Mga Ideya sa Family Home Evening

Kining mga sugyot sa pagtudlo mahimong gamiton sa klasehanan ingon man usab sa panimalay. Mahimo ninyong ipahaum kini nga mga ideya sa inyong pamilya o klase.

“Ang Celestial nga Kinaiyahan sa Kaugalingong Pagpaningkamot,” p. 15: Ipakigbahin ang istorya ni Presidente Marion G. Romney kabahin sa tapulan nga mga kanaway. Nganong dili man sila makakuha og isda? Ipatin-aw ang kaugalingong pagpaningkamot, ug paghisgut og mga pamaagi nga ang inyong pamilya mahimong mas mapaningkamuton sa kaugalingon. Basaha ang katapusang duha ka paragrap sa artikulo. Paghimo og tumong sa pagtabang sa silingan, gigamit ang kusog sa inyong pamilya.

“Naglakaw pinaagi sa Hugot nga Pagtuo, Dili pinaagi sa Igtalan-aw,” p. 22: Taptapi ang mata sa lain-laing mga miyembro sa pamilya, ug hatagi sila og gagmay nga mga butang nga ilang ilhon. Hisguti giunsa nila sa pagkaila niining mga butanga. Basaha ang kabahin ni Sister Daggi, ug hisguti kon unsa ang gipasabut sa naglakaw pinaagi sa hugot nga pagtuo, dili pinaagi sa igtalan-aw.

“Nganong Kita Magbunyag alang sa mga Patay?” p. 32: Sugdi ang leksyon pinaagi sa pagbasa sa unang paragrap sa artikulo. Uban sa mga miyembro sa pamilya, basaha ang mga kasulatan nga gihisgutan sa artikulo. Hisguti ang kahulugan sa matag kasulatan ug sa unsa nga paagi kini magamit ngadto sa bunyag alang sa mga patay. Tapusa pinaagi sa role-playing kon unsaon sa pagpakigbahin sa mga baruganan nga nakat-unan diha sa artikulo ngadto sa mga higala ug pamilya.

“Pagpangita ug Pagluwas,” p. 38: Ipakigbahin ang artikulo uban sa inyong pamilya. Pagmugna og inyong kaugalingon nga komite panahon sa emerhensya sulod sa imong pamilya; hatagi og responsibilidad ang matag miyembro sa pamilya. Paghisgot og mga sitwasyon sa emerhensya nga mahimong inyong atubangon. Pagplano unsa ang inyong buhaton aron makatabang nga makalikay o makapangandam alang niining mga sitwasyon. Paghimo og usa ka tumong sa pagpadayon og usa ka plano sa emerhensya ug pagbansay sa paggamit niini.

“Mobarug alang kang Caleb,” p. H8: Dapita ang matag usa sa pagsulti og usa ka maayo nga butang kabahin sa matag tawo diha sa pamilya. Isaysay ang istorya ni Caleb. Hisguti ang mga lihok ni Luke ug unsa ang nahitabo tungod sa iyang kaisug. Dapita ang mga miyembro sa pamilya sa pagpakigbahin og usa ka panahon sa dihang sila o usa ka tawo nga ilang nailhan nga mibarug alang sa usa ka tawo. Paghimo og usa ka tumong sa pagbarug alang sa uban.