Ang Sambingay sa Napulo ka Dalagang Birhen
Dinhi niini nga sambingay, ang Manluluwas mitudlo kanato unsaon sa pagpangandam sa Iyang Ikaduhang Pag-anhi.
Niining katapusang mga adlaw, ang Ginoo miingon, “Busa pagmatinud-anon, mag-ampo kanunay, nga ang inyong lampara maandam ug magsiga, ug ang lana anaa kaninyo, nga kamo andam sa pag-anhi sa Pamanhonon” (D&P 33:17). Kini nga tambag nagpasabut ngadto sa sambingay sa napulo ka dalagang birhen, diin naghulagway unsaon nato sa pagpangandam alang sa Ikaduhang Pag-anhi ni Kristo (tan-awa sa Mateo 25:1–13). Aniay pipila ka mga pagpasabut nga makatabang kaninyo samtang kamo magtuon niining sambingay ug mamalandong sa iyang kahulugan.
Napulo ka Dalagang Birhen
Kini usa ka batasan sa mga Judeo nga ang pamanhonon moadto sa iyang pangasaw-onon inig ka gabii, diin ang mga dalagang tigtabang sa kaslunong babaye nag-asikaso sa pangasaw-onon. Kon ang pagsingabut sa pamanhonon ipahibalo, kini nga mga dalaga mogawas dala ang mga lampara aron sa pag-iwag sa iyang dalan ngadto sa balay alang sa kasaulugan.
Niini nga sambingay ang mga dalagang birhen nagrepresentar sa mga miyembro sa Simbahan, ug ang pamanhonon nagrepresentar ni Kristo. Ang Ginoo mipasabut ngadto ni Joseph Smith nga ang maalamong mga dalagang birhen mao kadto kinsa “nakadawat sa kamatuoran, ug nakadawat sa Balaan nga Espiritu Santo alang sa ilang paggiya, ug wala malimbongi” (D&P 45:57).
Ang Pamanhonon
Sa Biblia, ang larawan sa usa ka kasal gigamit aron sa paghulagway sa pag-anhi sa Ginoo (tan-awa sa Isaias 62:5; Mateo 22:1–14). Ang mga kasal sa Judeo milakip sa pagpahibalo sa nagsingabut nga pamanhonon ngadto sa panimalay sa pangasaw-onon. Ang mga kasal sa kasagaran magsugod sa gabii, nga ang mga lampara gidagkutan sa kilum-kilum. Busa ang tungang gabii awahi na nga ang napulo ka dalagang birhen magpaabut sa pamanhonon—ug ang pahibalo miabut sa kalit.
Kita wala masayud sa tukmang panahon sa Ikaduhang Pag-anhi ni Kristo, apan kita kinahanglang mangandam alang niini ingon og kini moabut sa bisan unsang panahon—mahapit na o madugay pa.
Mga Lampara
Ang lana sa mga lampara nga gigamit sa mga Judeo sa panahon ni Jesus gitawag og Herodian nga mga lampara, gisunod sa pangalan ni Haring Herod.
Ang lawas sa lampara hinimo sa lapok nga kulunon ug giporma sa usa ka nagtuyok nga ligid sa tigkulon.
Ang agasanan o ang ba-ba hinimo gikan sa usa ka hulmahan.
Ang gunitanan giporma pinaagi sa kamot ug dayon gipatapot ngadto sa lampara.
Ang pabilo hinimo sa mga lanot sa lino o usa ka tukog sa rush ang ibutang sa agasanan, ug dayon ang lampara butangan og lana sa oliba. Sa higayon nga ang pabilo mosuyop sa lana, ang lampara mosiga.
Kini nga mga lampara makahimo sa mga katawhan sa pagdala og kahayag bisan asa sila moadto. Sa samang paagi, kita kinahanglan modala sa kahayag sa ebanghelyo uban kanato (tan-awa sa Mateo 5:14–16).
Lana
Ang mga oliba ihumol una sa tubig aron sa paglimpyo niini ug paghugas sa kapait, ug dayon kini dugmokon aron sa pagpuga sa lana niini. Ang lana sa oliba, gihimo sa tibuok rehiyon sa Mediterranean, adunay daghang gamit sa karaan: pagkaon, mantika sa pagluto, panakot, tambal sa mga samad, sagol sa pagpaanyag ug mga sabon, ug lana sa mga lampara.
Ang lana diha sa sambingay nagrepresentar sa atong hugot nga pagtuo ug pagpamatuod, sa atong kaputli ug paghalad, sa atong maayong mga buhat, ug sa atong paghupot sa mga pakigsaad—ang tanang mga pamaagi diin kita “nakadawat sa Espiritu Santo alang sa [atong] paggiya” (D&P 45:57).
Ang maalamong mga dalagang birhen dili makabahin sa ilang mga lana ngadto sa dili maalamon nga mga birhen tungod kay “ang lana sa espirituhanong pagpangandam dili mabahin” (Marvin J. Ashton, “A Time of Urgency,” Ensign, Mayo 1974, 36).
Mga sudlanan
Ang sudlanan diha sa sambingay mga sudlanan alang sa pagtipig og sobra nga lana. Ang pagkamaalamon nagpasabut nga andam alang sa wala damha nga panghitabo uban sa dugang hugot nga pagtuo, pagpamatuod, ug ang Espiritu sa atong mga kinabuhi. Usahay kita modako nga walay pagtagad, naghunahuna nga kita adunay igo alang sa atong mga panginahanglanon. Apan ang pagsunod sa Manluluwas nagpasabut og labaw pa kay sa igo alang sa atong panginahanglanon. Kini nagpasabut og kanunay nga pagpaningkamot nga labawng maduol ngadto Kaniya, pagpangandam niadtong mga panahon kon ang atong pailub, hugot nga pagtuo ug pagpamatuod pagasulayan.
Ang mga lampara gidagkutan sa kilum-kilum.
Ang pamanhonon miabut sa tungang gabii.
Ang mga lampara nga Herodian sa kasagaran mosiga sulod sa duha ka oras.
Ang Ikaduhang Pag-anhi, pinaagi ni Harry Anderson, © IRI; mga paghulagway PINAAGI NI Dan Burr; paghulagway sa litrato PINAAGI NI Matthew Reier