Ko e Taʻahine Malimali Fakaʻofoʻofá
Ne u ilifia, ka naʻá ku maʻu ha meʻatau fakapulipuli ke ikunaʻi ʻaki ʻeku manavaheé.
Ne lau māhina ʻeku teuteu mo ʻeku faiako tā-pianó ki he ʻaho ko ʻení. Naʻá ku kau ki he Lavameʻa ʻi he Mūsiká, ko ha feʻauhi fakataʻu ʻoku siviʻi ai e fānau ako mūsiká ʻi he ngaahi meʻa kehekehe—mei hono ʻiloʻi hono lau fakafuofuaʻi e mūsiká ki he ngaue holo ʻa e notá ʻi ha foʻi fasi kuo ʻosi ako maʻuloto hono taá. Naʻe faifai pea aʻu ki he ʻaho ko iá, mo ʻeku kei manavasiʻi ai pē.
Ko e konga fakailifia taha ʻo e feʻauhí ko hono tā ʻo e ngaahi foʻi fasi ke fanongo ki ai e kau fakamāú. Ne u ʻosi ʻiloʻi ʻeku ngaahi fasí, ka naʻe tete hoku ongo nimá he taimi ne u tā aí.
Naʻe lava e tā piano ne u fakatuʻotuʻa ki aí. Naʻe lava ke u maʻu ha nonga he ko e toe pē ke fai ʻeku lipooti ki ha tokotaha naʻá ne faʻu ha fasi. Ne u maʻu e feituʻu naʻe totonu ke u ʻi aí ʻo talitali fakaʻotu ʻi he vahaʻa ʻo ha ongo matapā. Ne u fie ʻilo ʻo u fakasio ki loto he matapā he toʻohemá. Naʻe fakalotolahiʻi ai ʻe ha faiako anga fakakaumeʻa e kau akó ʻi heʻenau hū atú pea nau maheni. Naʻe mahino ʻene fie maʻu ke nau ongoʻi fiemālié.
Hili iá naʻá ku fakasio ki he loki he toʻomataʻú. Naʻe ʻi ai mo ha faiako tā piano ʻe taha naʻe matuʻotuʻa ange, pea ko ʻeku sio pē ʻaʻaku ia ki hono matá kuó u ʻosi ilifia au. Ko e lahi ange ʻeku sio ki heʻene fetalanoaʻaki mo e kau akó, ko e lahi ange ai pē ia ʻeku ilifiá. Ko e meʻa pē ʻeni naʻe ʻi heʻeku fakakaukaú, “ ʻOfa pē ke u ʻalu ki he fakamaau ʻuluakí.”
Ne u toutou lau ʻeku lipōtí. ʻI heʻeku aʻu ki muʻa he lainé, naʻá ku fakaʻamu pē ke ʻuluaki ʻosi e tokotaha he toʻohemá. Kae pangó ne kamata lue atu e tokotaha he toʻomataʻú ki he matapaá. He ʻikai pē ke u lava ʻo hū ki ai. Ne ʻalu hake leva e fakakaukau ko ʻení, “ ʻAi pē hoʻo foʻi malimali lahi tahá.”
Ne u hū atu mo e foʻi malimali lahi taha kuo hā meiate aú. Hangē ko ʻenau laú, ʻi hoʻo fakahā pē ʻokú ke fiefiá, ʻokú ke ongoʻi fiefia ai pē. Ne u malimali heʻeku lulululu mo e fakamāú. Hili iá naʻá ku lau ʻaki ʻeku lipōtí ha leʻo mahino, mo kiʻi mālōlō kau malimali ange ki ai. ʻI he ʻosi ʻeku lipōtí, naʻá ku fakamālō ange he tuku mai hono taimí. Naʻe ʻikai ke ne kei hā fakailifia. Naʻá ku ongoʻi fiemālie mo fiefia ʻi heʻeku hū ki tuʻa mei he lokí.
Hili ha ngaahi māhina siʻi mei ai, ne u fanongo kae lau ʻe heʻeku faiakó e ngaahi meʻa naʻe tohi ʻe he ongo fakamāú. ʻI heʻene lau e meʻa fakaʻosí, naʻá ne pehē mai, “Masiʻi, ʻoku saiʻia moʻoni e faiakó ʻia koe. Ko e meʻa ʻeni naʻá ne tohí, “Miseli, ko e taʻahine malimali fakaʻofoʻofá.” Naʻe ʻikai fie maʻu ia ke u ʻeke ange pe ko hai naʻá ne tohí.
Ne tokoni hono liliu ʻeku tōʻonga fakakaukaú ke u fai hoku lelei tahá. ʻI he taimi kotoa pē ne ʻi ai ha meʻa faingataʻa ke u fai, naʻe ʻikai ke u ʻai ke hā ʻoku ʻikai ke u fie fai ia, ka u fili ke u fiefia ʻi hono fakahoko iá. ʻOku ou ʻilo ʻoku uesia ʻe heʻeku tōʻonga fakakaukaú e ngaahi meʻa ʻoku ou aʻusiá. Ka ne u ako ke u fiefia ʻi he ngaahi meʻa ne u faingataʻaʻia aí ʻaki ʻeku vilitaki ʻi he tōʻonga fakakaukau ʻoku lelei.
Tā fakatātaaʻi ʻe Jennifer Tolman.