Naʻe Faifai Peá u Maʻu ha Siasi

Papulā Ti Kelekōlio, Lomupaati, ʻĪtali

Ne u ongoʻi halaʻatā peá u fakaʻānaua ke ʻi ai ha meʻa ke u pikitai ki ai ʻi he konga lahi ʻo ʻeku moʻuí. Ne u fakakaukau ʻe maʻu e meʻa ne u fekumi ki aí ʻi ha siasi, ko ia talu mei heʻeku kei siʻi mo ʻeku fakatotolo ʻi he ngaahi tui fakalotu lahi mo ha ngaahi fakakaukau fakafilōsofia. Naʻe lelei e ngaahi tui fakalotu lahi pea tokolahi e kakai lelei aí. Ne ngali kehe honau niʻihi pea ʻikai ke nau maʻu e meʻa ne u fekumi ki aí.

Hili ʻeku fekumi ʻi ha ngaahi taʻu lahi, ne u fakapipikoʻia mo loto-foʻi pea tuku ʻaupito. Ne u fakapapauʻi te u fokotuʻu pē ʻe au haku vā fetuʻutaki mo e ʻOtuá pea ʻoua te u kau ki ha faʻahinga tui fakalotu kuo fokotuʻu.

ʻI he taimi ʻe taha hili ʻeku fai e fili ko ʻení, naʻá ku sio ʻi ha polokalama televīsone naʻe fakatefito pē ʻi he meʻa fakalaumālié. Naʻe ʻinitaviu ʻe he tokotaha he televīsoné ha fāmili Siasí. ʻI heʻeku fanongo ki he fāmili ko ʻení, ne u ongoʻi ʻa e ʻofa mo e tui mālohi ko ia ne fuoloa ʻeku fekumi ki aí. Ne u saiʻia foki heʻeku ʻilo naʻe fakamamafaʻi lahi ʻe he Kāingalotu ʻo e Siasí ʻa e fāmilí. Mahalo te u toe fakatotolo ki ha siasi pē ʻe taha.

Naʻe hā he tafaʻaki ki lalo ʻo e televīsoné ha fika telefoni ki he Siasi ʻo Sīsu Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he feituʻu Mīlaní. Ne u tā ki ai ʻo talanoa mo ha kāingalotu ʻi he senitā fakasiteikí, ʻo nau aleaʻi leva ke telefoni mai e ongo faifekaú kiate au.

Ko ha taimi femoʻuekina ʻaupito ʻeni kiate au, pea ʻi he telefoni ange ʻa e ongo faifekaú ke aleaʻi ha ʻaho ke na ō ange ai, ne u kole ke u toki telefoni ange ʻi ha ngaahi uike siʻi kae ʻoua kuó u maau. Naʻá na loto ki ai pea ʻomi e fika telefoni ʻo e palesiteni Fineʻofa aí, ʻa ia naʻá ne telefoni ange ʻo fakaafeʻi au ki he lotú he ʻaho Sāpaté. Naʻá ku ʻalu, pea ne u saiʻia he meʻa kotoa pē naʻe fai ai: ʻa e ngaahi lēsoní, ʻa e kakaí, mo e laumālié. Ne u ongoʻi fiefia ʻaupito he taimi naʻá ku mavahe aí.

Ne u ʻalu ki he lotú he Sāpate kotoa ʻi he māhina ʻe ua hono hokó. Naʻe papitaiso leva au ʻi ʻOkatopa ʻo e 2008. Naʻe ʻikai ke ʻosi pē ʻeku fekumí; ka naʻe kakato. Naʻe ʻikai ke u kei ongoʻi ʻa e fieinua mo e holi ne u maʻu kimuʻá.

ʻOku ou fakafetaʻi lahi ʻi heʻeku ʻilo ʻa e moʻoní, ka ʻoku ʻi ai pē ngaahi meʻa ʻoku ou loto-mamahi ai ʻi he fuoloa pehē peá u toki ʻilo ʻa e ongoongolelei ʻo Sīsū Kalaisí. Kae kehe, ʻoku ou fakamālō ʻi he ngaahi meʻa ne u aʻusia lolotonga ʻeku fekumí. ʻOku ou ongoʻi fiemālie lahi kuó u maʻu ʻa e feituʻu totonú—ʻa e feituʻu totonu ke u kau ki aí, koeʻuhí he ne u fekumi ʻi ha ngaahi feituʻu lahi.

Ne u fakapapauʻi he ʻikai ke u kau ki ha faʻahinga tui fakalotu kuo fokotuʻu. Kae hili ha taimi mei heʻeku fai e fili ko ʻení, ne u sio ki hano ʻinitaviu ʻo ha fāmili Siasi ʻi he televīsoné.