Walay Pagpamalikas ang Tugutan
Niadtong 1962, 11 sa akong mga kauban sa high school nga gikan sa Preston, Idaho, ug ako miapil sa National Guard. Ang basic training sama sa usa ka bakasyon hangtud nga kami miabut ngadto sa Fort Ord, sa California.
Nagkinahanglan kami sa usag usa aron makalahutay sa among bag-ong palibut sa militar ug sa pagdagsang sa ubang mga rekrut, daghan kanila naggamit og dili madawat nga pinulongan ug ingon og walay mga moral. Nangita ko sa tanang kahigayunan nga makauban ang akong mga barkada nga mga Santos sa Ulahing mga Adlaw para sa suporta gikan sa pagpanghasi sa among isig ka mga rekrut.
Human sa basic training, duha sa akong mga kauban ug ako nagpabilin sa Fort, Ord aron mopadayon sa pagbansay sa field communications. Sa wala madugay, duha sa dagko nga mga rekrut sa among klase sa pagbansay nagsugod sa pakigsangka kinsa ang makasulti sa labing ngil-ad ug bastos nga mga butang. Kada buntag inig bangon nila, mosinggit sila og bastos nga mga butang aron ang tanan nga anaa sa mga baraks makadungog sa ilang mahugaw nga pinulongan.
Usa ka buntag niana diha ako sa ilang atubangan ug, naningkamot nga makalikay, misulti kanila nga mohunong. Naulaw, ilang gibalhin ang ilang kangil-ad ngari kanako, gibalikas ako og kadaghan. Dayon mihulga sila nako sa pagbantay nga dili lang gyud ko magpakita nila nga mag-inusara.
Dayon nianang buntaga, samtang namunit ako og basura, nag-inusara lang ako sa tunga-tunga sa mga baraks. Sa kalit nakakita ako nga adunay nagpadulong kanako. Ang usa sa mga rekrut nga mihulga kanako.
Nangandam ako sa dautang mahitabo samtang nagpadulong siya. Apan misulti siya unsa ka dako ang iyang pagrespetar kanako ug nanghinaut nga siya adunay kaisug sa paghimo sama sa akong gihimo. Miangkon siya nga ang iyang mga ginikanan maguol kon masayud sila unsay iyang gibuhat. Miingon siya nga dili na gayud siya mogamit pa og bastos nga pinulongan sa akong atubangan. Dayon mitalikod siya ug mibiya.
Sa akong pag-agi sa sunod nga mga baraks, akong nakita ang ikaduhang tawo nga nagpadulong nako. Miduol siya og nangayo og pasaylo sa iyang gibuhat. Misulti usab siya nako kon unsa ka dako ang iyang pagrespetar kanako, nag-ingon nga siya nanghinaut nga sa umaabut magpakabuhi siya sumala sa unsay gitudlo kaniya.
Sa katapusan sa usa ka semana sa dihang ang akong mga kauban nga mga Santos sa Ulahing mga Adlaw nag-leave, kining duha ka batan-ong mga lalaki miimbitar nako nga manan-aw og sine uban kanila ug sa ilang grupo. Samtang kami nanglakaw, adunay namalikas. Ang duha ka dagko nga mga rekrut misulti sa grupo nga walay mamalikas kon ako ang ilang kauban.
Human sa sine, sa dihang ang grupo nakahukom nga moadto sa usa ka club aron mag-inom, ang akong mga higala mibalibad, mipasabut nga mokuyog sila nako nianang gabhiona. Sa dihang kami na lang, nangutana sila kanako mahitungod sa akong pamilya ug sa matang sa simbahan nga akong gisakupan nga nakatabang sa batan-ong mga lalaki nga makapalambo og mga sumbanan nga gisunod sa among grupo nga mga Santos sa Ulahing mga Adlaw. Gitubag nako ang ilang mga pangutana ug misulti kanila mahitungod sa Simbahan.
Akong nakat-unan nga ang kalangitan motabang sa kaisug ug mopanalangin niadtong kinsa mobarug unsa ang matarung.
Sa kalit nakakita ako nga adunay nagpadulong kanako. Ang usa sa mga rekrut nga mihulga kanako.