Naʻa Mau Kumi Tokoni ʻi Haʻamau Lotu

Mikaele Tolonikoso, Sanitā Kulusi, ʻĀsenitina

ʻI ha Sāpate ʻe taha ne maʻu ʻe homau siteikí ha ongoongo fakafiefia ʻe ʻalu ange ʻa ʻEletā Kālosi H. ʻĀmato ʻo e Kau Fitungofulú ʻo lea ʻi homau siteikí he efiafi Tūsité. Ne u fiefia mo hoku fāmilí, ka ne u hohaʻa pe te mau lava fēfē ki he fakatahá.

Ne u faiako he akoʻanga māʻolungá, pea naʻe ʻi ai ʻeku kalasi he efiafi Tūsité. Meʻapango naʻe tātātaha pē haku taimi ʻatā. Naʻe ʻikai ke ʻilo ʻe hoku fāmilí e meʻa ke faí ka naʻa mau fakapapauʻi te mau fanongo ki he lea ʻa ʻEletā ʻĀmató, ko ia ne mau kumi tokoni ʻaki haʻamau lotu mo ʻamanaki pē ʻe fakahā mai ʻe he ʻEikí ha founga.

ʻI he ʻaho kimuʻa he konifelenisí, ne u ongoʻi pē ke u talanoa mo e puleakó ke u tuku vave ʻaki ha miniti ʻe 20 ka mau aʻu mo hoku fāmilí ki he fakatahá. Ne u aʻu atu ki hono ʻōfisí, ka ʻi he teʻeki ke u leá, naʻá ne kole mai pe ʻe lelei pē ke fetongi ʻeku taimi kalasi he Tūsité ʻo vave ʻaki ha houa ʻe ua he taimi angamahení. ʻA ia ʻe tuku vave ʻeku kalasí ʻaki ha houa ʻe ua.

Ko ha tāpuaki ʻeni kiate kimautolu. Naʻa mau aʻu ki he fakatahaʻangá ʻi ha taimi lahi pea mau ongoʻi ʻa e Laumālié ʻi he ʻi ai ʻa e taha ʻo e kau ākonga ʻa e ʻEikí. Ne fiefia foki mo hoku foha taʻu nimá ʻi he faingamālie fakaʻofoʻofa ke feʻiloaki mo kiʻi talanoa mo ʻEletā ʻĀmato pea toki fai e fakatahá. Naʻa mau fiefia fakataha mo e haʻofangá ʻi heʻemau ongoʻi ʻa e Laumālié. ʻIkai ko ia pē, ka ne maʻu ʻe homau fāmilí ʻa e fakamoʻoni ʻoku ʻafioʻi ʻe he Tamai Hēvaní e ngaahi holi hotau lotó mo fanongo ki heʻetau ngaahi lotú.