Pagpangita ug Pagluwas
Unsa ang kahulugan sa pagpangandam panahon sa emerhensiya alang kanimo? Sa Dominican Republic, kini nagpasabut nga ang mga batan-ong lalaki ug mga batan-ong babaye andam nga motabang.
Sila motabang sa mga tawo nga samdan sa mga aksidente sa sakyanan. Sila moluwas sa hapit malumos nga mga tiglangoy ug mangita sa mga tigbaktas o tigsuhid og mga langub nga nangawala o nadisgrasya. Sa mga adlaw nga walay trabaho sila nagdumala sa mga lawak daplin sa dalan aron sa pagtabang niadtong anaa sa peligro. Sila motabang sa mga programa sa pagbakuna sa komunidad. Ug sila kahibalo unsay buhaton panahon sa linog, kusog nga bagyo. o uban pang mga katalagman.
Sila nabansay sa importante ug labing bag-ong unang tabang [first aid], sa pagluwas diha sa tubig, sa pagluwas sa mga dapit nga pig-ot og mga agianan, sa pagtubag sa mga katalagman, ug sa mga kahanas sa pagpakabuhi. Sila nakahibalo sa ilang mga manwal sa pagbansay ug pagbalik-balik nga pagbansay diha sa lawak klasehanan, apan sila usab gibansay sa gawas, pagbaktas ngadto sa mga bukid ug mga langub diin sila maghimo og paaron ingnon nga tinuod nga mga kuyaw. Dayon sila moatubang og tinud-anay nga mga emerhensiya.
Sukad sila natukod niadtong 2003, sila nakatabang og labaw sa 300 ka mga tawo, kadaghanan adunay seryoso ug kritikal nga mga kadaot. Sila usab nakadani og daghang mga batan-on gikan sa gubot nga mga dapit ngadto sa ilang mga grupo ug nagtudlo kanila kabahin sa disiplina ug gugma.
Sinati sa Serbisyo
Sila mao ang Comité de Emergencias Santo de los Últimos Días, ang Santos sa Ulahing mga Adlaw nga Komite sa Emerhensiya, usa ka grupo sa mga boluntaryo nga abli ni bisan kinsa nga andam nga mosunod sa ilang mga lagda sa pagtahud ug serbisyo. Ug diha sa ilang kinauyokan mao ang mga miyembro nga batan-ong Santos sa Ulahing mga Adlaw, gipangulohan sa mga may pasalig nga mga hamtong. Labaw sa 200 ka mga batan-on ang miapil sa grupo sukad nga kini nagsugod.
“Ako nakahibalo kabahin niini nga komite sa dihang ako mitambong og bunyag usa ka Sabado,” miingon si Junior Rivera. “Sa laing lawak, akong nakit-an kining tanang mga bata sama kanako, nagsul-ob og itum, nga may logo sa ilang mga T-shirt ug mga kalo, magkat-on kabahin sa unang tabang [first aid]. Unsa gayud ang nakapa-interesado kanako mao nga sa dihang akong nahibaloan nga sila nangandam sa pagtabang sa ubang mga tawo. Ako kining nakita isip usa ka paagi sa pagbuhat og maayo, ug kana kabahin sa mga pagtulun-an sa Simbahan, sa pagpangita ug pagtabang niadtong nag-libut kanato.”
Si Onel Rodriguez nagpasabut nga ang grupo nagkat-on og mga pamaagi susama ngadto sa mga baruganan sa ebanghelyo. “Pananglitan,” siya miingon, “panahon sa emerhensiya kami nakakat-on sa pag-atiman sa among kaugalingong pamilya og una. Dayon kon kami masayud nga ang tanan maayo ra, kami makahimo sa pagtabang sa uban. Mao kana ang gitudlo sa Simbahan kabahin sa welfare. Atimana ang inyong kaugalingong pamilya, dayon tabangi ang uban.”
Si Franklin de los Santos miingon nga ang pagtrabaho sa pagpangandam sa katalagman nakatabang kaniya nga makaamgo nga usahay ang panginahanglan alang sa espirituhanong pagpangita ug pagluwas ingon usab ka importante sa pag-atiman sa pisikal. “Ang pipila ka mga tawo nagkinahanglan og kamot nga motabang o usa ka mabinationg pulong o usa ka gipakigbahin nga pagpamatuod aron sa pagtabang kanila nga malig-on,” siya miingon. “Kon kita magpuyo sa ebanghelyo, kita kinahanglan nga moatiman ug molig-on sa ubang mga tawo sa espirituhanong paagi usab.”
Sinati sa Paggamit
Si Omar Rodriguez nagtudlo nga daghang mga kalihokan sa komite ang gigamit aron sa pagtuman sa mga kinahanglanon sa Katungdanan ngadto sa Dios ug giplano nga ipaangay sa mga kalihokan sa Aaronic Priesthood ug Mutual.
Si José Núñez, ikaduhang magtatambag sa bishopric sa La Caleta Ward, miingon nga samtang ang mga batan-on nagkat-on sa ebanghelyo sa ilang mga klase ug mga korum, ang komite nagtabang kanila sa paggamit unsa ang ilang nakat-unan ngadto sa matag adlaw nga kinabuhi. “Kon sila anaa sa mga dalan ug adunay direktang kontak sa mga tawo nga kabus, niana sila gayud makakat-on unsa ang gipasabut sa paghigugma sa usag usa,” siya miingon. “Sila makapalambo og paghigugma niadtong mga tawo nga naglibut kanila. Ug sila usab makapalambo og paghigugma alang sa ilang kaugalingon tungod kay sila nakakat-on kabahin sa pagdisiplina sa kaugalingon, ug kana naghatag kanila og pagsalig sa paglihok sa angay nga mga paagi dili magsapayan kon hain sila.”
Si Brother Núñez usab nagsulti nga ang komite wala mopuli sa nabatasan nga mga kalihokan sa Simbahan. “Naghingpit kini niini,” siya miingon. “Sa mga klase sa korum sa priesthood ug sa Batan-on nga mga Babaye, pananglit, sila gitudloan sa mga baruganan sa ebanghelyo. Apan sa kalihokan nga nagsentro sa ebanghelyo sama sa komite ug uban pang mga proyekto sa serbisyo, sila adunay kahigayunan sa pagbansay unsa ang ilang nakat-unan.” Kana mao ang usa sa mga paagi, siya nag-ingon, nga sila mahimong “mituman sa pulong, ug dili kay magpaminaw ra niini” (Santiago 1:22).
Sinati sa Komunidad
Si Omar nag-ingon nga ang komite sa kanunay gihangyo sa pagtabang sa mga programa sa komunidad sama sa pagbakuna og tigdas. “Kami buot nga maanaa bisan asa ang tabang gikinahanglan,” siya nag-ingon, “ug ang komunidad nasayud niana. Sila nisalig kanamo tungod kay kami nangandam pag-ayo.” Sa pagkatinuod, ang komité, nga gipasiugdahan sa mga miyembro sa Simbahan nga si Basilio Cabrera ug Domingo Peralta, naggamit sa samang mga pamaagi sa Red Cross ug mga yunit sa pagpanalipod sa sibilyan. Ang departamento sa publikong panglawas naghatag og espesyal nga pag-ila sa grupo nga gipasiugdahan sa LDS, ug ang mga gobyerno sa siyudad ug probinsiya naghatag usab og mga ganti sa grupo.
Si Brother Núñez nagpasabut nga ang komite nagmugna og mga plano sa pagtubag sa emerhensiya sumala sa usa ka pagtuon sa delikado nga mga dapit sa Santo Domingo ug sa duol nga mga komunidad. “Sa panahon sa emerhensiya kami moadto niadto nga mga dapit ug motino kon aduna bay mga miyembro sa Simbahan nga nagkinahanglan og tabang,” siya miingon. “Sa samang panahon, among timbang-timbangon ang mga panginahanglan sa tanang mga tawo niadtong lugara ug itaho ngadto sa mga awtoridad. Among natino hain nga mga lugar ang labing kuyaw sa panahon nga may kusog nga bagyo, linog, baha, o bisan unsang susama nga butang. Kami nasayud hain ang mga lugar nga nagkinahanglan og diha-diha dayon nga pagpamakwit. Kami gani nasayud hain nga mga sanga sa kahoy ang mahimong putlan aron sa paglikay og kadaot kon moabut ang kusog nga mga hangin. Kini bahin sa unsay gisangon sa kabatan-onan nga buhaton.”
Ang mga miyembro sa komite usab mopalabay sa ilang kaugalingong panahon sa pagsaulog sa Pasko ug Pagkabanhaw aron, ubos sa pagbantay sa mga hamtong, sila makaapil sa usa ka 24-oras nga pagbantay. “Amo kining gibuhat tungod kay mao kini ang mga adlaw nga daghan kaayong mga tawo ang maaksidente o magkagubot tungod sila mag-inom,” miingon si Brother Núñez. Kana nga kamatuoran nagtudlo sa mga miyembro sa komite, sa usa ka praktikal kaayo nga paagi, ang bili sa pagpuyo sa Pulong sa Kaalam (tan-awa sa D&P 89).
Andam, Dili Mobalibad, Madasigon
Busa ngano nga ang mga miyembro sa komite naghatag sa ilang panahon aron sa pag-alagad? Nganong moantus nianang tanan nga pagbansay?
Si Omar nag-ingon nga bisan tuod ang pag-apil nagkinahanglan og panahon ug paningkamot, kini takus niini. Siya piho nga mibati og kamaayo nga siya makatabang sa ubang mga tawo, usa ka butang nga iyang nakat-unan pag-ayo pagkahuman sa kusog nga bagyong Noel. “Ang among katungdanan mao ang pagtabang niadtong nanginahanglan aron makasinina ug makakaon,” siya nag-ingon. “Ako nakakita sa mga tawo kinsa naglisud, ug ang makahatag kanila og usa ka butang nga ikasul-ob ug usa ka butang nga makaon, ug dayon makita ang ilang pagkatagbaw, kana makahimo kanako og pagbati nga maayo.”
Si Osiris Rodriguez nag-ingon nga siya nagdayeg sa panaghiusa nga iyang nabati diha sa komite. Iya kining nakita isip sumpay sa panaghiusa nga iyang nabati sa iyang korum ug taliwala sa mga kabatan-onan sa Simbahan sa kinatibuk-an.
Si Junior Batista, kinsa nagpasakop sa Simbahan pipila na ka mga buwan ang milabay, miingon nga sa dihang iyang nahibaloan ang kabahin sa komite sa emerhensya, siya naghinam-hinam nga moapil. Ug siya wala mahigawad. “Kami mibati og maayo tungod kay kami nagtuman sa kasugoan nga nag-ingon nga kita kinahanglan maghinigugmaay sa usag usa. Kita manag-uban isip mga brother ug mga sister, mga anak nga lalaki ug mga anak nga babaye sa Dios.
Kon kana ang imong bation kabahin sa serbisyo, ikaw magpadayon sa pagserbisyo.
Mga litrato pinaagi ni Richard M. Romney
Osiris Rodriguez
Junior Rivera
Junior Batista
José Núñez