Kuo talanoa mai hoku ngaahi kaungāmeʻa ʻoku ʻikai ke nau kau ki he Siasí ʻo kau ki he ngaahi meʻa ʻoku fakahoko he temipalé. ʻOku anga fēfē nai ʻenau ʻilo kiate kinautolu, pea ko e hā e meʻa ʻoku totonu ke u talaangé?

ʻUluakí, ʻoua naʻá ke hohaʻa ki he ngaahi fehuʻi ʻa ho ngaahi kaungāmeʻá. ʻI he ngaahi taʻu kuo hilí kuo aʻu ʻa e ngaahi fakaʻilonga mo e ouau ʻo e temipalé ki he kakaí ʻi ha ngaahi founga kehekehe, tautautefito kiate kinautolu kuo nau mavahe mei he Siasí. Ka ʻoku ʻikai ʻuhinga hono ʻilo ʻe he kakai ʻoku ʻikai ke nau kau ki he Siasí e ngaahi meʻá ni ʻoku siʻi ange ai ʻene toputapú. Ko e meʻa ʻoku mahuʻingá ke hokohoko atu ʻetau tauhi kinautolu ke toputapú pea fakahā ʻa ʻetau tukupā ki he ʻEikí.

Uá, kapau ʻe fakafehuʻia koe ʻe he kakaí fekauʻaki mo e ngaahi ouau fakatemipalé, te ke lava pē ʻo lea moʻoni ange ʻoku ʻikai te ke ʻilo lahi koe ki ai he kuo teʻeki ke ke fakahoko kinautolu. Ka ke fakamahino ha fetaʻemahinoʻaki, te ke lava ʻo fakamatala ʻoku tau ʻalu ki he temipalé ke fai ha ngaahi fuakava mo e Tamai Hēvaní pea ʻoku “tokoni … ke tau tokanga taha ai ki he Fakamoʻuí, ki Hono fatongia ki he palani ʻa ʻetau Tamai Hēvaní, pea mo ʻetau tukupā ke muimui kiate Iá” (Tuʻu Maʻu ʻi he Tuí [2004], 142). ʻOku toputapu ʻa e ngaahi fakaʻilonga mo e ngaahi ouau ʻo e temipalé pea ʻoku ʻikai totonu ke fai hano aleaʻi mo e kakaí, pe lava ke maʻu ʻa e mahino totonu ki ai ʻi tuʻa mei he ngaahi meʻa ʻi he temipalé.

Ke ʻilo lahi ange, te ke lava ʻo lau ʻa e ngaahi maʻuʻanga tokoni ko ʻení, ʻa ia ʻoku fakatou maʻu ʻi ha ngaahi lea fakafonua ʻe niʻihi ʻi he LDS.org:

• Ko e kiʻi tohi Ko e Teuteu ke Hū Ki he Temipale Māʻoniʻoní (2004).

• Ko e “Ngaahi Temipalé” fakamatala ʻi he Tuʻu Mau ʻi he Tuí, peesi 141–46.