Naʻe pehē ʻe Palesiteni Monisoni ko e ngāue fakafaifekau taimi kakató ko ha fatongia ia ʻo e lakanga fakataulaʻeikí. ʻOku ʻuhinga ia ki he hā?
Naʻe pehē ʻe Palesiteni Tōmasi S. Monisoni ʻi he konifelenisi lahi fakamuimuitahá: “Ki he kau talavou ʻo e Lakanga Taulaʻeiki Faka-ʻĒloné pea kiate kimoutolu ʻoku teuteu kaumātuʻá: ʻOku ou toe fakaongo atu e lea ʻa e kau palōfitá—ʻoku totonu ke teuteu e talavou moʻui taau kotoa ʻe malavá, ke ne ʻalu ʻo ngāue fakafaifekau. Ko e ngāue fakafaifekaú ko ha fatongia ʻo e lakanga fakataulaʻeikí—ʻoku ʻamanaki mai e ʻEikí ʻe fakahoko ʻe kitautolu kuó ne foaki lahi ki aí.”1
ʻOku kau ʻi hono maʻu ʻo e lakanga fakataulaʻeikí ʻa hoʻo loto fiemālie ke toʻo kiate koe ʻa e ngaahi fatongia mo e ngaahi ngafa ʻoku haʻu fakataha mo iá. Hangē pē ko ha toe meʻafoaki ʻoku foaki mai ʻe he Tamai Hēvaní, ʻokú Ne ʻamanaki mai ke ke ngāue ʻaki ʻa e lakanga fakataulaʻeikí ke faitāpuekina e niʻihi kehé. “He ko ia ʻoku foaki ki ai ʻa e meʻa lahí ʻoku ʻekeʻi ʻa e meʻa lahi meiate ia” (T&F 82:3).
Ko e kau maʻu Lakanga Taulaʻeiki Faka-ʻĒloné te nau “fakatokanga, fakamatala, naʻinaʻi, mo akonaki, pea fakaafeʻi ‘a e kakai kotoa pē ke nau haʻu kia Kalaisi” (T&F 20:59). Hangē ko e lea ʻa Palesiteni Monisoní, ko e ngāue fakafaifekau taimi kakató ko ha fatongia ia ʻo e kau maʻu lakanga fakataulaʻeikí. Te ke tuku kotoa ho iví, taimí, mo hoʻo tokangá ki hono fakakakato ʻo e fatongia ko iá ʻi hoʻo ngāue fakafaifekaú: ko e tokoni, malangaʻi ʻo e ongoongoleleí, pea fakaafeʻi e kakai kotoa ke haʻu kia Kalaisi. Ko e moʻoni, ʻoku ʻi ai maʻu pē ʻa e ngaahi tāpuaki ʻoku maʻu ʻi hono fakahoko ho fatongiá. ʻE hoko hoʻo ngāue fakafaifekaú ko ha taimi ʻo e fiefia lahi mo e tupulaki fakalaumālie.