Ang Akong Pag-ampo sulod sa Koral
Tungod sa huwaw, ang akong bana, si John, ug ako kinahanglan nga mobaligya sa among baka nga alkansi o ibalhin kini ngadto sa Melba Valley, sa habagatang kasadpan sa Idaho, USA. Swerte kaayo, si John nakakita og lugar diin makakaon ang baka sa panahon sa ting-init didto sa umahan sa pamilya sa iyang ig-agaw, nga nahimutang sa lugar sa Preston, mga 300 ka milya (480 km) ang gilay-on.
Kami nakigsabut og tag-iya sa sakyanan aron sa pagdala sa tanang 40 ka baka sa usa ka pagkarga, apan siya wala makaayon sa hitsura sa lubak-lubak nga dalan sa ransohan padulong ngadto sa kan-anan sa mga baka, mga 20 ka milya (32 km) pa kalayo. Sa among kasagmuyo, siya mipakanaog niini sa duol nga koral sa mga baka. Didto kami, hapon na uban sa 40 ka baka aron mabalhin ug wala gayuy paagi sa pagbuhat niini.
Si John mipahunong og usa ka lokal nga mag-uuma, mipasabut sa among kahimtang, ug nangayo og tabang. Pipila ka minuto ang milabay si Bishop Steve Meeks ug ang iyang batan-ong anak nga lalaki misunod kanamo ngadto sa koral sa mga baka aron makita unsa ang mahimong buhaton.
Ang mga baka nagkaguliyang. Nakakita og naguba nga bahin sa koral, ang mga baka midagan padulong niini, naningkamot nga makagawas. Ang tanang mga baka milayat sa koral ngadto sa laing koral—gawas lamang sa usa ka baka. Kini gusto nga mogawas nga mas dali kay sa uban, apan usa niini ka tiil napiit sa duha ka mga ali sa koral. Delikadong nagbitay kini diha sa koral, usa ka tiil hapit wala magtugkad sa yuta. Gipatid niini ang iyang pangunahang tiil sa kasuko sa pagpaningkamot nga makagawas ang iyang kaugalingon
Ang pagpagawas sa baka nagkinahanglan og gamit nga pang-alsa. Kon mapiang ang usa ka tiil niini, kinahanglan nga amo na kining patyon. Ang pagkawala sa usa ka baka nagbutang og dakong problema sa pinansyal diha kanamo.
Ang baka nagtimbang og labaw pa sa 1,000 ka libra (455 kg), ug dili kami makaduol niini, ni motabang niini kon makahimo kami. Ang dakong kadaot sa koral nakahimo sa uban pang mga baka nga wala mahimutang.
Ako wala maghunahuna nga aduna pay bisan unsa nga among mabuhat, apan nianang higayona ako nakahinumdom sa tambag ni Amulek diha sa Basahon ni Mormon. “Pangamuyo ngadto kaniya samtang kamo anaa sa inyong mga umahan, oo, sa tanan ninyo nga mga panon” (Alma 34:20). Ako mipalayo sa akong kaugalingon sa uban, miluhod, ug miampo uban sa akong tibuok kasingkasing. Gitapos ang akong pangamuyo, ako mihangyo, “Langitnong Amahan, palihug tabangi ang mga baka.”
Ako mibalik sa koral, ang pag-ampo nagpabilin gihapon sa akong mga ngabil. Sa pagka-karon ang mga baka mora og nahilum, apil niadtong naa sa koral.
Sa kalit , ang labing dako nga baka mibiya sa panon. Misuki sa among mga kusog sa pagpabalik niini, kini mipadulong sa nagbitay nga baka. Miduko sa iyang ulo, miluhod, mipugos sa pag-agi ilawom sa nasangit nga baka ug hinay-hinay nga mibarug. Naalsa niini ang nagapos nga baka ug dayon gipaubos kini. Ang baka nakagawas! Ang gamit nga pang-alsa dili makabuhat sama ingon kamaayo.
Samtang ang duha ka baka midagan padulong ngadto sa panon, si Bishop Meeks mitan-aw nga dili makatuo sa bag-ohay lamang niyang nasaksihan. Ang akong luha mitulo samtang ako mihonghong, “Salamat, Langitnong Amahan.”
Bisan kinsa nga nakahibalo og mga baka mosulti kaninyo nga ang mga baka dili mangatarungan diha sa ilang hunahuna. Apan adunay pagpasabut alang niini nga panghitabo. Ang Langitnong Amahan mamati ug motubag sa mga pag-ampo. Siya mitubag sa ako—didto sa usa ka koral sa Preston, Idaho.
Ako wala maghunahuna nga aduna pay bisan unsa nga among mabuhat aron mapagawas ang baka, apan nianang higayona ako nakahinumdom sa tambag ni Amulek diha sa Basahon ni Mormon.