Tokotaha Maluʻi ʻo e Tuí
Ko e tokotaha vaʻinga lelei ʻa Kupangila Kasenisā Saleva mei Kenisasa, Lepupelika Fakatemokalati ʻo Kongokoú, ʻi ha ngaahi timi lahi.
ʻOku vave ʻaupito hono tātaaʻi mai ʻe he tokotaha mei he timi ʻe tahá ʻa e foʻi pulú ki he koló. Hangē naʻá ne ʻosi fakapapauʻi pē ʻe ia ʻe fakahū ʻo hū. Ka ne aʻu atu ʻa Saleva ki ai, na manga fakataha pē, ʻo ne ʻakahi e foʻi pulú, pea lele ia ki he feituʻu ʻe tahá.
Ko e fakamatala ʻeni ʻa Salevá ʻa ia naʻe taʻu 12, “Ko e tokotaha malu kolo au. Ko ʻeku ngāué ke taʻofi e timi ʻe tahá mei haʻanau kai.”
Ko Saleva e faʻahinga tokotaha vaʻinga ʻokú ke loto ke kau ʻi hoʻo faʻahí. ʻOku fakalongolongo kae lea mahino, ʻokú ne mateuteu ke ngāue mālohi, pea ʻokú ne saiʻia ke sio ʻoku lavameʻa e tokotaha kotoa ʻi he timí. Ko e ngaahi ʻulungāanga ʻeni ʻokú ne hoko ai ko ha konga mahuʻinga ʻo ha ngaahi timi kehe—ʻo hono siasí mo hono fāmilí. Pea ʻokú ne vēkeveke ke maluʻi e moʻoní.
Ko Saleva mo Nīfai
Ko e potufolofola ʻoku saiʻia taha ai ʻa Salevá ko e 1 Nīfai 3:7: “Te u ʻalu ʻo fai ʻa e ngaahi meʻa kuo fekau ʻe he ʻEikí.” Naʻe falala ʻa Saleva ki he ʻEikí, ʻo hangē pē ko Nīfaí. “He ʻikai ke Ne kole mai ke u fai ha meʻa kae ʻikai te Ne teuteu ha hala maʻaku ke u fai ia. Te Ne fakamālohia au pea fekauʻi mai mo ha niʻihi ke tokoniʻi au.”
ʻAlu ʻo Fai Ia
ʻOku pehē ʻe Saleva, “ ʻOku mahuʻinga ʻa e fakafanongo ki he meʻa ʻoku akoʻi mai kau ki he ongoongoleleí. Ka ʻoku toe mahuʻinga foki ke fai ʻa e meʻa ʻoku akoʻi maí.” ʻOkú ne manatu ki hono papitaisó pea ʻoku feinga ʻi he ʻaho takitaha ke ne fakaʻaongaʻi e meʻafoaki ʻo e Laumālie Māʻoniʻoní ke fai ha ngaahi fili ʻoku fakapotopotó. Kuó ne toki maʻú ni ʻa e Lakanga Taulaʻeiki Faka-ʻĒloné, pea ʻoku hanganaki atu ke ʻalu ki he temipalé ʻi ha ʻaho ʻo fai ha toe fuakava mo e ʻEikí, pea ʻokú ne palani ke ngāue fakafaifekau taimi kakato. ʻOkú ne fie tā ha faʻifaʻitakiʻanga lelei ki hono ngaahi tokouá pea tokoni ki heʻene faʻeé mo ʻene tamaí.
ʻOkú ne pehē, “ ʻOku ou fakaʻapaʻapa ki heʻeku faʻeé mo ʻeku tamaí ʻaki hono fai ʻo e meʻa ʻokú na fie maʻu ke u faí mo tauhi e ngaahi fekau ʻa ʻetau Tamai Hēvaní. Ko au ʻoku lahi tahá, pea ʻoku ou ʻilo hono mahuʻinga ke u tā ha faʻifaʻitakiʻanga lelei maʻa hoku ngaahi tokouá, he ko e meʻa te u faí, te nau fai foki mo ia.”
Tuʻu Mālohí
ʻOku ʻiloʻi ʻe Saleva ʻa e mahuʻinga ʻo e ngāue mālohí, ʻo tatau pē ʻi he sipotí mo e ongoongoleleí. Ko e lotu fakafāmili mo fakatāutahá, ako folofola fakafāmili mo fakatāutahá, efiafi fakafāmili ʻi ʻapí—ko e konga kotoa kinautolu ʻo ʻene polokalama angamahení. ʻOku ʻi ai ʻene fakamoʻoni ki he Lea ʻo e Potó pea ʻokú ne ʻiloʻi ʻoku lelei e ngaahi meʻa ʻe niʻihi ke kai kae kovi e niʻihi. ʻOkú ne pehē ʻe ia, “ ʻOku ʻikai totonu ke inu pia ʻa e kau ʻatelitá.”
Ko ha Tokotaha Maluʻi Moʻoni
ʻI he ʻunu ʻa e Siasí ki he kahaʻú, ko e meʻa lelei ke ʻiloʻi ʻoku ʻi ai ha kau talavou mālohi hangē ko Salevá ʻoku nau vēkeveke ke fai ʻa ia ʻoku totonú. ʻOku pehē ʻe Saleva, “ ʻOku ou ʻilo ʻoku moʻui ʻa ʻeku Tamai Hēvaní, ʻoku moʻoni ʻa Sīsū Kalaisi, pea ko Siosefa Sāmita ʻa e palōfita naʻá ne fakafoki mai e ongoongoleleí ki he māmaní. ʻOku ou maʻu e fakamoʻoni ko iá pea te u maluʻi maʻu ai pē ʻa e Siasí ʻi he founga hono kotoa.”
ʻŪ taá naʻe fai ʻe Richard M. Romney