Tānaki Ho Ngaahi Tāpuakí
Mei ha lea ʻi he konifelenisi lahi ʻo ʻOkatopa 2007
Talu pē mei he kamataʻanga ʻo e māmaní mo e hoko hono fakangaloʻi ʻo e ʻOtuá ko ha palopalema ki Heʻene fānaú. Fakakaukau ki he kuonga ʻo Mōsesé, hono ʻohifo ʻe he ʻOtuá e maná pea tataki mo maluʻi ʻEne fānaú ʻi he ngaahi founga ʻo e mana ʻo nau mamata pē ki ai. Ka naʻe kei fakatokanga pē ʻa e palōfitá ki he kakaí: “Vakai … telia naʻa ngalo ʻiate koe ʻa e ngaahi meʻa kuo mamata ki ai ho matá” (Teutalōnome 4:9).
Fekumi ki ha ngaahi founga ʻe ʻiloʻi mo manatuʻi ai e angalelei ʻa e ʻOtuá. Te ne langa hake ʻetau ngaahi fakamoʻoní. Manatuʻi e foʻi hiva ko ia ʻoku tau faʻa hiva ʻakí: [“Tānaki hoʻo ngaahi tāpuakí; tānaki ʻo lau taki taha, pea te ke ofo ʻi he meʻa kuo fai ʻe he ʻEikí”] (“Tānaki Ho Ngaahi Tāpuakí,” Ngaahi Himi, fika 148).
ʻI he kei iiki ʻema fānaú, ne u kamata hiki ha fanga kiʻi meʻa naʻe hoko ʻi he ʻaho kotoa pē. Neongo ʻeku helaʻiá pe ʻā hengihengia he kamataʻanga ʻo e ʻaho hokó, ka naʻe ʻikai ha ʻaho te u taʻehiki ai ha meʻa. Ka ne u fakalaulauloto ki he fehuʻi ko ʻení peá u toki tohi: “Kuó u mamata nai ki he mafao hifo e toʻukupu ʻo e ʻOtuá ke tokoniʻi kimaua pe ko ʻema fānaú pe ko homau fāmilí he ʻahó ni? ʻI he ʻalu ʻeku fakakaukaú ki he ngaahi meʻa ne hoko he ʻaho ko iá, ne u sio ki he fakamoʻoni ʻo e meʻa kuo fai ʻe he ʻOtuá maʻatautolu ʻa ia ne ʻikai ke u fakatokangaʻi ʻi he ngaahi momeniti femoʻuekina ʻo e ʻahó. Ne u ʻiloʻi kuo hanga ʻe heʻeku feinga ko ia ke manatuʻí ʻo tuku ke fakahā ʻe he ʻOtuá kiate au ʻa e meʻa kuó Ne fakahokó.
ʻOku tokoni ʻa e Laumālie Māʻoniʻoní ke tau sio ki he meʻa kuo fai ʻe he ʻOtuá maʻatautolú. ʻOku ou fakamoʻoni ʻoku ʻofa e ʻOtuá ʻiate kitautolu pea lahi ange mo ʻene tāpuakiʻi kitautolú ʻi he meʻa kuo fakatokangaʻi ʻe hatau tokolahi. ʻOku ou ʻilo ʻoku moʻoni ia, pea ʻokú ou fiefia ʻi heʻeku manatuʻi Iá.
Tā fakatātaaʻi ʻo e ʻatá ʻe Weston Colton; ngaahi tā fakatātā ʻa Keith Christensen