Ke Nonoʻo ʻa e Loto-mafesí
ʻI he ngaahi taʻu ʻo e 1990 ne u ʻalu mo hoku fāmilí ki ʻAfilika ʻi hono vahe au ʻi heʻeku ngāue he Siasí ke kau he ngāue tokoni ʻi Pulunitī, Luanitā mo Somālia. Ko e lolotonga ʻeni ha vahaʻa-taimi faingataʻa ʻo e honge, fakamamahi, mo e tau, pea naʻe taulōfuʻu hono fakamamahí.
Ne lauiafe e kakai ʻi he ngaahi ʻapitanga maʻá e kau kumi hūfangá. Laungeau mo e fānau paea ne nau langa ha ngaahi feituʻu ke nau nofo ai. Ne nau fefaʻuhi maʻu pē mo e kōlelá, taifotí, mo e fasimanavá. Ne ʻāsinga e ongoʻi ʻoku ʻikai ha toe ʻamanaki leleí ʻi he namu haʻahaʻa ʻo e ngaahi meʻa kuo koví mo e kakai maté.
Ne ueʻi au ke fai kotoa e tokoni te u ala lavá. Naʻe ngāue fakataha e Siasí mo e Kōmiti Fakavahaʻa-puleʻanga ʻa e Kolosi Kulá mo e ngaahi kautaha kehe pē, ka ne u fifili he taimi ʻe niʻihi pe naʻe hoko koā ha lelei ʻi heʻemau ngaahi tokoní ʻi he fehangahangai mo e ngaahi fakamamahi fakalilifu mo e faingataʻa ko ʻeni kuo lahi ʻene mafolá. Naʻe faingataʻa ke toʻo atu ʻa e ongoʻi loto-foʻí mo e siva e ʻamanakí, pea ne u faʻa tangi ʻi heʻeku ʻalu ʻo mohé.
Lolotonga e taimi fakaloto-foʻi ko ʻení, ne toki mahino lahi ange kiate au ha potufolofola angamaheni pē. Ko e ngaahi lea ʻeni ʻa ʻĪsaia ʻo ne talamai naʻe “pani [ʻa e Fakamoʻuí] ke ne nonoʻo ʻa e loto-mafesí, ke ne fakahā ʻa e tauʻatāina ki he kau pōpulá, pea mo fakaava ʻa e fale fakapōpulá kiate kinautolu naʻe haʻisiá” (T&F 138:42).
Kuó u mamata pea talanoa mo ha kakai tokolahi kuo “loto-mafesi” ʻi ha ngaahi faingataʻa lahi. Kuo mole honau ngaahi ʻofaʻangá, ʻapí mo e moʻui nonga ne nau maʻú. Ka kuo hā mei he tokolahi kuo ʻosi “nonoʻo” honau loto mamahí. Hangē ko ʻení, ʻi heʻemau faʻa ō atu ki ha ʻapi masivesiva mo fakataimi, ʻe kole mai ʻa kinautolu aí, “Te mou fie lotu nai mo kimautolu?” Hangē ne maʻu ʻe he kakaí ʻa e fiefia mo e nonga ʻi heʻenau lotu mo hū ki he ʻEikí.
Ko e moʻoni he ʻikai lava ke tau fekumi ki he ʻaonga ʻo e Fakaleleí ʻi he moʻuí ni pē. ʻOku hoko foki ia hili ʻa e moʻuí ni. ʻOku ou ʻilo ʻe huhuʻi e kau pekiá mo toetuʻu ʻa e kakai kotoa pē koeʻuhí ko e Fakamoʻuí. ʻE toʻo atu pea fakamoʻui ʻa e mamahi ʻoku tau aʻusia ʻi he moʻui ní—neongo pe ko e hā hono lahí—ʻe he Fakaleleí.
Ne tohi ʻe Molomona mo Molonai ʻa ia naʻá na moʻui ʻi ha taimi ʻo e fetāmateʻaki lahi mo e mate, ʻo kau ki he ʻamanaki lelei ʻi ha ʻOtua ʻofa ʻoku hulu atu ʻene ʻaloʻofá mo e fakamaau totonú ʻi he mahino kotoa pē (fakatātā ʻaki ʻeni, vakai, Molonai 7:41–42). Naʻe fakamālohia ʻeku tuí ʻi heʻeku ako e ngaahi lea ʻa e ongo palōfitá ni. ʻI heʻeku fifili ko ia pe naʻe ʻaonga nai ʻemau ngaahi ngāué, ne u ongoʻi fakapapau ko e mālohi huhuʻi taupotu tahá pē ʻa e ʻaloʻofa ʻa e Fakamoʻuí. Mahalo ʻe ʻi ai e ngataʻanga ʻo ʻetau ngaahi feinga lelei tahá, ka ʻoku taʻefakangatangata mo taʻengata Haʻaná.
ʻOku mahino hono fakatupu ʻe he ngaahi tuʻunga ʻoku ʻi ai ʻa māmaní ʻa e ngaahi faingataʻa lahi, ka ʻoku ʻikai ke taʻemalava ʻe he Huhuʻí ke fai hono fakaleleiʻi. ʻE lava ke tau maʻu kotoa pē ʻa e ʻamanaki lelei ʻoku pau ʻe lava ke faitoʻo pea fakamoʻui hotau lotó ʻi he Fakalelei ʻa Kalaisí. ʻI heʻeku maʻu e ʻilo ko ʻení, naʻe lava ke hoko atu ʻeku ngāué ʻi heʻeku ʻiloʻi ʻoku ola lelei maʻu pē ʻEne ngaahi ngāué.
ʻA ʻEku Tamai, tā ʻe Simon Dewey