Te u ʻAlu pe Nofo?
Naʻe fakatokoto ʻeku ongomātuʻá ʻi falemahaki ʻi ha ngaahi ʻaho kimuʻa peá u ʻalu ʻo ngāue fakafaifekaú. Naʻe ʻikai ke u ʻilo pe ʻe lava ke u ʻalu kae tuku kinaua.
Ne u monūʻia ʻi hono fakafeʻiloaki au ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻe haku kaungāmeʻa. Naʻe akoʻi au ʻe ha kau faifekau naʻe uiuiʻi ʻe he ʻOtuá ke ʻoatu ʻa e maama ʻo e ongoongoleleí ki māmani. Hili ha taʻu ʻe ua mei hono papitaiso aú, naʻe uiuiʻi au ke u ngāue ʻi he Misiona ʻĪtali Mīlaní. Ne u aʻusia ha meʻa fakalaumālie lahi kimuʻa peá u toki ʻalú.
Naʻe ʻikai ke kau ʻeku ongomātuʻá ki he Siasí pea naʻe ʻikai ke na fiefia tatau mo au ʻi he faingamālie ko ʻeni ke u ʻalu ʻo ngāue fakafaifekaú. Naʻa mau fakakikihi pea naʻe fakatupu loto-mamahi lahi ʻeni kiate au.
ʻI ha ʻaho ʻe ua peá u ʻalu ʻo ngāue fakafaifekaú, naʻe puke lahi fakafokifā ʻeku ongomātuʻá. Naʻe ʻi ai e palopalema faka-moʻui lelei ʻeku faʻeé pea fakatokoto ai ʻi falemahaki. Hangē naʻe ʻikai ʻaonga ha meʻa ia naʻe feinga e kau toketaá ke fai. Naʻe mahakiʻia e ʻate ʻo ʻeku tamaí, pea pehē ʻe he kau toketaá ʻe faingataʻa ke toe sai.
Naʻá ku tūʻulutui he efiafi ko iá ʻo kole ki heʻeku Tamai Hēvaní ʻo pehē, “ ʻE Tamai, tokoni mai kiate au. ʻOku puke hoku fāmilí pea he ʻikai ke u lava ʻo ʻalu kae tuku kinaua ʻi he ngaahi tūkunga ko iá. Tamai, ʻoku ou lotu ke ke tokoni mai, ke u ʻilo pe ʻoku totonu ke u ʻalu pe nofo.”
Naʻá ku fakakaukau ʻi ha ngaahi miniti siʻi ki he tuʻunga ne u ʻi aí. Naʻá ku ongoʻi leva ha leʻo vaivai kae matuitui naʻe pehē mai, “Tui, pea ʻe lelei e meʻa hono kotoa.”
Naʻe ʻikai ke u matuʻuaki ʻeku ongoʻi loto-mamahi ʻi heʻeku sio ki he mahamahaki hoku fāmilí, ka ne u fili ke u heka he vakapuna te ne ʻave au ki Loma pea hoko atu ki he ʻIunaiteti Siteití ʻa ia te u hū ai ki he senitā akoʻanga fakafaifekaú. Naʻe ʻikai ke u fiefia he ngaahi pō ne u ʻi he MTC aí. Naʻá ku toutou fakakaukau pē ki heʻeku ongomātuʻá. Naʻe faifai pea fakangofua ʻe he palesiteni ʻo e MTC ke u telefoni ʻo vakai pe naʻá na fēfē.
Ne talamai fiefia ʻe heʻeku faʻeé he telefoní ʻa e mana mei he ʻEikí ne hoko kiate kinaua—ko ha ngaahi lea naʻe ʻikai ke u ʻamanaki ke fanongo ai mei ha fefine naʻe ʻikai ke lahi ʻene tuí. Naʻá ne talamai ʻi he hili pē ʻeku mavahé ne fakalakalaka ʻena moʻuí, pea naʻe ʻikai lava ʻe he kau toketaá ke fakamatalaʻi ʻeni. Naʻe moʻui lelei mo fiefia ʻeku ongomātuʻá. Naʻe kakato ʻeku fiefiá.
Naʻe tupulaki ʻeku fakamoʻoni ki he mālohi ʻo e tuí, lotú, mo e talangofuá ʻi he meʻa ko ʻeni naʻe hokó. ʻOku ou fakamālō hono tokangaʻi ʻe he ʻEikí hoku fāmilí lolotonga ʻeku ngāue fakafaifekaú.
Tā fakatātaaʻi ʻe Dan Burr