KoʻEku Taumuʻa Totonu ʻi Heʻeku Hoko ko ha Faifekaú
Ko e māhina pē ia ʻe ua ʻeku ngāue fakafaifekau taimi kakato ʻi ʻĀsenitiná mo hono fakahā ange ʻoku fakamaʻu ke mali hoku tehina ʻe toko taha peé. Ne vāofi ʻema tupu hake mo Lepeká peá ma fakaʻānaua ki he taimi te ma takitaha mali aí, ka ko ʻeni he ʻikai te u ʻi ai heʻene malí.
Ne lī ange heʻeku ongo mātuʻá e palaní, ngaahi tā, lisi ʻo e meʻakaí mo e taimi-tēpile ʻo e malí, ka ne u kei ongoʻi pē ʻa e ʻikai ke u ʻi aí, ʻeku tuēnoá mo ʻeku mamaʻó. Naʻe faingataʻa mo tuai e ngāue fakafaifekaú. Ne u fifili pe ko e hā ʻeku meʻa naʻe fai he feituʻu mamaʻo ko ʻeni mei ʻapí, pea kamata ke u puputuʻu pe ko e hā koā e meʻa naʻe fie maʻu ke u fakahokó.
Neongo ia, ne u ʻiloʻi kuo ui au ʻe he ʻEikí ki he ngāué, pea ne u maʻu ha fakamoʻoni mālohi ʻo kau ki he lotú mo e mālohi ʻo e lakanga fakataulaʻeikí. Ne u maʻu ha tāpuaki ʻo e fakafiemālié ne talaʻofa mai ai kiate au naʻá ku ʻi he feituʻu naʻe fie maʻu ke u ʻi aí.
Ne faʻa vahevahe ʻe kimautolu kau faifekaú ʻa e naʻinaʻi ʻoku ʻi he Molonai 10:4–5. Ne u tui mālohi ki he talaʻofa ʻa e ongo veesi ko iá—kapau te u kole ki he ʻOtua ko ʻeku Tamai Taʻengatá, ʻi he huafa ʻo Sīsū Kalaisí, ʻe lava ke u ʻiloʻi ʻa e moʻoni ʻo e ngaahi meʻa kotoa pē ʻi he mālohi ʻo e Laumālie Māʻoniʻoní. Ne u lotu fakamātoato ke ʻiloʻi pe naʻá ku fai koā e meʻa totonú ʻi heʻeku haʻu ki ʻĀsenitina kae ʻikai ke u nofo pē ʻi ʻapí, he ne u mei tokoni ai ki hoku tehiná hono teuteu ʻene malí. ʻI he ofi ange ʻa e taimi ʻo ʻene malí, naʻe fakaʻau ke fakamātoato ange ai pē ʻeku ngaahi lotú. Ne u ongoʻi e ivi fakafiemālie ʻo e Laumālié, ka ne u kei ʻamanaki pē ki ha tali.
ʻI he uike ʻe ua pea fai e malí, ne ma lue mai ai mo hoku hoá ki ʻapi hili ʻemau kai hoʻatā mo ha kāingalotu ʻo e kolo ne ma ngāue aí. Naʻe tuʻu e kolo ko ʻeni ʻo e Siasí ʻi ʻĀsenitina lotoloto, pea ko e anga fakafonuá ia ke mohe ʻa e kakaí ʻo mālōlō he taimi hoʻataá. Naʻe ʻikai faʻa ʻiloʻiloa holo ha taha he taimi ko ʻení.
Ka ʻi heʻema luelue atú, ne ui mai ha talavou kiate kimaua. Ne lahi hono fakamataliliʻi kimaua ʻe he kau talavoú, ko ia ne ma hanga kehe pē mo lue. ʻI heʻene toe ui angé, ne u ongoʻi ke tali atu ʻene uí.
Ko hono hingoá ko Holeisiō pea naʻá ne fie ʻilo pe naʻá ma maheni mo ha ongo finemui naʻá na faʻa lau e Tohi ʻa Molomoná mo ha taʻahine naʻá ne tuofefine ʻaki. Naʻá ne talamai naʻá ne maʻu ha ongo makehe ʻi he taimi ne lau ai ia ʻe he ongo sisitā naʻá na ngāue ʻi homau koló. Naʻá ne fie ʻilo pe ʻe lava ke ne haʻu ki homa siasí.
ʻI heʻema akoʻi ʻa Holeisiō pea tokoni mai mo e kāingalotu ʻo e koló, naʻe vave ʻene ʻofa ʻi he ongoongoleleí. Ne liliu ʻene moʻuí ʻi heʻene tupulaki he ongoongoleleí, ka naʻe ʻikai fiemālie ki ai hono fāmilí pea liʻaki ia ʻe hono ngaahi kaungāmeʻá. Neongo ia, naʻe ongoʻi ʻe Holeisiō e ʻofa ʻa e ʻEikí peá ne fie muimui kiate Ia. Ne u aʻusia e niʻihi ʻo e ngaahi meʻa makehe taha ʻi heʻeku ngāue fakafaifekaú ʻi hono akoʻi ʻo Holeisioó.
Lolotonga e tangutu hoku fāmilí ʻi he Temipale ʻOkalani Kalefōniá kae fakahoko ʻe hoku tehiná ʻa e taha ʻo e ngaahi ouau ʻe tokoni ke teuteu ai ki he puleʻanga fakasilesitialé, ne u tangutu au ʻi ha kiʻi falelotu ʻi Sēnolo Piko ʻi ʻĀsenitina ʻo talitali ke ʻosi e ʻinitaviu ʻa Holeisiō ke maʻu hono ʻuluaki ouau fakamoʻuí—ʻa e papitaisó. Naʻe lava pē ʻe hoku tehiná ʻo teuteu ki hono ngaahi ouaú taʻe te u tokoni ki ai, kae mahalo naʻe ʻikai mei lava ʻe Holeisiō ia ke fakahoko ʻa e meʻa tatau. Naʻá ne fie maʻu ke u akoʻi mo hoku hoá ʻa e ongoongoleleí kiate ia, pea ne u fie maʻu ia ke ne fakamanatu mai ʻa e taumuʻa totonu ʻeku hoko ko ha faifekaú—ke tokoni ki hono ʻomi e ngaahi laumālié kia Kalaisi.
ʻI heʻeku teuteu ke mavahe mei ʻĀsenitina he ʻosi ʻeku ngāué, naʻe teuteu ʻa Holeisiō ia ke ʻalu ʻo ngāue fakafaifekau. Naʻe fakafou ʻiate ia hono tali mai ʻe he Tamai Hēvaní ʻeku ngaahi lotú, hili iá naʻe fekauʻi atu ʻa Holeisiō ke ne tali e ngaahi lotu ʻa e niʻihi kehé.