Mensahe sa Visiting Teaching

Pagpaluyo, Pag-amuma, ug Pagpanalipod sa Pamilya

Itudlo ang mga kasulatan ug mga kinutlo nga mopanalangin sa mga sister nga inyong bisitahan. Pagpamatuod kabahin sa doktrina. Dapita kadtong inyong gitudloan sa pagpakigbahin unsay ilang gibati ug nakat-unan.

Nganong Akong Kinahanglang Panalipdan ang Doktrina sa Pamilya?

Ang Unang Kapangulohan ug Korum sa Napulog Duha ka mga Apostoles: “Ang pamilya gi-orden sa Dios. Ang kaminyoon tali sa lalaki ug babaye mahinungdanon ngadto sa Iyang mahangturon nga laraw. Ang mga anak adunay katungod nga matawo ngadto sa mga ginikanan kinsa naminyo, maamumahan sa usa ka amahan ug sa usa ka inahan nga nagtahud sa mga panaad sa kaminyon uban sa hingpit nga pagkamatinuoron” (“Ang Banay: Usa ka Pamahayag ngadto sa Kalibutan,” Liahona, Okt. 2004, 49; Ensign, Nob. 1995, 102).

Julie B. Beck, kinatibuk-ang presidente sa Relief Society: “Isip usa ka disipulo ni Jesukristo, matag babaye niini nga Simbahan gihatagan sa responsibilidad sa pagpaluyo, pag-amuma, ug pagpanalipod sa mga pamilya. Ang mga babaye adunay tataw nga mga buluhaton nga gihatag ngadto kanila sukad sa wala pa matukod ang kalibutan. Ug isip usa ka naghupot sa pakigsaad nga Santos sa Ulahing mga Adlaw nga babaye, nahibalo kamo nga ang pagpataas sa inyong tingog agi og pagpanalipod sa doktrina sa pamilya importante ngadto sa kalig-on sa mga banay sa tibuok kalibutan” (“Unsay Labing Maayo nga Mahimo sa Santos sa Ulahing mga Adlaw nga mga Babaye: Barug nga Lig-on ug Dili Matarug,” Liahona ug Ensign, Nob. 2007, 110).

Unsaon Nako sa Pagpanalipod ang Pamilya?

D&P 88:119: “Han-aya ninyo ang inyong mga kaugalingon; andama ang matag butang, nga kinahanglanon, ug pagtukod og usa ka balay, gani usa ka balay sa pag-ampo, usa ka balay sa pagpuasa, usa ka balay sa hugot nga patuo, usa ka balay sa pagtulun-an, usa ka balay sa himaya, usa ka balay sa kahusay, usa ka balay sa Dios.”

Presidente Spencer W. Kimball (1895–1985): “Ang panimalay maoy dangpanan batok sa mga unos ug mga pakigbisog sa kinabuhi. Ang pagka-espirituhanon matawo ug maamumahan pinaagi sa adlaw-adlaw’ng pag-ampo, pagtuon sa kasulatan, mga panimalay nga paghisgut sa ebanghelyo ug may kalabutan nga mga kalihokan, mga home evening, mga family council, mag-uban sa pagtrabaho ug panagdula, pag-alagad sa usag usa, ug pakigbahin sa ebanghelyo uban niadtong naglibut kanato. Ang pagka-espirituhanon maamumahan usab diha sa atong mga lihok sa pagkamapailubon, pagkamabination, ug pagpasaylo ngadto sa usag usa ug sa atong paggamit sa mga baruganan sa ebanghelyo diha sa tibuok pamilya.” (“Therefore I Was Taught,” Tambuli, Ago. 1982, 2; Ensign, Ene. 1982, 3).

Si Elder M. Russell Ballard sa Korum sa Napulog Duha ka mga Apostoles: “Karon ako magtawag sa mga miyembro sa Simbahan ug sa may pasalig nga mga ginikanan, mga apohan, ug mga paryente bisan asa sa hugot nga pagsunod ngadto sa pamahayag [sa banay], sa paghimo niini nga bandera nga sama sa kang Heneral Moroni nga ‘bandera sa kagawasan,’ ug sa pagpasalig sa atong mga kaugalingon sa pagsunod sa lagda niini. …

“Sa kalibutan karon, diin ang pag-atake ni Satanas batok sa pamilya nagka-isug, ang mga ginikanan kinahanglan gayud nga mobuhat sa tanan nilang mahimo sa paglig-on ug pagpanalipod sa ilang mga pamilya. Apan ang ilang mga paningkamot mahimong dili igo. Ang atong labing importanteng institusyon sa pamilya nanginahanglan pag-ayo og tabang ug suporta gikan sa mga paryente ug sa mga institusyong publiko nga naglibut kanato” (“Ang Pinakamahinungdanon Mao ang Molungtad og Dugay,” Liahona ug Ensign, Nob. 2005, 42–43).

Si Elder Robert S. Wood sa Seventy: “Tungod sa daghan kaayo, ang responsibilidad ingon og modangat ngadto sa kabalaka ug kakulba. Apan ang istorya nga walay lihok gamay ra ang mahimo. Kita kinahanglang makusganong moatubang sa kalibutan. Kon ang atong mga eskwelahan kulang o makadaot og mga hiyas sa moralidad, kita kinahanglan gayud nga molihok uban sa mga miyembro sa komunidad sa pagdala og kausaban. Kon ang atong kasilinganan kuyaw o makadaot sa panglawas, kita kinahanglan gayud nga makig-uban sa may lungsuranong panghunahuna sa pagmugna og solusyon. Kon ang atong mga siyudad ug mga lungsod mahugawan, dili lamang sa makadaot nga mga gas apan sa makalaglag sa kalag nga mga adiksyon ug mga kalaw-ayan, kita kinahanglang motrabaho aron sa pagpangita og lehitimong mga pamaagi aron sa pagwagtang sa ingon nga kahugawan. … Kita adunay responsibilidad nga mahimong panalangin ngadto sa uban, ngadto sa atong nasud, ngadto sa kalibutan” (“On the Responsible Self,” Ensign, Mar. 2002, 30–31).

Paghulagway sa litrato PINAAGI NI Craig Dimond; sa luyo pinaagi ni Shannon Gygi Christensen