Panahon sa Pagpakigbahin
“Ang Akong Balay Usa ka Balay sa Kahusay”
“Han-aya ang inyong mga kaugalingon; andama ang matag butang, nga kinahanglanon, ug pagtukod og usa ka balay, gani usa ka balay sa pag-ampo, usa ka balay sa pagpuasa, usa ka balay sa hugot nga patuo, usa ka balay sa pagtulun-an, usa ka balay sa himaya, usa ka balay sa kahusay, usa ka balay sa Dios” (D&P 88:119).
Ang Ginoo miingon, “Ang kong balay usa ka balay sa kahusay” (D&P 132:8). Ang templo mao ang balay sa Dios, apan ang atong mga panimalay mahimong usa usab ka balay sa kahusay. Ang usa ka balay sa kahusay mao ang usa ka panimalay diin kita naningkamot sa pagbuhat ingon sa gitudlo ni Jesus. Kini usa ka panimalay diin kita mobati og gugma ug kalinaw.
Ang Langitnong Amahan naghatag ngadto sa mga ginikanan sa responsibilidad sa pagtudlo ug pag-amuma sa ilang mga anak uban sa gugma ug pagkamabination. Siya naghatag sa mga bata sa responsibilidad sa pagsunod ug pagtahud sa ilang mga ginikanan. Ang Langitnong Amahan buot nga ang matag miyembro sa pamilya magtinabangay sa paghimo sa ilang panimalay nga usa ka malipayon, malinawon nga dapit diin ang Espiritu maanaa.
Si Elder Glenn L. Pace sa Seventy misaysay giunsa sa iyang kamanghurang anak nga babaye pagtabang sa ilang pamilya sa pagbuhat sa mga butang sa pamaagi sa Ginoo. Miingon siya: “Siya ang mopahinumdom kanamo sa paghimo sa pag-ampo sa pamilya. Siya ang naningkamot sa pagpagana kanamo kabahin sa family home evening. Siya nagbuhat sa mga pagpangita sa bahandi [treasure hunts]; siya ang nag-andam og mga pagkaon; iyang buhaton ang bisan unsang butang aron ang pamilya maganahan sa paghimo og family home evening” (“Higala ngadto sa Higala,” Higala, Peb. l997, 7).
Kalihokan
Tang-tanga ang pahina H4 gikan sa magasin, ug ipapilit kini sa baga nga papel. Guntinga ang mga piraso sa puzzle. Basaha ang Doktrina ug mga Pakigsaad 88:119, ug dayon isumpay-sumpay ang mga puzzle sa hustong han-ay sa pulong, ipares ang bersikulo. Kon imo nang nahuman ang puzzle, isulti ang kasulatan sa makadaghang higayon ug sulayi ang pagmemorya niini.
Paghunahuna og mga butang nga imong mabuhat aron sa pagtabang sa imong pamilya nga makaangkon og panimalay sama sa gusto sa Langitnong Amahan nga imong maangkon—usa ka panimalay diin imong mabati ang gugma ug kalinaw, usa ka panimalay diin imong mabati ang Iyang Espiritu.
Han-aya ang inyong mga kaugalingon;
andama ang matag butang nga kinahanglanon;
ug pagtukod og usa ka balay,
gani usa ka balay sa pag-ampo,
usa ka balay sa pagpuasa,
usa ka balay sa hugot nga pagtuo,
usa ka balay sa pagtulun-an
usa ka balay sa himaya,
usa ka balay sa kahusay,
usa ka balay sa Dios.
Mga Ideya sa Panahon sa Pagpakigbahin
-
Pagdapit og usa ka lider sa Primary sa paghisgot kabahin sa usa ka higayon nga siya misunod sa iyang mga ginikanan. Ipakigbahin niya ang mga sangputanan. Ipapakli sa mga bata ang Mga Taga-Colosas 3:20. Ipasabut nga kini nga bersikulo gisulat ni Pablo, kinsa usa ka Apostol ni Jesukristo. Sa dili pa magdungan og basa sa bersikulo, sultihi ang mga bata sa pagpangita og mga tubag ngadto niini nga mga pangutana: Kang kinsa si Pablo nakigsulti? Unsa ang gisulti ni Pablo nga ilang buhaton? Basaha ang kasulatan, ug pangayo og mga tubag. Dayon pangutana: Unsa ang pipila ka mga pamaagi nga ang pagkamasulundon sa inyong mga ginikanan mitabang kaninyo nga magpabiling luwas o mitabang kaninyo sa pagpili og matarung? Pag-iksa og usa ka beanbag ngadto sa pipila ka mga bata, ug hangyoa sila sa pagsulti og usa ka butang nga ang ilang ginikanan nagsugo kanila nga ilang buhaton nga aron sila makasunod. Pagpamatuod kabahin sa ka importante sa pagsunod sa mga ginikanam.
-
Paghatag og kanta: “Ang Akong Mahangturong Pamilya” (2009 Outline para sa Panahon sa Pakigbahin [Sharing Time] ug sa Pasundayag sa mga Bata sa Sakrament Miting). Himoa nga ang mga bata maminaw sa musika sulod sa pipila ka minuto. Dayon ipatukar ang musika pag-usab, ug himoa nga ang mga bata mosunod sa ritmo sa melodiya sa nota pinaagi sa hinay nga pagdokdok sa ilang kumo ngadto sa palad sa ilang pikas kamot aron sa pagrepresentar og pagdokdok sama sa usa ka magtutukod. Pangita og mga hulagway nga nagrepresentar sa importanteng mga pulong sa unang bersikulo (tan-awa ang Primary 1 pakite sa hulagway). I-tape o ipapilit ang matag hulagway ngadto sa usa ka kahon. Isulat ang importanteng mga pulong sa pikas bahin sa kahon. Itudlo una ang kanta pinaagi sa pagpakita sa importanteng mga pulong. Kon ang mga bata makakat-on og usa ka hugpong sa mga pulong, ipatong ang kahon ingon og kamo nagtukod og usa ka balay nga adunay mga block. Kon ang mga bata makakanta sa tanang mga bersikulo hangtud sa katapusan pinaagi sa paggamit sa importanteng mga pulong, ibutang ang tanang mga kahon nga dili magsunod diha sa usa ka linya uban sa mga hulagway nga nag-atubang sa atubangan. Kantaha ang matag hugpong sa mga pulong, ug papilia ang mga bata og usa ka hulagway nga sa ilang hunahuna mopares sa hugpong sa mga pulong. Kon kini mapares, ipabutang og balik sa bata ang kahon sa usa ka lugar aron makatukod og usa ka balay nga ang kilid nga may hulagway makita. Sa matag panahon nga ang mga bata mokanta sa mga pulong “Ako usa ka tigtukod.” ipadungan ang pagdokdok sa ilang mga kumo sa ritmo.
Itudlo ang ikaduhang bersikulo pinaagi sa paggunting og usa ka hulagway sa pamilya ngadto sa mga piraso sa puzzle. Sa likod sa matag piraso isulat ang importanteng pulong gikan sa matag hugpong sa pulong sa ikaduhang bersikulo. Itudlo ang hugpong sa mga pulong ginamit ang importanteng pulong. Kon ang mga bata makahibalo sa hugpong sa mga pulong, ibutang ang piraso diha sa pisara aron makita ang bahin sa litrato. Balika sa matag piraso hangtud nga ilang makompleto ang puzzle sa pamilya. Itudlo ang chorus.
PAGHULAGWAY PINAAGI ni Thomas S. Child