Kae ʻOua Ke Tau Toe Feʻiloaki
Malu ʻi Hoku Fāmili Fakauōtí
ʻI he kamata ke u maʻu lotu toko taha pē ʻi hoku taʻu 12, ne u ʻiloʻi kuo tāpuakiʻi au ʻe he Tamai Hēvaní ʻaki ha kupenga kuo ʻosi ngaohi ke maluʻi au.
Ko e taha ʻo e ngaahi meʻa ʻoku ou manatu fiefia taha ki ai heʻeku kei siʻí ko e patopatō e sū ʻete ʻo ʻeku faʻeé he faliki papa ʻo homau peitó ʻi heʻene teuteuʻi homau fāmilí ki he lotú. Naʻe lahi e ngaahi meʻa homau uōtí naʻe kau aí pea naʻe taʻu lahi mo ʻene hoko ko ha palesiteni Fineʻofa. Naʻe ʻikai ke u misi ʻe toe liliu ha meʻa.
ʻI he ofi hoku taʻu 12 peá ma nofo tokoua peé, naʻá ne mavahe mei he Siasí pea naʻe ʻikai mahino kiate au hono ʻuhingá. Neongo ne fili ʻeku faʻeé—ʻa ia ko hoku faʻifaʻitakiʻangá—ke fou ʻi ha hala kehe, ka ne u ʻilo naʻe moʻoni e ongoongoleleí, pea kei hokohoko atu pē ʻeku maʻu lotú. Neongo naʻe ʻikai te ne saiʻia he fili naʻá ku faí, ka naʻá ne ʻave mo fakafoki mai au mei he lotú he uike kotoa pē.
Ne u ongoʻi faingataʻaʻia he ʻalu ki he lotú, tautautefito ki heʻeku tangutu toko taha ʻi mui he houalotu sākalamēnití ʻo sio lelei atu ki he tangutu fakataha ʻa e ngaahi faʻeé, tamaí mo e fānaú. Ne u tangutu he taimi ʻe niʻihi mo e fāmili ʻo hoku kaungāmeʻá. Te u fakamālō maʻu pē ki hoku “fāmili Māmongá” mo e niʻihi ʻi hoku uōtí naʻa nau tokanga lahi ke fakakau atu au mo kinautolu lolotonga e taimi faingataʻa ko ʻení.
Hangē ko ʻení, naʻe faivelenga ʻeku ongo faiako fakaʻapí neongo ko au toko taha pē naʻá na ō mai ke akoʻí pea naʻe mamaʻo atu ʻeku nofó ʻi he kāingalotu tokolahi. Ne u nofo ʻo hanganaki atu ki he faingamālie ke mau talanoa ai ki he ongoongoleleí mo ongoʻi e mālohi ʻo e lakanga fakataulaʻeikí mo e Laumālié ʻi hoku ʻapí.
Ko e tokolahi ʻo e kāingalotu ʻo e uōtí ko ha kakai naʻá ku ʻiloʻi talu ʻeku tupu haké. Ne ʻai ʻe honau ngaahi fofonga kuó u maheni mo iá, ʻe heʻenau ngaahi malimali ʻo talitali lelei aú, mo ʻenau talanoa anga fakakaumeʻá ke nau hoko ko ʻeku ngaahi faʻē, tamai, tuongaʻane, mo e ngaahi tokoua ʻi he uōtí. Naʻe hanga ʻe heʻeku ongoʻi ʻoku ou kau mo kinautolú ʻo fakasiʻisiʻi ʻa e loto-mamahi ʻo e maʻu lotu taʻekau ai hoku fāmilí.
ʻOku ou ʻiloʻi ʻoku ʻikai ko au pē ʻoku ou aʻusia e tūkunga ko ʻení. ʻOku tokolahi e toʻu tupu ʻoku nau maʻu lotu taʻekau ai e toko taha pe fakatouʻosi e mātuʻá. Ka ʻi he faʻifaʻitakiʻangá, anga fakakaungāmeʻá, mo e ngaahi fatongiá, ʻe lava ke tau ala atu ai kotoa ʻo tokoniʻi e ngaahi foha mo e ngaahi ʻofefine ʻo e Tamai Hēvaní ke nau ongoʻi ʻoku talitali lelei kinautolu, akoʻi kiate kinautolu e ngaahi tefitoʻi moʻoni ʻo e ongoongoleleí, pea poupouʻi kinautolu ke nau kau mai ki he ngaahi fakatahaʻangá mo e ngaahi ʻekitivitií.
Naʻe pehē ʻe Veisinia H. Pasi ʻa ia ne hoko kimuʻa ko e tokoni ʻi he kau palesitenisī lahi ʻo e Kau Finemuí, “Naʻe palani ʻe he Tamai Hēvaní ke fāʻeleʻi mai kitautolu ki ha fāmili—ʻa e tefitoʻi kulupu, ʻa e kulupu tāpuhā taha, mo e kulupu mālohi taha ʻi he māmaní. Pea ʻoku fakahoko ʻi he lotoʻi fāmilí ʻa e niʻihi ʻo e ngaahi ako mahuʻinga taha ʻoku tau faí. ʻIkai ngata pē ʻi he kulupu fakafāmili ko iá, ka kuo ʻomi foki ʻe he ʻEikí ʻa e fāmili ko e uōtí pe koló. … ʻOku ʻikai fakataumuʻa e ngaahi uōtí ia ke nau fetongi e ʻiuniti fakafāmilí, ka ke poupouʻi ʻa e fāmilí mo ʻene ngaahi akonaki māʻoniʻoní. Ko e uōtí ʻa e feituʻu ʻe taha ʻoku feʻunga ʻa e ngaahi tukupā mo e ivi aí ke faʻufaʻu ha fāmili ‘maluʻi’ maʻatautolu takitaha ʻi he taimi ʻoku ʻikai lava pe ʻikai ʻomi ai ʻe hotau ngaahi fāmilí ʻa e ngaahi akonaki mo e ngaahi taukei ke tau fakalakalaka ai ʻo foki ki he Tamai Hēvaní. ʻOku fie maʻu ke lahi ange ʻetau fakahoungaʻi e mālohi ʻo e fāmili fakauōtí mo fakafoʻou ʻetau tukupā ke kau ki he tukuikolo ko ia ʻo e Kāinga Maʻoniʻoní.”1
ʻOku ou fakamālō kiate kinautolu ne hoko ko hoku maluʻí, ʻo nau fakatō ki hoku lotó ʻa e holi ke fai e meʻa tatau maʻá ha niʻihi kehe.
Tā fakatātaaʻi ʻo e ʻatá ʻe Robert Casey