naʻe ʻaonga ia. Lolotonga e ako fakakautaú, naʻe fakahinohinoʻi kimautolu ʻe homau takí ki he founga lelei taha hono faʻo homau valá ʻi ha fuʻu tangai. Naʻá ne talamai leva, “Kapau ʻoku ʻi ai haʻo faʻahinga meʻa fefeka tapafā, ʻai ia he takele ʻo e tangaí pea he ʻikai toe maveu ho valá.” Ne u fakakaukau, “Te u maʻu mei fē ha meʻa fefeka tapafā?” Fakafokifā ne u manatuʻi Ko e Tohi Tuʻutuʻuni ʻa e Faifekaú. Ne siʻi faifatongia ai pē ʻa e tohí ni ʻi he uike ʻe 12 he takele ʻo e tangaí.
ʻI he pō ki muʻa homau taimi ʻatā he Kilisimasí, ne lōngonoa homau nofoʻangá. Fakafokifā ne u fakatokangaʻi hoku kaungāmeʻa he mohenga hoko maí— ko Līleni Meulolo, ko ha mēmipa foki mo ia ʻo e Siasí,—ʻokú ne toʻe mamahi. Ne u ʻeke ange, “Meulolo, ko e hā e meʻa ʻoku hokó?”
Naʻá ne tali mai, “ʻOku ou puke. ʻOku ou puke lahi.”
Ne toe lōloa ange e taimí; pea toe leʻo lahi ange ʻene toʻé. Faifai naʻá ne fanafana mai, “ ʻE Monisoni, ko e kaumātuʻa koā koe?” Ne u ʻio ange, peá ne kole mai, “Faingāue muʻa kiate au.”
Ne u ʻiloʻi ne teʻeki ai ke u faingāue tuʻo taha. Ne u lotu ki he ʻOtuá ʻo kole ha tokoni. Ne ʻomi e talí: “Sio ki he takele ʻo e tangaí.” Ko ia, ʻi he taimi 2 hengihengí, ne u huaʻi ai e ʻū meʻa ne faʻo he tangaí. Ne u ʻave leva ki he māmá e Tohi Tuʻutuʻuni ʻa e Faifekaú ʻo u lau e founga ʻo e faingāue ki he mahakí. Ne u faingāue kae tuʻu pē ha kau folautahi ʻe toko 120 tupu nai ʻo sio. Ki muʻa peá u toe faʻo hoku valá kuo mohe maʻu ʻa Līleni Meulolo ia.
ʻI he pongipongi hono hokó, naʻe tafoki ʻa Meulolo ʻo malimali mai mo ne pehē, “ʻE Monisoni, ʻoku ou fiefia ʻi hoʻo maʻu e lakanga fakataulaʻeikí!” Naʻe lahi ange ʻeku loto houngaʻiá ʻi heʻene fiefiá—ʻikai ngata pē heʻeku loto houngaʻia koeʻuhí ko e lakanga fakataulaʻeikí, ka koeʻuhí ko ʻeku moʻui taau ke maʻu e tokoni ne u fie maʻu ʻi ha taimi naʻe fie maʻu vivili ai.
Kapau ʻoku tau fai e ngāue ʻa e ʻEikí, ʻoku ʻi ai leva ʻetau totonu ki he tokoni ʻa e ʻEikí. Kuó Ne tokoniʻi au ʻi ha ngaahi taimi lahi heʻeku moʻuí.
Faitā ʻa David Newman; tā fakatātaaʻi ʻe Michael T. Malm