Mao Gayud UnsayAkong Gikinahanglan
May puno nga eskedyul nga giatubang, ako sayong nagdali-dali og gawas sa pultahan, ang akong backpack puno kaayo og mga libro, unipormi sa karate, sapatos nga pangsayaw, bawon sa paniudto, ug bawon sa panihapon nga akong gikinahanglan aron mabuhi pa og laing nagkapuliki nga adlaw sa kolehiyo. Ako adunay duha ka eksamen nga mibati ako nga dili pa andam, basahonon nga wala mahuman, ug dili paigong oras sa pag-adto sa bisan asang lugar diin ako kinahanglang moadto nianang adlawa.
Nagsul-ob sa sayal nga akong gikinahanglan alang sa akong bangga sa sayaw, ako mibati nga kataw-anan sa akong puno kaayo nga backpack ug naguol nga dili makaabut sa hustong oras alang sa akong unang klase. Sa dihang ako nadalin-as ug natumba sa tunga sa nagkapuliki nga kinasang-an atubangan sa daghan kaayong mga estudyante ug mga sakyanan, ang akong kaulaw ug kahigawad, uban sa nalungag nakong bag-ong pantyhose, nakapahilak kanako. Alas siyete sa buntag, ug ako naghilak na.
Samtang ako mibarug ug milakaw nga nagtakiang padulong sa eskwelahan, ako nag-ampo sa kinasingkasing ngadto sa Ginoo nga magpadala og usa ka tawo nga modasig kanako. Nindot unta kaayo nga makita nako ang akong inahan, apan siya duha ka estado kalayo. Unta ang Ginoo motubag sa akong pag-ampo pinaagi sa usa sa akong kauban sa kwarto nga nagbisita sa usa sa akong mga klase. O tingali Iyang ipadala kana nga lalaki sa ward nga ako nakagusto og maayo.
Ako malaumon nga mitan-aw sa palibut samtang ako nagdali sa akong unang klase apan ako walay nakit-an bisan kinsa nga akong kaila. Ako mikuha sa akong unang eksamen, nga nagluha gihapon, ug nagdali-dali sa akong ikaduhang klase, miabut nga awahi na. Ako naglagot gihapon samtang ako nagdagan sa akong ikatulo nga klase ug samtang ako nagdali nga maandam alang sa akong sunod nga eksamen. Mas maayo ang resulta sa akong eksamen kay sa akong gidahum ug nagkahupay og hinay-hinay sa dihang ako nakakita og mingaw nga dakong hawanan diin ako mahimong mokaon og paniudto samtang magtuon. Ako nagtininuod sa akong mga libro sa dihang ako nakadungog og usa ka tawo nga nagtawag sa akong ngalan.
Ako mihangad aron sa pagtan-aw sa akong visiting teacher, kinsa sukad-sukad wala gayud nako makita sulod sa eskwelahan. Siya milingkod tupad kanako, ug kami nag-istoryahanay sulod sa hapit usa ka oras—dili kabahin sa akong kahigawad nianang adlawa, apan sa mga butang nga maayong nahitabo kanako, among mga plano, ug sa mga butang nga nakapaguol kaniya.
Diha lamang sa iyang pagbiya nga ako nakahinumdom sa akong pakilooy nga pag-ampo nianang buntaga. Sa tinuod ang Ginoo motubag sa akong pag-ampo pinaagi sa babaye kinsa gitawag aron sa pagbantay kanako. Ako buot nga adunay modasig kanako nianang sayo sa buntag, apan Siya nasayud nga ako andam nga makigkita og higala sa dugay-dugay pa niining adlawa—sa dihang ako igo na nga nakalma aron makadawat og paghupay nga akong gikinahanglan ug sa paghatag og paghupay ngadto sa uban kinsa adunay iyang kaugalingon nga mga hagit.
Ang Ginoo nakaila kanako ug mipadala kanako sa mao gayud unsay akong gikinahanglan sa dihang nanginahanglan ako niini.
Ako nag-ampo sa kinasingkasing ngadto sa Ginoo nga magpadala og usa ka tawo nga modasig kanako