Dali Paminaw sa Tingog sa usa ka Propeta
Ang Tinuod nga Simbahan
Gikuha gikan sa Abril 2008 nga pamulong sa kinatibuk-ang komperensya.
Si Presidente Eyring nagsulti giunsa niya pagbaton sa iyang pagpamatuod nga ang Simbahan tinuod.
Ang akong pagpamatuod nga kini mao ang tinuod nga Simbahan nagsugod sa akong pagkabata. Usa sa akong unang mga handumanan mao ang miting sa komperensya. Usa ka tawo ang namulong kinsa wala nako mailhi. Nasayud lamang ako nga siya gipadala sa among gamay nga district sa natad sa misyon sa usa ka tawo nga naghupot sa priesthood. Wala ako makahibalo unsay iyang gisulti. Apan ako nakadawat og gamhanan, piho nga saksi sa wala pa ako moabut og otso, bisan sa wala pa ako mabunyagi, nga ako nagpaminaw og usa ka sulugoon sa Dios diha sa tinuod nga Simbahan ni Jesukristo.
Sa akong pagkatin-edyer, akong gibati ang gahum sa mga korum sa priesthood ug sa usa ka mahigugmaong bishop. Nakahinumdom gihapon ako ug mibati sa kasiguroan nga miabut sa dihang naglingkod ako sa korum sa mga priest sunod sa usa ka bishop ug nasayud nga siya adunay mga yawe sa usa ka tinuod nga maghuhukom sa Israel.
Kanang sama nga pagsaksi miabut sayo sa akong kinabuhi sa duha ka Dominggo. Sa matag sitwasyon anaa ako didto sa adlaw nga ang usa ka stake gitukod. Ingon og ordinaryong mga tawo nga akong kaila kaayo ang gitawag isip mga stake president. Akong gipataas ang akong mga kamot niadtong mga adlawa ug dihay usa ka saksi nga miabut kanako nga ang Dios mitawag sa Iyang mga sulugoon ug nga ako mapanalanginan sa ilang pagserbisyo ug sa pagpaluyo kanila. Akong nabati kanang sama nga milagro sa dili na maihap nga mga higayon sa tibuok Simbahan.
Akong nakita nga kadtong mga stake president gitabangan sa ilang mga calling. Akong nakita ang sama nga milagro diha sa serbisyo ni Presidente Monson sa iyang pagdawat sa tawag sa pagpangulo isip Propeta ug Presidente sa Simbahan ug sa paggamit sa tanang mga yawe sa priesthood dinhi sa yuta. Ang pagpadayag ug inspirasyon miabut kaniya diha sa akong atubangan, nga nagmatuod ngari kanako nga ang Dios nagpasidungog niadto nga mga yawe. Ako usa ka saksi.
Akong ihatag kaninyo ang akong ligdong nga pagpamatuod nga kini mao ang tinuod ug buhi nga Simbahan ni Jesukristo. Ang Langitnong Amahan motubag sa inyong kinasingkasing nga mga pag-ampo aron makahibalo niana alang sa inyong mga kaugalingon.
Paghulagway ni Kristen Yee