Pagtipig og Pagkaon ug Tubig sa Panimalay: Usa ka Bag-ong Mensahe
Tan-awa ang petsa sa paghupas sa inyong mga ideya kabahin sa pagtipig og pagkaon ug tubig sa panimalay. Tingali og gikinahanglan nga inyong ilabay ang pipila niini.
Isip usa ka nag-inusarang inahan nga nagtrabaho sa usa ka opisina sa abogado sa Phoenix, Arizona, USA, si Evelyn Jeffries nanglimbasog sa pagpangita og panahon ug lugar nga gikinahanglan alang sa pagtipig og pagkaon ug tubig sa panimalay. Bisan tuod og siya nagtambong sa mga kalihokan ug mga miting kabahin sa pagtipig og pagkaon ug tubig sa panimalay ug naningkamot nga magmasulundon sa tambag sa propeta, sama sa daghang mga miyembro sa Simbahan, siya naglisud sa paghunahuna unsa gayud ang iyang buhaton sa gatusan ka libra nga trigo [wheat] nga siya gisultihan nga iyang gikinahanglan alang kaniya ug sa iyang anak nga babaye.
Sa dihang ang usa ka sister sa iyang ward misugyot og laing pamaagi, si Sister Jeffries nakadiskubre og solusyon sa malampusong pagtipig sa pagkaon ug tubig sa panimalay: sa kanunay ug sa hinay-hinay nga pagdugang sa tagana sa iyang pagkaon.
Naggahin og piho nga kantidad sa iyang badyet alang sa pagtipig og pagkaon ug tubig sa panimalay, siya nagpalit og pipila ka sobra nga mga butang gikan sa grocery matag semana. Siya usab nagpalit og usa ka nag-unang pagkaon sama sa mga lugas ug mongos gikan sa sentro sa tipiganan og pagkaon ug tubig sa Simbahan matag buwan.
Daghang mga tuig ang milabay, sa Oktubre 2002, si Sister Jeffries nadani sa dihang si Presidente Gordon B. Hinckley (1910–2008) misugyot nga ang mga miyembro sa Simbahan mogamit og mas yano nga pamaagi sa pagtipig og pagkaon ug tubig sa panimalay.
“Makasugod kita bisan ginagmay,” si Presidente Hinckley mipasabut. Mahimo kitang mosugod og usa ka semana nga tagana sa pagkaon ug sa hinay-hinay padak-on kini ngadto sa usa ka bulan, ug unya ngadto sa tulo ka bulan.1
Si Sister Jeffries naka-alingat nga “ang nakanindot niini nga sistema mao ang pagkabagay niini alang sa mga pamilya nga bag-o lamang nga misugod sa ilang mga programa sa pagtipig, ingon man usab niadtong nagpuyo sa gamay nga mga panimalay ug mga apartment, diin ang lugar igo ra. Si Presidente Hinckley tataw nga miila nga ang kausaban ug pagpahiangay gikinahanglan aron kitang tanan makapahimulos gikan sa dinasig nga programa sa Ginoo.”
Usa ka Bag-ong Pamaagi
Sa diwa sa gipamulong ni Presidente Hinckley, ang mga lider sa Simbahan mihukom sa pag-usab sa pagtuki og maayo sa ilang pamaagi sa kaugalingong pagpaningkamot, mangita og mga paagi sa pagpalig-on og dugang sa mga panghunahuna kabahin sa pagtipig og pagkaon ug tubig sa panimalay ug sa pagpangandam sa panalapi. Isip resulta, ang Simbahan mimantala sa pamplet nga Andama ang Matag Butang nga Kinahanglanon: Pagtipig og Pagkaon ug Tubig sa Panimalay, naglatid og bag-ong mga giya alang sa pagpangandam sa panimalay nga naghatag sa mga miyembro sa Simbahan og usa ka yano, upat ka lakang nga pamaagi sa pagbuhat sa pagtipig og pagkaon ug tubig sa panimalay.
Mao kini ang mga mosunod:
-
Sa hinay-hinay paghipos og gamay nga tagana sa pagkaon nga kabahin sa inyong normal, inadlaw-adlaw nga pagkaon hangtud kini igo sulod sa tulo ka bulan.
-
Pagtipig og tubig-ilimnon.
-
Pagtigum og reserba nga kwarta pinaagi sa paggahin og diyutay nga kwarta matag semana, ug sa hinay-hinay dugangi kini og kasarangan nga kantidad.
-
Sa diha nga ang mga pamilya makakab-ot niining tulo ka mga katuyoan, sila gitambagan sa pagdugang sa ilang mga paningkamot, ingon nga itugot sa kahimtang, ngadto sa usa ka tagana nga taas og tagal sa nag-unang mga pagkaon sama sa mga lugas, mga lagutmon ug uban pang nag-unang kabuhian.
Sa bag-ong mga giya, ang Tigdumalang Bishop nga si H. David Burton miingon, “Ang atong katuyoan mao ang pagtukod og yano, dili mahal, ug makab-ot nga mga programa nga motabang sa katawhan nga mahimong sa kaugalingon mapaningkamuton. Kita masaligon nga pinaagi sa pagpaila niining pipila, yano nga mga lakang kita makahimo, sa ngadto-ngadto, sa pagbaton og mas daghang kalampusan.”
Giya 1: Paghimo og tulo ka buwan nga tagana sa hinay-hinay.
Pagsugod sa ginagmay ug buhata ang labing maayo ninyong mahimo. Pagsugod pinaagi sa pagpamalit og pipila ka sobra nga mga butang nga idugang sa inyong tipiganan matag semana. Paningkamot sa paghimo og usa ka semana nga tagana; dayon padaka-a kini ngadto sa usa ka buwan nga tagana, dayon tulo ka buwan nga tagana. Pinaagi sa paghimo sa inyong tagana sa hinay-hinay, kamo makalikay sa kalisud sa panalapi ug makasugod sa dalan padulong sa kaugalingong pagpaningkamot.
Ang pamilyang Lugo sa Valencia, Venezuela, nasayud nga kining bag-ong pamaagi sa pagsugod og ginagmay ug makanunayon makahatag og dakong bahinan. Human sa pagpaminaw sa kinatibuk-ang komperensya, si Brother Omar Lugo, usa ka miyembro sa Simbahan sa Falcón Venezuela District, mibati og pagdasig sa pagsugod sa iyang kaugalingong pagtipig og pagkaon ug tubig sa panimalay. Iyang gihisgutan ang butang uban sa iyang pamilya, ug sila miuyon sa pagsunod sa tambag sa propeta.
Sila misugod sa paggahin og pagkaon, tubig, ug kwarta, ginagmay sa hinay-hinay. Sa una ang kalainan dili kaayo mailhan. Apan sa wala madugay ang mga Lugo nakakita nga sila nakapundo og ubay-ubay nga reserba. Pipila ka mga buwan human sila misugod sa paghimo sa ilang pagtipig og pagkaon ug tubig sa panimalay, usa ka welga sa mga trabahante sa Venezuela mibutang sa daghang lokal nga mga trabahante sa peligro. Si Brother Lugo mao ang usa niadto kinsa sa katapusan nawad-an sa ilang mga trabaho.
Sulod sa usa ka higayon ang iyang pamilya nagpakabuhi sa mga tinigum. Pito ka buwan wala madugay ang pamilyang Lugo nagsalig ra gayud sa pagkaon nga ilang gitipigan. Miabut og hapit duha ka tuig alang kang Brother Lugo sa pagpangita pag-usab og trabaho, apan ang iyang pamilya nakahimo sa paglungtad sa lisud nga mga hagit sa pagkawalay trabaho. Sila nakahimo sa ilang reserba sa hinay-hinay, ug sa diha nga ang kalisud miigo, sila andam ug ang Ginoo mipanalangin kanila.
Sama sa pamilyang Lugo, ang mga miyembro sa Simbahan mapanalanginan sa ilang pagkamasulundon ngadto sa tambag sa Unang Kapangulohan samtang sila sa hinay-hinay naghimo sa ilang pagtipig og pagkaon ug tubig sa panimalay. “Kami naghangyo kaninyo nga magmaalamon samtang kamo nagtipig og pagkaon ug tubig ug nagdugang sa inyong mga tinigom,” ang Unang Kapangulohan mipasabut. “Ayaw pasubrahi; kini walay kaalam, pananglitan, ang pagpangutang aron sa paghimo sa inyong pagtipig og pagkaon sa usa ka higayon.” Hinoon, sila misugyot og igo-igo, makanunayon nga pamaagi. “Uban sa mabinantayong pagplano, kamo, sa ngadto-ngadto, makahimo og tagana sa pagtipig og pagkaon ug tubig sa panimalay ug usa ka reserba sa kwarta.”2
Giya 2: Pagtipig og tubig-ilimnon
Sa mga panahon sa panginahanglan, ang pagka-adunay tubig nga mainom mao ang makahimo og kalainan tali sa kinabuhi ug kamatayon—o sa labing kubos tali sa kalinaw ug kabalaka. Pangutan-a ang pamilyang Kawai, mga miyembro sa São Paulo Brazil Stake. Sila kanunay nga nagtipig og pagkaon ug tubig sulod sa 20 ka tuig. Bisan og ang ilang gamay nga apartment walay daghang kwarto nga magamit, ang mga Kawai mihukom sa pagtipig og pagkaon ug tubig sa panimalay nga usa ka unahunon.
Si Sister Kawai nagsulti sa usa ka kasinatian nga kana nga desisyon nakatubos. “Ako diha sa ospital nga bag-o lamang nanganak sa dihang akong nahibaloan nga adunay problema ang mga tubo sa tubig sa siyudad,” si Sister Kawai mipasabut. “Gatusan ka libo nga mga tawo ang walay tubig. Apan ako wala mabalaka kabahin sa pagpauli sa panimalay. Ako dihay kalinaw sa hunahuna kay nasayud nga ang akong pamilya adunay tubig nga mainom.”
Giya 3: Paggahin og gamay nga kwarta.
Gikan sa Unang Kapangulohan miabut kining tambag: “Kami nag-awhag kaninyo bisan asang dapit kamo nagpuyo sa kalibutan sa pagpangandam alang sa kalisdanan pinaagi sa pagtan-aw sa kahimtang sa inyong mga panalapi. Kami nagsugyot kaninyo nga igo-igoa ang inyong mga gastohanan. … Pagtigum og dyutay’ng kwarta kanunay aron sa hinay-hinay makatigum og reserba sa kwarta.3
Sa Abril 2007 nga kinatibuk-ang komperensya si Bishop Keith B. McMullin, Ikaduhang Magtatambag sa Tigdumalang Bishopric, mipalig-on og dugang niini nga baruganan, nag-awhag sa mga miyembro sa Simbahan sa “pagtigum og gamay nga kwarta, kon mahimo pipila ka mga sinsilyo matag semana. Kining igo-igo nga paagi sa dili madugay makahimo kanila sa pagbaton og pipila ka mga buwan nga reserba.”4
Pinaagi sa hinay-hinay nga pagtigum og reserba sa kwarta, kita maandam alang sa wala damha nga mga pagsulay ug adunay dugang nga gidak-on sa kasiguroan ug kalinaw sa atong mga kasingkasing.
Giya 4: Kon mahimo, sa hinay-hinay paghimo og dugay og tagal nga tagana.
“Sa mga panginahanglan nga taas og tagal,” mipasabut ang pamplet nga Andama ang Matag Butang nga Kinahanglanon, sa “hinay-hinay paghimo og tagana sa mga pagkaon nga molungtad og dugay ug nga inyong magamit aron magpabiling buhi, sama sa trigo [wheat], bugas humay, ug mga liso.”5
Ang paghimo og dugay og tagal nga pagtipig mas sayon kay sa gihunahuna sa uban. Si Dr. Oscar Pike ug ang iyang mga kaubanan sa Brigham Young University Department of Nutrition, Dietetics, and Food Science mihimo og pipila ka mga lawom nga mga pagtuon kabahin sa pagtipig og mga pagkaon nga dugay og tagal. Sila nakadiskubre og usa ka butang nga makapatingala: husto nga pagkaputos ug pagkatipig nga uga nga pagkaon magpabilin ang kadaghanan sa iyang kalidad (kalamion) ug ang bili sa nutrisyon gikan sa 20 hangtud 30 ka mga tuig o labaw pa human mabutang sa tipiganan—mas dugay pa kay sa gituohan kaniadto.
Kini nagpasabut nga ang mga miyembro sa Simbahan makatipig og pipila ka mga pagkaon nga dugay og tagal nga dili mabalaka sa kanunay nga pagpuli-puli sa pagkaon. Sila makasiguro nga ang ilang tagana anaa aron makapabuhi kanila kon wala na silay laing makaon.
Ang Panahon sa Pagsugod mao Karon
“Tingali sa nangagi ang pagtipon og usa ka tuig nga tagana sa pagkaon mahimong makahahadlok og gamay ug gani supak sa balaod sa pipila ka mga dapit,” miingon si Dennis Lifferth, ang tigdumalang direktor sa Church Welfare Services. “Apan kining bag-ong pamaagi naghangyo kanato sa pagbuhat sa labing maayo nga atong mahimo, bisan kon ang atong mahimo mao lamang ang paggahin og usa ka lata o duha sa matag semana. Kon ang propeta mosugo kanato sa pagbuhat og usa ka butang, kita makakita og paagi sa pagtuman niining kasugoan ug makadawat sa mga panalangin.”
“Kining bag-o nga programa mabuhat sa matag usa,,” mipasabut si Bishop Burton. “Ang unang lakang mao ang pagsugod. Ang ikaduha mao ang pagpadayon. Dili kini igsapayan unsa ka dali kita moabut didto kay sa atong pagsugod ug pagpadayon sumala sa atong mga abilidad.”
Paghulagway sa litrato pinaagi ni Welden C. Andersen
Ubos sa wala: gilitratohan ni David Newman; ubos sa tuo: Brigham Young, ni John Willard Clawson
Sa 1936 ang programa sa welfare sa Simbahan gisugdan ubos sa direksyon sa Unang Kapangulohan. Gikan sa wala: David O. McKay (Ikaduhang Magtatambag), Heber J. Grant (Presidente), ug J. Reuben Clark Jr. (Unang Magtatambag).