Higala ngadto sa Higala

Kaisug sa Pagpuyo sa Ebanghelyo

Gikan sa usa interbyu uban ni Elder Erich W. Kopischke sa Seventy, nag-alagad isip Unang Magtatambag sa Europe Area Presidency; pinaagi ni Hilary M. Hendricks

“Ayaw pagkahadlok, … kay ang Ginoo nga imong Dios magauban kanimo bisan asa ikaw paingon” (Josue 1:9)

Ang akong amahan, si Kurt, usa ka batang lalaki sa Poland panahon sa Ikaduhang Gubat sa Kalibutan. Sa kanunay siya gigutom, gitugnaw ug nahadlok. Dayon usa ka butang nga nindot kaayo ang nahitabo. Ang iyang 10 anyos nga higala nga si Ottor Dreger midapit kaniya sa pag-adto sa Sunday School uban sa mga miyembro sa Ang Simbahan ni Jesukristo sa mga Santos sa Ulahing mga Adlaw. Sa Sunday School, si Kurt ug Otto nakakat-on nga sila mga anak sa Dios. Sila nanganta. Sila nakakat-on sa pag-ampo. Si Kurt nakagusto sa iyang gibati kon moadto siya sa simbahan: malinawon ug malipayon. Siya mihangyo sa iyang mga ginikanan ug iyang igsoong babaye nga mouban kaniya. Sa wala madugay ang akong papa ug ang iyang pamilya nabunyagan. Ang ebanghelyo ni Jesukristo mitabang kanila nga magmaisugon sa lisud nga mga panahon.

Ang akong amahan intelehente kaayo, ug siya buot nga moeskwela sa usa ka unibersidad. Niadtong panahona ang gobyerno diin sila nagpuyo mipili og kinsa ang maka-eskwela sa mga unibersidad ug si kinsa ang dili. Ang gobyerno dili buot sa katawhan nga motuo sa Dios. Si Papa gisultihan nga siya makaeskwela lamang sa unibersidad kon siya mohunong sa pagtambong sa Simbahan ug sa paghisgot kabahin sa Langitnong Amahan ug ni Jesukristo.

Ang akong amahan nasayud nga dili siya mahimong mohunong sa iyang tinuohan. Hinoon, siya ug ang akong inahan, si Helga, mihukom nga mobiya sa ilang panimalay. Sila misakay og tren padulong sa Kasadpang Germany, nag-ampo nga sila tugutan sa pagsulod sa nasud. Sa utlanan ang mga opisyales sa kapulisan nga nag-inspeksyon sa mga train wala mousisa sa bahin sa kwarto diin nagsakay ang akong mga ginikanan. Busa sila nakasugod og bag-ong kinabuhi sa usa ka nasud diin sila makasimba sa Dios. Duha ka buwan ang milabay ako natawo.

Sama sa akong mga ginikanan, ako nagkinahanglan og kaisug sa pagpuyo sa ebanghelyo. Ako migahin og usa ka tuig isip sundalo sa army sa Germany. Kadaghanan sa mga sundalo naggamit og dili maayo nga mga pinulongan, nagsigarilyo, ug nagbuhat og ubang mga butang nga ako nasayud nga ako kinahanglan dili mobuhat. Usahay ako mibati nga nag-inusara, apan ako sa kanunay naningkamot sa paghupot sa mga sumbanan sa Langitnong Amahan. Ang mga opisyales mirespeto sa akong pasalig ug mitugot kanako og oras sa paggawas aron sa pagtambong sa mga kalihokan sa Simbahan.

Sa katapusang gabii sa serbisyo sa usa ka sundalo, ang sundalo ug ang iyang mga higala mag-inom og daghang alkohol ug maghimo og binugoy nga pagtipun-tipon. Ako mihunahuna ug miampo kabahin sa unsay akong buhaton kon moabut ang akong katapusang gabii. Sa dihang kini miabut, akong gisultihan ang mga sundalo nga nagserbisyo uban kanako, “Maghimo kita og usa ka butang nga wala pa gayud sukad mabuhat kaniadto.” Kami nag-ilis sa among labing nindot nga mga amerikana ug miadto aron sa pagpanamilit og hilum ngadto sa among mga lider sa kasundalohan. Ang among major dili makatuo niini. Ako mibati nga ang Langitnong Amahan migiya kanako sa pagpangita og tubag sa akong problema. Naglantaw og balik, akong nakita nga ang labing nindot nga mga panalangin sa akong kinabuhi nangabut pinaagi sa pagsunod sa mga tambag sa mga propeta ug sa paghupot sa mga kasugoan sa Dios.

Usahay ang imong mga higala buot nga ikaw mobuhat sa mga butang nga ikaw nasayud nga dili husto. Ayaw gayud kalimot sa imong saad nga mopuyo sa mga sumbanan sa Langitnong Amahan. Samtang ikaw naningkamot sa pagsunod sa Iyang mga kasugoan, Siya mopanalangin kanimo nga masayud unsa ang imong isulti ug buhaton. Siya motabang kanimo nga ikaw dili mobati og kahadlok. Sama sa higala sa akong amahan nga si Otto, ikaw mahimong makigbahin sa imong mga higala unsa ang imong nahibaloan kabahin sa Langitnong Amahan ug ang mga pamaagi nga ikaw mobati sa Iyang gugma. Ang imong kaisug sa pagbuhat unsa ang tarung makahimo og kalainan!

Paghulagway PINAAGI NI Daniel Lewis; mga litrato sa maayong kabubut-on ni Elder Kopischke

Sa edad nga 10.

Uban sa iyang igsoong lalaki ug igsoong babaye.

Ang passport ni Elder Kopischke sa dihang upat pa ang iyang panuigon.