Pakighigala

Gidasig pinaagi sa Pag-ampo

Ang mga bata sa tibuok kalibutan nag-ampo ngadto sa Langitnong Amahan—sama kanimo! Karong buwana atong ila-ilahon si Jared Azzarini taga Porto Alegre, Brazil.

Si Jared Azzarini, nag-edad og 10, naguol pag-ayo samtang siya mitan-aw sa iyang coach ug mga kauban sa team nga misakay sa eroplano padulong sa Goiânia alang sa Brazilian National Gymnastics Championship nga wala siya. Siya nag-ampo pag-ayo kutob sa iyang mahimo nga ang mga kawani sa airport mopasulod kaniya sa eroplano aron siya makigkompetinsya uban sa iyang team. Apan sila miingon nga siya dili makabiyahe kon wala ang iyang orihinal nga birth certificate. Ang nadala lamang niya mao ang kopya. Ang orihinal atua sa balay.

Busa samtang ang iyang team nag-andam aron sa pagdepensa sa nasyonal nga titulo nga iyang gitabangan sa pagdaog diha sa iyang ka-edad nga grupo sa miaging tuig, siya mipauli sa ilang panimalay uban sa iyang inahan. Siya naghunahuna kabahin sa katapusang mga pulong nga gisulti sa iyang coach ngadto kaniya. “Kon ikaw dili makaadto sa kompetisyon, ang tibuok team mapilde. Kami nagkinahanglan kanimo.”

Ang sunod nga biyahe sa eroplano sa sunod buntag. Kini magdala kaniya ngadto sa kompetisyon, sa untop nga oras—walay higayon sa pagbansay o pag-anad-anad sa mga gamit.

“Ma,” siya miingon sa dihang sila miabut sa panimalay. “ikaw mitudlo kanako nga kon kita mag-ampo sa kinasingkasing, ang Ginoo motubag sa atong mga pag-ampo. Ako nag-ampo sa tibuok nakong kasingkasing, ug walay nahitabo. Kon ako mosakay sa eroplano ugma, wala akoy kahigayunan.”

Ang mama ni Jared misiguro niya pag-usab nga “sa Dios ang tanan mahimo” (Mateo 19:26). Siya mitawag sa airport. Sulod sa tunga sa oras, ang kawani sa eroplano mitawag ug nangutana kon si Jared makaadto ba diha-diha dayon sa airport. Usa ka lingkuranan ang bakante sa usa ka biyahe sa eroplano nga molarga diha-diha dayon.

“Ang Langitnong Amahan sa tinud-anay motubag sa atong mga pag-ampo!” Si Jared naghunahuna samtang siya nagdali-dali ngadto sa iyang lawak aron sa pagpasalamat sa Langitnong Amahan.

Si Jared, usa ka miyembro sa Intercap Ward, Porto Alegre Brazil Partenon Stake, nakaabut sa kompetisyon sa untop nga oras aron sa pagbaton sa ikatulong dapit sa indibidwal nga paghuman ug sa pagtabang sa iyang team nga makadaug sa samang edad nga dibisyon sa nasyonal nga kampyon pag-usab.

Si Jared ug ang Gymnastics

Sa dihang si Jared unom pa ang panuigon, ang iyang mama mipalista kaniya sa nag-inusarang klase alang sa iyang edad sa lokal nga unibersidad: gymnastics. Ang magtudtudlo natingala sa dihang iyang nahibaloan nga si Jared walay kasinatian. Ang coach sa unibersidad misulay ni Jared ug mitabang kaniya sa pagsulay uban sa iladong mga grupo sa gymnastics. Si Jared nakasulod sa team, ug upat ka buwan wala madugay siya nakadaog sa ikaunom nga dapit sa usa ka indibidwal nga kompetisyon sa estado.

Ang iyang tumong mao nga usa ka adlaw siya makigkompetensiya diha sa Olympics. Sa pagkab-ut niana nga tumong, siya nagbansay lima ka oras kada adlaw walay labut ang Dominggo.

Si Jared ug ang Pulong sa Kaalam

Si Jared naningkamot sa pagpadayon nga ang iyang hunahuna ug lawas putli ug dili moambit sa mga butang nga makadaot. Siya nasayud nga siya kinahanglan gayud nga mag-atiman sa iyang lawas kon siya buot nga mahimong maayo nga gymnast. Apan ang iyang tumong sa Olympic dili lamang ang usa ka butang nga miaghat kaniya sa pag-amping sa iyang kaugalingon. “Kon ako dili mosunod sa Pulong sa Kaalam, gawas sa pagdaot sa akong panglawas, ako dili makabalik sa pagpuyo uban sa Langitnong Amahan. Ang Pulong sa Kaalam usa ka kasugoan,” miingon si Jared.

Ang Ehemplo ni Jared

Walay usa sa mga kauban ni Jared sa team nga mga miyembro sa Simbahan, mao nga siya mainampingon sa paghimo ug usa ka maayong ehemplo ug makig-uban sa uban nga mabination. Si Jared midapit sa iyang mga higala sa paggahin sa katapusan sa semana uban kaniya kaniadto ug midala kanila sa simbahan. Siya mipahulam kanila ug puti nga mga polo ug mga kurbata. “Ako kanunay naningkamot nga andam sa pagtabang,” siya miingon. “Ako nag-ampo alang sa akong mga kauban sa team kinsa nakigkompetinsya ug gani nagtudlo kanila unsaon sa pag-ampo.”

Si Jared naggamit sa mga pangalan sa Langitnong Amahan ug ni Jesukristo sa balaan nga paagi. Siya dili mamalikas o mogamit og mga pulong mga makapasakit, ug naningkamot sa pagtabang sa uban nga maghimo sa ingon. Siya miingon, “Ang akong mga kauban sa team nagbinantayay sa usag usa nga sila dili mosulti og dili maayo nga mga butang, bisan sa akong atubangan.”

Ang Pamilya ni Jared

Si Jared nahigugma sa iyang pamilya. “Bisan unsay akong buhaton uban sa akong pamilya nindot kaayo,” siya miingon. Ang igsoong lalaki ni Jared, si Sam, maguwang lamang og usa ka tuig. Silang duha malingaw nga magdungan og buhat sa mga butang, ilabi na ang pagkanta. Sila gani mikanta diha sa usa ka espesyal nga miting diin sila si Bonnie D. Parkin, kanhiay presidente sa Relief Society, ug Cheryl C. Lant, kinatibuk-ang presidente sa Primary, namulong.

Ang mga Paborito ni Jared

Primary nga kanta: “A Child’s Prayer” (Children’s Songbook, 12–13)

Pagkaon: Kan-on, itom nga beans, ug minasa nga patatas. Si Jared miingon, “Ug, sa tinuod, isip usa ka maayong gaucho [usa ka tawo gikan sa estado sa Rio Grande do Sul], ako ganahan kaayo og lamian nga barbecue.”

Mga Sport: Gymnastics ug soccer

Kalingawan: Mga video game

Kasulatan: Santiago 1:5—Si Jared miingon, “Ako ganahan sa kasaysayan sa kinabuhi ni Joseph Smith.”

Mga klase sa eskwelahan: Science, history, ug physical education

Mga hayop: Duha ka iro ug duha ka iring.

Mga litrato sa maayong kabubut-on sa pamilyang Azzarini.

Brazil

Paraguay

Argentina

Porto Alegre

Uruguay