Naglakaw pinaagi sa Hugot nga Pagtuo, Dili pinaagi sa Igtatan-aw
Si Daggi Ramirez de Vargas nabuta sulod na sa 15 ka tuig, apan sa daghang mga paagi siya makakita ingon og klaro. “Ang pisikal nga panan-awon makalingaw kaayo,” miingon ang 70 anyos ang edad. “Apan kini makatabon sa atong espirituhanong panan-awon.”
Si Sister Daggi, ingon nga siya nailhan, nabuta sa dihang ang iyang mga retina gikuha sa pag-opera og cataract sa duha ka mata.
“Sa sinugdanan ako naglibug unsaon nako pagbuhat sa tanang butang,” siya miingon. “Apan ako makatrabaho nga maayo ra. Ako mamlantsa, ako manahi, ako magluto. Walay moduol samtang ako magluto,” siya mikatawa. “Ako naggamit og dagkong mga kutsilyo.”
Kon unsa man ka mabalak-on si Sister Daggi kalabut sa iyang pag-amping sa iyang pisikal nga kagawasan, siya ingon usab ka determinadong magpabilin nga sa kaugalingon mapaningkamuton sa espirituhanong paagi, magpuyo pinaagi sa kahayag sa iyang kaugalingong personal nga pagpamatuod mahitungod ni Kristo kay sa magsalig sa uban alang sa kahibalo sa kamatuoran.
Ang Kahayag sa Ebanghelyo
Sa wala pa siya magpasakop sa Simbahan sa 1962, si Sister Daggi, karon usa ka miyembro sa Miraflores Ward, Viña del Mar Chile Archupallas Stake, nakita ang iyang kaugalingon nga bag-ong kasal ug naglibug hain nga simbahan ang tinuod.
Usa ka gabii siya nagdamgo kabahin sa mga tawo gikan sa tibuok kalibutan, ug siya nakakita og dili sagad nga puting sinina. Pagkasunod adlaw, sa panimalay diin siya nagtrabaho sa pagtabang og panglimpyo, iyang nailhan ang samang panapot nga gihayhay sa hayhayan.
Ang iyang agalon misulti kaniya nga ang panapot adunay kalabutan sa mga templo sa Simbahan sa Mormon. Si Sister Daggi sa wala madugay nakigkita sa mga misyonaryo kinsa gikan sa tibuok kalibutan aron sa pag-abli sa iyang espirituhanong mga mata ngadto sa kahayag sa ebanghelyo.
Ang Dalan nga Gibanwagan pinaagi sa Pulong
Si Sister Daggi nahigugma sa ebanghelyo ni Jesukristo, ug siya sagad nga matinud-anong nagbasa sa iyang mga kasulatan hangtud siya nabuta.
“Sa dihang ako nabuta, ako nag-ampo nga makabaton sa Iyang pulong,” siya nahinumdom. Ang pagbaton sa Iyang pulong importante ngadto kaniya isip usa ka simbolo sa espirituhanong panan-awon.
Ug bisan tuod siya kinahanglan gayud karon nga magtuon sa laing mga paagi, si Sister Daggi nagtuo nga “ang pulong maoy lamparahan sa akong mga tiil, ug kahayag sa akong alagianan” (Salmo 119:105). Siya usa ka buhing ehemplo sa saad sa Manluluwas: “Ako ang kahayag sa kalibutan: siya nga magasunod kanako dili gayud magalakaw sa kangitngit, hinonoa magabaton siya sa kahayag nga magahatag og kinabuhi” (Juan 8:12).
Sumala sa iyang bana, si Juan, ang Ginoo mitahud sa iyang sinserong hangyo. “Ang iyang hunahuna makasabut og maayo sa mga butang. Siya makapamulong sulod sa daghang mga oras,” siya mipahiyom nga pinahiwi.
“Kon ikaw mangayo, ikaw makadawat,” siya mitubag. “Ang akong espiritu aduna pay maayo kaayo nga panan-aw.”
Ang Buhat sa Dios Gipakita
Ang mga kasinatian ni Sister Daggi sa pagpaninguhang magpadayon sa iyang pisikal ug espirituhanon nga kaugalingong pagpaningkamot sukad siya nabuta nagpahinumdom sa usa ka buta nga tawo sa Ebanghelyo ni Juan diin ang mga disipulo nangutana, “Rabi, kinsa may nakasala, kini bang tawhana o ang iya bang mga ginikanan, nga nahimugso man siyang buta?”
Ang Manluluwas mitubag, “Dili nga nakasala siya, o ang iyang ginikanan: kon dili aron ang mga buhat sa Dios ikapadayag diha kaniya” (Juan 9:2–3).
Ang mga buhat sa Dios gipakita diha sa kinabuhi ni Sister Daggi. Bisan og siya buta, siya nakakita og daghang mga milagro ug makapamatuod nga “kita nagakinabui pinaagi sa hugot nga pagtuo, dili pinaagi sa atong igtalan-aw” (2 Mga Taga-Corinto 5:7).
Usa ka Dominggo sa gabii ang mga home teacher sa pamilya mibisita. Ang pamilya naglisud tungod sa pagkawalay trabaho nianang panahona, ug kanang gabhiona siya aduna ray tunga sa tasa nga bugas, gamay nga mantika sa pagluto niini ug duha ka gagmay’ng tamatis. Apan mapasalamaton niining matinud-anong mga home teacher, siya midapit kanila kon sila ganahan ba nga magpabilin alang sa panihapon.
“Ang akong anak nga babaye nangutana unsaon ko paghimo niana,” si Sister Daggi nahinumdom. Misugo siya sa iyang anak nga babaye sa pag-andam sa lamesa. Dayon siya miadto sa kusina ug miampo, “Ginoo, Imong napakaon ang 5,000. Ako nangayo lamang alang sa pito.”
“Kana nga kan-on mipakaon og pito ka mga tawo,” siya mipamatuod.
Paghatag og Pasalamat alang sa Iyang Katingalahang Kahayag
Si Sister Daggi nasayud nga bisan ang iyang pisikal nga igtalan-aw nangitngit, adunay mas dakong kahayag diin pinaagi niini siya makakita.
Si Isaias mitudlo nga “ang adlaw dili na mao ang imong kahayag sa adlaw, ni tungod sa kahayag modan-ag ang bulan kanimo: ug ang imong Dios mao ang imong himaya” (Isaias 60:19).
“Si Jesus naghisgot kabahin sa mga katawhan nga makakita apan mga buta. Kini sama sa karon,” si Sister Daggi naguol. “Adunay mga milagro nga nag-alirong kanato, apan daghan kaayo ang wala makakita niini.”
Si Sister Daggi mapasalamaton sa daghang mga panalangin nga iyang napahimuslan ug naningkamot sa pagpuyo sa pahimangno ni Pedro nga “magamantala sa kahibulongang mga buhat niya nga nagtawag kaninyo gikan sa kangitngit ngadto sa iyang katingalahang kahayag” (1 Pedro 2:9).
“Ako kontento. Ang Langitnong Amahan mihatag kanako og maayo kaayo nga kauban. Kami miadto sa templo ug nabugkos,” siya miingon. “Ang akong kinabuhi puno sa mga milagro. Sa espirituhanong paagi, ako makakita og klaro.”
Sa wala: gilitratohan sa © Comstock.com; right: gilitratohan ni Adam C. Olson
Si Jesus Nag-ayo sa Buta, ni Carl Heinrich Bloch, sa maayong kabubut-on sa National Historic Museum sa Frederiksborg in Hillerød, Denmark